Cipaturo 92

Yesu Wakucizga Ŵavyoni Khumi pa Ulendo Waumaliro wa ku Yerusalemu

KHUMBO la Sanihedirini lakuti ŵakome Yesu latondeka, cifukwa iyo wafumako ku Yerusalemu na kuya ku msumba wa Efurayimu, mtunda wa makilomita 24 panji kujumphirapo kumpoto ca kuvuma kwa Yerusalemu. Wakukhala na ŵasambiri ŵake kwenekuko, kutali na ŵalwani ŵake.

Ndipouli, nyengo ya Paska mu 33 C.E. yili pafupi kukwana, ndipo nakalinga Yesu waliso pa ulendo. Wakujumpha mu Samariya ndiposo mu Galileya. Aka nkhaumaliro kwenda mu cigaŵa ici pambere wandafwe. Apo wali mu Galileya, iyo na ŵasambiri ŵake ŵakwenera kuti ŵakulongozgana na ŵanthu ŵanji awo ŵakuluta ku Yerusalemu ku ciphikiro ca Paska. Ŵakwendera nthowa iyo yikujumpha mu cigaŵa ca Pereya, kuvuma kwa Mlonga wa Yorodani.

Pakwamba ulendo uwu, apo Yesu wakunjira mu muzi wa Samariya panji mu Galileya, wakukumana na ŵanalume khumi awo ŵali na vyoni. Nthenda yakofya iyi, yikurya pacokopacoko viŵaro vya munthu, nga ni vigunwe vya ku mawoko na ku malundi, makutu, mphuno, ndiposo milomo. Kuti ŵanji ŵaleke kwamburako, Dango la Ciuta likulangura wavyoni kuti: “Wabenekelere mulomo wake, wacemerezge, Ndafipirwa! Ndafipirwa! Mazuŵa ghose nthenda yicali naye tiwaŵenge wakufipirwa, . . . wakhalenge pa yekha kuwaro kwa msasa.”

Ŵavyoni khumi aŵa ŵakusungilira Dango ili ndipo ŵakhala patali na Yesu. Kweni ŵakucemerezga na lizgu likuru kuti: “Yesu, Msambizgi, muŵe nase na cisungusungu!”

Pakuŵawona patali, Yesu wakulangura kuti: “Lutani ndipo mukajilongore mwaŵene ku ŵasofi.” Yesu wakuyowoya nthena cifukwa cakuti Dango la Ciuta likuŵapa mazaza ŵasofi kupharazga kuti ŵavyoni ŵacira ku ulwari wawo. Para ŵacita nthena, ŵavyoni aŵa ŵakuzomerezgeka kukhalaso pamoza na ŵanthu ŵanyake.

Ŵavyoni khumi aŵa ŵali na cigomezgo kuti Yesu wali na nkhongono zakucitira minthondwe. Ntheura ŵakucimbira kukakumana na ŵasofi nangauli ŵacali ŵandacizgike. Ŵacali mu nthowa, ŵakutumbikika cifukwa ca cipulikano cawo mwa Yesu. Ŵakwamba kuwona na kujipulika kuti ŵacira.

Ŵanthu ŵankhondi na ŵanayi awo ŵacizgika ku nthenda ya vyoni ŵakulutilira, kweni wavyoni yumoza uyo ni Musamariya wakuwelera kukapenja Yesu. Cifukwa wuli? Cifukwa cakuti ngwakuwonga comene pa ivyo vyamucitikira. Wakulumba Ciuta na mazgu ghakuru, ndipo wati wamusanga Yesu, wakujikama na kumuwonga.

Yesu wakuti: “Asi awo ŵatozgeka ŵanguŵapo khumi? Ipo ŵanyake ŵankhondi na ŵanayi ŵali nkhu? Kasi nanga njumoza wandasangike uyo wawelera kuti wazakapeleke ucindami kwa Ciuta, kweni munthu uyu mbwenu wa mtundu unyake?”

Ndipo wakuphalira Musamariya uyu kuti: “Wuka ndipo lutanga; cipulikano cako cakucizga.”

Apo tikuŵazga umo Yesu wakucizgira ŵavyoni khumi, tikwenera kusambirapo kanthu pa fumbo ilo wakafumba lakuti: “Ipo ŵanyake ŵankhondi na ŵanayi ŵali nkhu?” Mtima wambura kuwonga uwo ŵanthu ŵankhondi na ŵanayi aŵa ŵalongora, nguheni comene. Kasi ise, nga ni Musamariya, tilongorenge kuti tikuwonga pa vinthu vyose ivyo tikupokera kufuma kwa Ciuta, nga ni layizgo la umoyo wamuyirayira mu caru ciphya caurunji ca Ciuta? Yohane 11:54, 55; Luka 17:11-19; Leviticus 13:16, 17, 45, 46; Uvumbuzi 21:3, 4.

▪ Kasi Yesu wakutondeska wuli khumbo la Sanihedirini lakuti ŵamukome?

▪ Ni nkhu uko Yesu wakuluta kufuma apa, ndipo wakuyaso nkhu?

▪ Cifukwa wuli ŵavyoni ŵakwimilira patali, ndipo cifukwa wuli Yesu wakuŵaphalira kuti ŵalute ku ŵasofi?

▪ Kasi pa cakucitika ici tikusambirapo vici?