Cipaturo 42

Yesu Wakucenya Ŵafarisi

YESU wakuyowoya kuti usange wakufumya viŵanda na nkhongono ya Satana, ndikuti Satana wagaŵikana. Wakulutilira kuti: “Panyake imwe mwaŵanthu, mungazgora khuni kuŵa liwemi na cipambi cake naco ciwemi panji mungazgora khuni kuŵa lakunangika na cipambi cake naco cakunangika; pakuti khuni likumanyikwa na cipambi cake.”

Nchambura mahara kuyowoya kuti cipambi ciwemi ca kufumya viŵanda, cacitika cifukwa cakuti Yesu wakuteŵetera Satana. Usange cipambi nchiwemi, khuni lingaŵa lakunangika yayi. Kweni cipambi ciheni ca Ŵafarisi, ico nkhususka Yesu kwambura vifukwa vyakupulikikwa, mbukaboni wakuti iwoŵene mbakuvunda. Yesu wakuti: “Mwa mphapu ya vipiri, mungayowoya wuli vinthu viwemi apo imwe muli ŵaheni? Pakuti mulomo ukuyowoya ivyo vili kuzara mu mtima.”

Pakuti mazgu ghithu ghakulongora umo mtima withu uliri, ivyo tikuyowoya ndivyo tikweruzgikirapo. Yesu wakuti: “Nkhumuphalirani kuti mazgu ghose ghawakawaka agho ŵanthu ŵakuyowoya, ŵazamupatawulirapo pa Zuŵa la Ceruzgo; cifukwa na mazgu ghako uzamupimika murunji, ndipo na mazgu ghako uzamususkika.”

Yesu wacita milimo yankhongono yinandi comene, kweni ŵalembi na Ŵafarisi ŵakupempha kuti: “Msambizgi, tikukhumba kuwona cimanyikwiro kufuma kwa imwe.” Nangauli ŵanalume ŵakufuma ku Yerusalemu aŵa ŵangaŵa kuti ŵandawonepo minthondwe iyo wakucita, kweni ukaboni wambura kususkika wa awo ŵakawona na maso ulipo. Ntheura Yesu wakuphalira ŵalongozgi ŵa Ŵayuda kuti: “Muwiro uheni na wauleŵi ukulutilira kupenja cimanyikwiro, ndipouli, cimanyikwiro cipelekekenge cara kwa iwo, kweni cimanyikwiro ca Yona nchimi.”

Pakulongosora ico wakung’anamura, Yesu wakulutilira kuti: “Umo Yona wakaŵira mu nthumbo ya cisomba cikuru mazuŵa ghatatu na mausiku ghatatu, ntheura pera Mwana wa munthu wazamuŵa pasi nkhanira pa caru capasi mazuŵa ghatatu na mausiku ghatatu.” Cisomba cikati camumira, Yona wakafumamo nga kuti wawuskika ku ŵakufwa, ntheura Yesu wakuyowoyerathu kuti wafwenge ndipo pa zuŵa lacitatu wawuskikenge wamoyo. Ndipouli, nangauli Yesu pamanyuma wakuwuskika nadi, ŵalongozgi ŵa Ŵayuda ŵakukana “cimanyikwiro ca Yona.”

Ntheura Yesu wakuti ŵanthu ŵa ku Nineve, awo ŵakapera apo Yona wakaŵapharazgira, ŵazamuwuka pa ceruzgo kuzakasuska Ŵayuda awo ŵakukana Yesu. Mwakuyana na fundo iyi, wakuŵaphaliraso za fumukazi ya ku Sheba, iyo yikiza kufuma ku vigoti vya caru kuzakapulika vinjeru vya Solomoni na kuzizwa pa ivyo yikawona na kupulika. Yesu wakuti: “Kweni, wonani! wakuluska Solomoni wali pano.”

Kufuma apo, Yesu wakuyowoya ntharika ya munthu uyo mwafuma mzimu waukazuzi. Ndipouli, munthu uyu wakuŵikamo vinthu viwemi yayi mwa iyo, ntheura mizimu yinyake yinkhondi na yiŵiri, yiheni comene yikumukora. Yesu wakuti: “Umu ndimo vizamuŵira na muwiro uheni uwu.” Mtundu wa Israyeli ukatozgeka ndipo ukasinthika, kuyana na umo mzimu waukazuzi ukafumira mwa munthu yura kwa nyengo yicoko waka. Kweni pakukana nchimi za Ciuta, mpaka kwimikana na Khristu, mtundu uwu ukuvumbura kuti mtima wake nguheni comene kuluska umo ukaŵira pakwamba.

Apo Yesu wakuyowoya, ŵanyina na ŵanung’una ŵake ŵafika ndipo ŵimilira pafupi na mzinda. Ntheura munthu munyake wakuti: “Wonani! Ŵanyinamwe na ŵanung’una ŵinu ŵimilira kuwaro, ŵakukhumba kuyowoya namwe.”

Yesu wakufumba kuti: “Ŵamama mbanjani, ndipo ŵanung’una ŵane mbanjani?” Pakunyoloskera woko ku ŵasambiri ŵake, wakuti: “Wona! Ŵamama na ŵakuru kweniso ŵanung’una ŵane! Pakuti yose uyo wakucita khumbo la Ŵadada awo ŵali kucanya, uyu ndiyo ni mukuru na munung’una wane, na mudumbu wane na mama wane.” Pakuyowoya nthena, Yesu wakulongora kuti nangauli wakutemwa comene ŵabali ŵake ŵakuthupi, kweni wakuzirwiska comene ubwezi uwo ulipo pakati pa iyo na ŵasambiri ŵake. Mateyu 12:33-50; Mariko 3:31-35; Luka 8:19-21.

▪ Kasi Ŵafarisi ŵakutondeka wuli kuzgora “khuni” na “cipambi” kuŵa viwemi?

▪ Kasi “cimanyikwiro ca Yona” nchivici, ndipo ŵakucikana wuli pamanyuma?

▪ Kasi mtundu wa Israyeli wa mu nyengo ya Yesu ukuyana wuli na munthu uyo mukafuma mzimu waukazuzi?

▪ Kasi Yesu wakulongora wuli kuti wakuzirwiska ubwezi uwo ulipo pakati pa iyo na ŵasambiri ŵake?