Cipaturo 128

Yesu Ngwamoyo!

ŴANAKAZI ŵati ŵasanga kuti mu dindi la Yesu mulije kanthu, Mariya wa ku Magadala wakucimbira kukaphalira Petrosi na Yohane. Ndipouli, ŵanakazi ŵanyake ŵakwenera kuti ŵakukhalira penepara pa dindi. Mwaluŵiro mungelo wakuwoneka na kuŵacemera mukati.

Mukati mura, ŵanakazi ŵakusangamo mungelo munyake, ndipo yumoza wa ŵangelo wakuti kwa iwo: “Imwe kofiwa cara, cifukwa nkhumanya kuti mukupenja Yesu uyo wakapayikika. Wali pano cara, pakuti wali kuwuskika, umo wakayowoyera. Zaninge, wonani malo agho wakagonapo. Ndipo lutani mwaluŵiro na kuphalira ŵasambiri ŵake kuti wali kuwuskika ku ŵakufwa.” Ntheura pakuŵa na wofi ndiposo cimwemwe cikuru, ŵanakazi aŵa nawo ŵakucimbira kuwukapo pa dindi.

Pasono Mariya waŵasanga Petrosi na Yohane, ndipo wakuŵaphalira kuti: “Ŵawuskamo Fumu mu dindi, ndipo tikumanya cara uko ŵayiŵika.” Nyengo yeneyiyo, ŵapositole ŵaŵiri aŵa ŵakwamba kucimbilira ku dindi. Yohane ngwakupepuka malundi, panji cifukwa cakuti ni mwana kwa Petrosi, ndipo wakudankha ndiyo kufika pa dindi. Pa nyengo iyi, ŵanakazi ŵafumapo, ntheura palije munthu waliyose. Wati wakotama, Yohane wakulingizga mu dindi ndipo wakuwona sanda, kweni wakunjiramo yayi.

Petrosi wati wafika, wakufikira waka kunjira mukati. Wakuwona sanda zawunjikika pasi kweniso salu iyo ŵakavungira mutu wa Yesu. Yapetekeka na kuŵikika pa malo ghamoza. Sono Yohane nayo wakunjira mu dindi, ndipo wakugomezga ivyo Mariya wanguyowoya. Kweni Petrosi na Yohane ŵakupulikiska yayi kuti Yesu wawuskika, nangauli Yesu wakaŵaphalira kanandi waka kuti wazamuwuskika. Ŵaŵiri aŵa ŵazizwa, ndipo ŵakuwelera kukwawo, kweni Mariya, uyo wizaso ku dindi, wakukhala penepara.

Pa nyengo iyi, ŵanakazi ŵanyake ŵara ŵakucimbira kukaphalira ŵasambiri kuti Yesu wawuskika, nga umo ŵangelo ŵanguŵaphalilira. Apo ŵakucimbira pamoza mwaluŵiro comene, Yesu wakukumana nawo na kuyowoya kuti: “Monire!” Ŵakuwa mu malundi ghake na kumusindamira. Yesu wakuti: “Kopa cara! Lutani, mukaphalire ŵabali ŵane, kuti ŵalute ku Galileya; ndipo kwenekura ndiko ŵamuniwona.”

Pakwamba apo cindindindi cangucitika ndipo ŵangelo ŵanguwoneka, ŵasilikari awo ŵalindanga ŵanguzizikika ndipo ŵanguŵa nga mbanthu ŵakufwa. Ŵati ŵaweleramo, nyengo yeneyiyo ŵangunjira mu msumba na kukaphalira ŵalara ŵa ŵasofi ivyo vyacitika. Ŵasofi na “ŵanalume ŵalara” ŵa Ŵayuda ŵati ŵadumbiskana, ŵakudumura kuti ŵahonge ŵasilikari mwakuti nkhani iyi yileke kumanyikwa. Ŵakuphalira ŵasilikari kuti: “Mutenge, ‘Ŵasambiri ŵake ŵakiza usiku na kumwiba apo ise tikaŵa mu tulo.’”

Pakuti ŵasilikari ŵa Ŵaroma ŵangapokera cilango ca nyifwa cifukwa ca kugona tulo pa nchito, ŵasofi ŵakulayizga kuti: “Usange ici capulikikwa kwa kazembe [cakuti mwagonanga tulo], tizamumupepeka na kumufwaturani kuti muleke kufipa mtima.” Pakuti vimbundi ivyo ŵakaŵapa vikaŵa vinandi, ŵasilikari aŵa ŵakacita nga umo ŵakaphalilikira. Pa cifukwa ici, nkhani yautesi yakuti thupi la Yesu likibika yikathandazgika comene pakati pa Ŵayuda.

Mariya wa ku Magadala, uyo wacali pa dindi, wali na citima cikuru. Kasi Yesu wangaŵa kuti wali nkhu? Wati wakotama kulaŵiska mu dindi, wakuwona ŵangelo ŵaŵiri ŵakuvwara vituŵa, awo ŵawonekaso. Yumoza wakhala ku mutu ndipo munyake ku malundi apo thupi la Yesu langugonekeka. Ŵakumufumba kuti: “Wamwanakazi, ukuliraci?”

Mariya wakuzgora kuti: “Ŵawuskamo Fumu yane, ndipo nkhumanya cara uko ŵayiŵika.” Kufuma apo, wakung’anamuka ndipo wakuwona munthu munyake uyo wakumufumbaso fumbo lenelira, wakuti: “Wamwanakazi, ukuliraci?” Ndipo iyo uyu wakufumbaso kuti: “Kasi ukupenja njani?”

Pakughanaghana kuti munthu uyu ngwakupwelelera munda uwo muli dindi, Mariya wakuti kwa iyo: “Dada, usange mwamuwuskamo, niphalirani uko mwamuŵika, ndipo ine namumutora.”

Munthu uyu wakuti: “Mariya!” Ndipo nyengo yeneyiyo wakumanya kuti ni Yesu, cifukwa wayowoya nga umo wakuyowoyera nayo nyengo zose. Iyo wakucemerezga kuti: “Raboni!” (ndiko kuti “Msambizgi!”). Ndipo na cimwemwe cikuru, wakumuvumbatira. Kweni Yesu wakuti: “Leka kudemelera kwa ine. Pakuti nicali nindakwere ku Ŵadada. Kweni luta ku ŵabali ŵane ndipo ukati kwa iwo, ‘Nkhukwelera ku Ŵadada na Ŵawiskemwe ndiposo kwa Ciuta wane na Ciuta winu.’”

Sono Mariya wakucimbilira uko ŵapositole na ŵasambiri ŵanji ŵawungana. Nayo wakuyowoya ivyo ŵanakazi ŵanyake ŵayowoya kale vyakuti ŵawona Yesu uyo wawuskika. Kweni ŵanalume aŵa ŵakwenera kuti ŵakumugomezga yayi Mariya, nga umo ŵangulekera kugomezga ŵanakazi ŵakwamba. Mateyu 28:3-15; Mariko 16:5-8; Luka 24:4-12; Yohane 20:2-18.

▪ Wati wasanga kuti mu dindi mulije kanthu, kasi Mariya wa ku Magadala wakucita vici, ndipo ŵanakazi ŵanyake ŵakuwona vici?

▪ Kasi Petrosi na Yohane ŵakucita wuli ŵati ŵasanga kuti mu dindi mulije kanthu?

▪ Kasi ŵanakazi ŵanyake ŵara ŵakukumana na njani mu nthowa apo ŵakuluta kukaphalira ŵasambiri kuti Yesu wawuskika?

▪ Nchivici cangucitikira ŵasilikari awo ŵalindanga dindi, ndipo ŵasofi ŵakucita wuli ŵati ŵaphalirika ici?

▪ Nchivici ico cikucitika apo Mariya wa ku Magadala wali yekha pa dindi, ndipo ŵasambiri ŵakucita wuli na ivyo ŵanakazi ŵaŵaphalira?