Cipaturo 123

“Wonani! Munthu Uyu!”

WATI watoleka mtima na umo Yesu wakucitira vinthu ndiposo pakumanya kuti ngwambura mulandu, Pilato wakupenja nthowa yinyake yakuti wamufwatulire. Wakuphalira mizinda kuti: “Muli na kaluso kakuti nkhwenera kumufwatulirani munthu pa paska.”

Baraba, uyo ni munthu muheni wakukoma ŵanthu nayo wali mu jele, ntheura Pilato wakufumba kuti: “Kasi mukukhumba kuti nimufwatulirani nju, Baraba panji Yesu uyo wakucemeka Khristu?”

Pakuti ŵapusikika na ŵalara ŵa ŵasofi, ŵanthu ŵakupempha kuti Baraba wafwatulike kweni Yesu wakomeke. Pilato wakuthera yayi ndipo wakufumbaso kuti: “Pa ŵaŵiri aŵa, kasi mukukhumba kuti nimufwatulirani njani?”

Iwo ŵakucemerezga kuti: “Baraba.”

Pilato wakufumba mwacitima kuti: “Ipo nicite nayo vici Yesu uyo wakucemeka Khristu?”

Wose pamoza ŵakucemerezga kuti: “Wapayikike!” “Mupayikani! Mupayikani!”

Pakumanya kuti ŵakukhumba kuti munthu wambura mulandu wakomeke, Pilato wakuŵaŵeya kuti: “Cifukwa wuli, nchinthu wuli ciheni ico munthu uyu wacita? Nindasangemo kanthu kakwenelera nyifwa mwa iyo; ntheura nimuthyapulenge na kumufwatura.”

Nangauli wakuyezgayezga, mzinda uwo wakwiya cifukwa ca kupusikika na ŵalongozgi ŵa cisopa, ukulutilira kucemerezga kuti: “Wapayikike!” Pakukhuŵilizgika na ŵasofi, mzinda ukuti wafwe. Ndipo ici nchakuzizika cifukwa mazuŵa ghankhondi pera agho ghajumphapo, ŵanji ŵa iwo ŵakwenera kuti ŵakaŵa ŵamoza mwa awo ŵakapokeleranga Yesu apo wakanjiranga mu Yerusalemu nga ni Themba. Nyengo yose iyi, ŵasambiri ŵa Yesu usange ŵalipo ŵakukhala waka cete ndipo ŵakuwonekera cara.

Pilato wati wawona kuti pempho lake likupulikikwa cara, kweni mzinda ukulutilira kucemerezga, wakutora maji na kugeza mu mawoko panthazi pa mzinda, na kuyowoya kuti: “Nilije mulandu wa ndopa za munthu uyu. Imwe mujiwonere mwaŵene.” Pa ici ŵanthu ŵakuzgora kuti: “Ndopa zake zize pa ise na pa ŵana ŵithu.”

Ntheura mwakuyana na pempho lawo, ndiposo pakukhumba kukhorweska mzinda m’malo mwa kucita ico wakumanya kuti nchakwenelera, Pilato wakuŵafwatulira Baraba. Wakutora Yesu na kutuma ŵanthu kuti ŵamuvure na kumuthyapura. Uku kukaŵa kuthyapura bweka yayi. Buku la The Journal of the American Medical Association likulongosora umo Ŵaroma ŵakacitiranga pakuthyapura munthu, likuti:

“Cilwero ico ŵakatimbiranga cikaŵa cikoti cifupi (flagrum panji flagellum) cakuŵa na cikumba cimoza panji vinandi vyakuposeka pamoza, vyakutalika mwakupambapambana, ivyo ŵakakakangako tumbulunga twavisulo panji tuviwangwa twakuthwa twa mberere . . . Apo ŵasilikari ŵa Ŵaroma ŵakatimbanga msana wa munthu mwakuwerezgawerezga na nkhongono zawo zose, tumbulunga twavisulo utu tukakhoboranga, ndipo vikumba na viwangwa vya mberere, vikatemanga thupi lake. Ndipo pakulutilira kuthyapura, vilonda vikafikanga mpaka mu minofu ya mukati comene ndipo ndopa zikakhutukanga kufuma mu vilonda.”

Ŵati ŵamutimba Yesu ntheura, ŵakumutolera mu nyumba ya kazembe uyu, ndipo ciwuru cose ca ŵasilikari cikucemeka. Mura, ŵasilikari ŵakulutilira kumucitira nkhaza, ŵakuluka mphumphu ya minga na kumuvwalika mwakucicizga. Ŵakumukorezga thete mu woko lamalyero, ndipo ŵakumuvwalika salu yichesamu, iyo ghakuvwara mafumu. Kufuma apo, ŵakwamba kumuhoya ŵakuti: “Monire, imwe Themba la Ŵayuda!” Kweniso ŵakumuthunyira mata na kumutimba makofi kumaso. Ŵakutora thete ilo lili mu woko lake na kumukhowora nalo pa mutu. Apo ŵakucita nthena, minga za “mphumphu” yakumulengeska iyo ŵamuvwalika zikumulasa ku mutu.

Pakuwona umo Yesu wakucitira pakumuyuzga, Pilato wakutoleka mtima comene, ndipo wakupenja nthowa yinyake yakuti wamuwombolere. Wakuphalira mzinda kuti: “Wonani! Nkhumutolera kuwaro kwa imwe mwakuti imwe mumanye kuti ine nkhusangamo kafukwa mwa iyo cara.” Panji wakughanaghana kuti usange ŵangawona umo Yesu wapwetekekera ŵangamucitira citima. Apo Yesu wakwimilira panthazi pa wumba ukali uwu, uku wavwara mphumphu ya minga na laya lichesamu, kumaso kwake kuli ndopa ndipo kukuŵinya comene, Pilato wakucemerezga kuti: “Wonani! Munthu uyu!”

Nangauli watimbika ndipo wali na vikomokomo, uyu ni munthu wapadera comene mu mdauko wose wa ŵanthu. Iyo ni munthu mukuru kuluska wose awo ŵali kuŵako. Enya, Yesu walongora kuzika kwapadera comene, uwo mbukaboni wakuti ni mukuru ndipo Pilato nayo wakuzizikika, cifukwa mazgu ghake ghakulongora kuti wakumucindika na kumucitira citima. Yohane 18:39–19:5; Mateyu 27:15-17, 20-30; Mariko 15:6-19; Luka 23:18-25.

▪ Kasi Pilato wakuyezga wuli kuti wafwature Yesu?

▪ Kasi Pilato wakuyezga wuli kuti wajifyure mulandu?

▪ Kasi Ŵaroma ŵakacitanga wuli pakuthyapura munthu?

▪ Kasi Yesu ŵakumucitira nkhaza wuli ŵati ŵamuthyapura?

▪ Kasi Pilato wakuyezgaso wuli kuti wafwature Yesu?