Cipaturo 12

Yesu Wakubapatizika

PATI pajumpha myezi yinkhondi na umoza kufuma apo Yohane wakambira kupharazga, Yesu, uyo pasono wali na vilimika 30, wakwiza kwa iyo ku Yorodani. Kasi wapukwa vici? Kuzakamuwona waka? Kasi Yesu wakukhumba kuwona waka umo nchito ya Yohane yikwendera? Yayi, Yesu wakupempha Yohane kuti wamubapatize.

Yohane wakukana nyengo yeneyiyo, wakuti: “Ine ndine nkhwenera kubapatizika na imwe, sono kasi imwe mukwiza kwa ine?” Yohane wakumanya kuti mbali wake, Yesu, ni Mwana wapadera wa Ciuta. Mungakumbuka kuti Yohane wakabwalanthuka mwakukondwa apo wakaŵa mu nthumbo ya nyina, peneapo Mariya, uyo wakaŵa na nthumbo ya Yesu, wakiza kukwawo. Tikukayika yayi kuti Elizabeti, nyina wa Yohane, wali kumuphalira nkhani iyi. Ndipo wakwenera kuti wali kumuphaliraso ivyo mungelo wakayowoya vyakukhwaskana na kubabika kwa Yesu kweniso vyakuti ŵangelo ŵakawonekera ŵaliska mu usiku uwo Yesu wakababikira.

Ntheura Yesu ngwacilendo yayi kwa Yohane. Ndipo Yohane wakumanya kuti ubapatizo wake ngwakwenelera Yesu yayi. Ubapatizo wa Yohane ngwa awo ŵakupera ku zakwananga zawo, kweni Yesu walije zakwananga. Nangauli Yohane wakukana, Yesu wakulimbikira, wakuti: “Pa nyengo iyi viŵe ntheura, cifukwa mu nthowa iyi nchakwenelera kwa ise kucita cose ico nchaurunji.”

Cifukwa wuli nchakwenelera kuti Yesu wabapatizike? Cifukwa nchakuti ubapatizo wa Yesu, nchimanyikwiro cakuti wajipeleka kuti wacitenge khumbo la Ŵawiske, kuti nchimanyikwiro ca kupera ku zakwananga yayi. Yesu wacitanga nchito ya vyakukhomakhoma, kweni sono nyengo yakwana yakuti wambe uteŵeti uwo Yehova Ciuta wakamutuma kuti wazakacite pa caru capasi. Kasi mukughanaghana kuti Yohane wakukhazga kuti cinthu cinyake cacilendo cicitikenge para wakubapatiza Yesu?

Pati pajumpha nyengo, Yohane wakuyowoya kuti: “Uyo wakanituma kubapatiza na maji wakati kwa ine, ‘Yose uyo ukuwona mzimu ukukhira na kukhala pa iyo, iyo uyu ndiyo wakubapatiza na mzimu utuŵa.’” Ntheura Yohane wakukhazga kuti mzimu wa Ciuta wizenge pa yumoza wa awo wakuŵabapatiza. Ipo Yohane wakwenera kuti wakuzizwa yayi pakuwona ‘mzimu wa Ciuta ukukhira nga ni nkhunda kwiza pa Yesu’ apo wakuzuwuka mu maji.

Kweni pali vinyake ivyo vikucitika apo Yesu wakubapatizika. ‘Kucanya kukumujulikira.’ Kasi ici cikung’anamuraci? Apa cikung’anamura kuti apo Yesu wakubapatizika, wakwambaso kukumbuka ivyo wakacitanga apo wakaŵa kucanya. Ntheura sono Yesu wakukumbuka za umoyo wake apo wakaŵa mwana wauzimu wa Yehova Ciuta, na vyose ivyo Ciuta wakayowoya kwa iyo kucanya pambere wandize pa caru capasi.

Kweniso apo wakubapatizika, lizgu likufuma kucanya likuti: “Uyu ni Mwana wane, wakutemweka, mweneuyo nkhukondwa nayo.” Kasi ili ni lizgu la njani? La Yesu? Yayi! Ni lizgu la Ciuta. Uwu mbukaboni wakuti Yesu ni Mwana wa Ciuta, kuti iyo ni Ciuta yayi, nga umo ŵanji ŵakuyowoyera.

Ndipouli, Yesu ni mwana wa Ciuta, nga umo wakaŵira Adamu, munthu wakwamba. Wati walongosora vya kubapatizika kwa Yesu, msambiri Luka wakulemba kuti: “Yesu iyomwene apo wakambanga mulimo wake, wakaŵa na vilimika pafupifupi makumi ghatatu, pakuŵa mwana, umo ŵakaghanaghaniranga, wa Yosefe, mwana wa Heli, . . . mwana wa Davide, . . . mwana wa Abrahamu, . . . mwana wa Nowa, . . . mwana wa Adamu, mwana wa Ciuta.”

Nga umo Adamu wakaŵira “mwana wa Ciuta,” Yesu nayo ntheura pera. Yesu ni munthu mukuru kuluska wose awo ŵali kuŵako, ndipo tikuwona ukaboni wa fundo iyi para tikusanda umoyo wa Yesu. Ndipouli, apo Yesu wakubapatizika, wakuŵa paubwezi uphya na Ciuta, wakuŵaso Mwana wauzimu wa Ciuta. Sono vikuŵa nga kuti Ciuta wakumucemeraso kucanya, mwa kumupa nchito iyo para wamara wapelekenge umoyo wake kuŵa sembe m’malo mwa ŵanthu ŵakwananga awo ŵakeneranga kufwa. Mateyu 3:13-17; Luka 3:21-38; 1:34-36, 44; 2:10-14; Yohane 1:32-34; Ŵahebere 10:5-9.

▪ Cifukwa wuli Yesu ngwacilendo yayi kwa Yohane?

▪ Pakuti Yesu wandanangepo, cifukwa wuli wakubapatizika?

▪ Mwakuyana na ivyo Yohane wakumanya vyakukhwaskana na Yesu, cifukwa wuli wakuzizwa yayi apo mzimu wa Ciuta ukwiza pa Yesu?