Cipaturo 4

Wanthumbo Kweni Wambura Kutengwa

MARIYA wali na nthumbo ya myezi yitatu. Mungakumbuka kuti apo nthumbo iyi yikambanga, wakaluta kukacezga kwa Elizabeti, kweni sono wawelera kukwake ku Nazarete. Pakhala pacoko kuti ŵanthu mu tawuni yakwake ŵamanye kuti wali na nthumbo. Nadi, Mariya mutu wayima.

Suzgo ndakuti Mariya wali kufikirika na Yosefe, misiri wa mathabwa, kuti ŵatorane. Ndipo Mariya wakumanya kuti mwakuyana na dango la Ciuta ku Ŵaisrayeli, mwanakazi uyo wafikirika na mwanalume, kweni wakugona na mwanalume munyake wakwenera kudinyika na malibwe. Kasi wangamulongosolera wuli Yosefe za nthumbo iyi?

Pakuti Mariya wakafumapo kwa myezi yitatu, Yosefe wakwenera kuti ngwakunweka comene kuti wamuwone. Tikukayika yayi kuti ŵati ŵakumana, Mariya wakumuphalira nkhani iyi. Panji wangayezga kulongosora makora kuti wali na nthumbo mwa mzimu utuŵa wa Ciuta. Kweni nga umo namwe mukumanyira, nchakusuzga comene kuti Yosefe wagomezge.

Yosefe wakumanya kuti Mariya wali na lumbiri luwemi. Ndipo wakwenera kuti wakumutemwa comene. Ndipouli, nanga Mariya wangayowoya wuli, Yosefe wakughanaghana kuti wali na nthumbo ya mwanalume munyake. Nangauli vili nthena, Yosefe wakukhumba cara kuti Mariya wadinyike na malibwe panji kulengeskeka pa wumba. Ntheura wakughanaghana za kumupata mwacibisibisi. Mu mazuŵa ghara, ŵanthu awo ŵafikirana ŵakaŵawonanga kuti mbakutorana, ndipo kalata ya cipati yikakhumbikwanga kuti ubwezi wawo umare.

Pamanyuma, apo Yosefe wacali kughanaghanirapo nkhani iyi, wakuluta kukagona. Mungelo wa Yehova wakumuwonekera mu loto ndipo wakuti: “Ungopanga cara kumutolera ku nyumba Mariya muwoli wako, pakuti ico cazuwuka mwa iyo ncha mzimu utuŵa. Wababenge mwana msepuka, ndipo zina lake ukwenera kumuthya Yesu, cifukwa wazamuponoska ŵanthu ŵake ku zakwananga zawo.”

Apo Yosefe wakuwuka, iyo ngwakuwonga comene. Ndipo mwambura kucedwa, wakucita nga umo mungelo wamuphalilira. Wakutora Mariya kuluta nayo ku nyumba yake. Ivyo ŵacita apa, vikulongora kuti Mariya na Yosefe sono mbakutorana nadi. Kweni Yosefe wakugona nayo yayi muwoli wake pa nyengo iyo wali na nthumbo ya Yesu.

Wonani! Mariya wali pafupi kubaba, kweni Yosefe wakumukwezga pa mbunda. Kasi ŵakuluta nkhu, ndipo cifukwa wuli ŵakwamba ulendo apo Mariya wali pafupi kubaba? Luka 1:39-41, 56; Mateyu 1:18-25; Duteronome 22:23, 24.

▪ Kasi Yosefe wakughanaghana vici wati wapulika kuti Mariya wali na nthumbo, ndipo cifukwa wuli?

▪ Kasi Yosefe wangamupata wuli Mariya uku ŵandatorane?

▪ Ni vinthu wuli ivyo vyacitika, ivyo vikulongora kuti Yosefe na Mariya ŵatorana?