Cipaturo 26

Wizaso Kukwake ku Kaperenaumu

PASONO Yesu wamanyikwa kosekose, ndipo ŵanthu ŵanandi ŵakwiza uko iyo wakukhala kufuma ku malo ghakutali. Ndipouli, pamanyuma pa mazuŵa ghanji, wakuweleraso ku Kaperenaumu mumphepete mwa Nyanja ya Galileya. Mwaluŵiro, ŵanthu mu msumba wose ŵakupulika kuti wizaso kukwake, ndipo ŵanandi ŵakwiza ku nyumba iyo wali. Ŵafarisi na ŵasambizgi ŵa Dango nawo ŵakwiza kufuma kutali, ku Yerusalemu.

Mzinda ngukuru comene mwakuti ŵakufyenyana pa mulyango, ndipo palije mpata wakuti munthu wanjilire mukati. Ici cikupangiska kuti nchinthu cinyake cambura kuluwika cicitike. Ico cikucitika pa nyengo iyi nchakuzirwa comene, cifukwa cikutovwira kumanya kuti Yesu wali na nkhongono zakufumiskirapo ico cikupangiska ŵanthu kusuzgika na kuwezgerapo umoyo uwemi ku wose awo wakhumba.

Apo Yesu wakusambizga mzinda, ŵanalume ŵanayi ŵakwiza na munthu wakufwa viŵaro pa kasalasala. Ŵakukhumba kuti Yesu wacizge mubwezi wawo, kweni cifukwa ca mzinda, ŵanganjira yayi mukati. Ici nchakugulura nkhongono comene. Ndipouli, ŵakugongowa yayi. Ŵakukwera pa mtenje wa nyumba na kubawulapo, ndipo ŵakukhizgira kasalasala pafupi na Yesu.

Kasi Yesu wakwiya cifukwa ca kumutimbanizga? Cara nadi! Kweni watoleka mtima na cipulikano cawo. Yesu wakuti kwa wakufwa viŵaro: “Zakwananga zako zagowokereka.” Kweni kasi Yesu wangagowokera nadi zakwananga? Ŵalembi na Ŵafarisi ŵakughanaghana kuti wangagowokera yayi zakwananga. Ŵakughanaghana mu mitima yawo kuti: “Cifukwa wuli munthu uyu wakuyowoya ntheura? Wakuyuyura Ciuta. Ni njani wangagowokera zakwananga padera pa yumoza pera, Ciuta?”

Pakumanya maghanoghano ghawo, Yesu wakuti kwa iwo: “Cifukwa wuli mukughanaghana vinthu ivi mu mitima yinu? Cipusu ni nchi, kuyowoya ku wakufwa viŵaro kuti, ‘Zakwananga zako zagowokereka,’ panji kuyowoya kuti, ‘Wuka ndipo tora kasalasala wako na kwenda’?”

Kufuma apo, Yesu wakukhumba kuti mzinda, pamoza na awo ŵakumususka, ŵawone cinthu capadera ico civumburenge kuti wali na mazaza kugowokera zakwananga pa caru capasi ndiposo kuti iyo ni munthu mukuru wakuluska wose awo ŵali kuŵako. Wakuzgokera kwa wakufwa viŵaro na kulangura kuti: “Wuka, tora kasalasala wako, ndipo lutanga ku nyumba yako.” Ndipo nyengo yeneyiyo wakuwuka, wakufumapo na kasalasala wake panthazi pa wose. Cifukwa ca kuzizwa, ŵanthu ŵakupeleka ucindami kwa Ciuta, ndipo ŵakuyowoya kuti: “Tindawonepo cinthu canthena”!

Kasi mwanguwona kuti Yesu wanguzunura zakwananga apo wayowoyanga za matenda ndiposo kuti pali kukolerana pakati pa kugowokereka zakwananga na kusanga umoyo uwemi? Baibolo likulongosora kuti mupapi withu wakwamba, Adamu, wakananga ndipo tose tili kuhara njombe ya kwananga kura, iyo mbulwari na nyifwa. Kweni mu Ufumu wa Ciuta, Yesu wazamugowokera zakwananga za wose awo ŵakutemwa Ciuta na kumuteŵetera, ndipo maulwari ghose ghazamumara. Ici cizamuŵa ciwemi comene! Mariko 2:1-12; Luka 5:17-26; Mateyu 9:1-8; Ŵaroma 5:12, 17-19.

▪ Kasi vinthu vikaŵa wuli apo cinthu cambura kuluwika cikacitikira?

▪ Kasi munthu wakufwa viŵaro wakafika wuli apo pakaŵa Yesu?

▪ Cifukwa wuli tose tili ŵakwananga, kweni Yesu wakutipa wuli cigomezgo cakuti tizamugowokereka zakwananga na kusanga umoyo wakufikapo?