Cipaturo 109

Yesu Wakucombora Awo Ŵakumususka

YESU watindika ŵalongozgi ŵa cisopa awo ŵakumususka mwakuti ŵakopa kumufumbaso kanthu kanyake. Ntheura wakwamba ndiyo kuvumbura ulemwa wawo. Wakufumba kuti: “Kasi mukughanaghana wuli vya Khristu? Kasi iyo ni mwana wa njani?”

Ŵafarisi ŵakuzgora kuti: “Wa Davide.”

Nangauli Yesu wakukana yayi kuti Davide ni sekuru wa Khristu, panji kuti Mesiya, iyo wakufumba kuti: “Ipo vili wuli kuti Davide mwakuciskika na mzimu [pa Salmo 110] wakumucema iyo ‘Fumu,’ wakuti, ‘Yehova wakati ku Fumu yane: “Khala ku woko lane lamalyero, mpaka niŵike ŵalwani ŵako kusi ku malundi ghako”’? Ntheura, usange Davide wakumucema ‘Fumu,’ ipo ni mwana wake wuli?”

Ŵafarisi ŵakhala cete, pakuti ŵakumumanya makora yayi Khristu, panji kuti wakuphakazgika. Mesiya ni mwana waka wa Davide yayi, nga umo Ŵafarisi ŵakugomezgera, kweni wakaŵako kucanya ndipo wakaŵa mulara kwa Davide, panji kuti wakaŵa Fumu ya Davide.

Sono pakung’anamukira ku mizinda na ku ŵasambiri ŵake, Yesu wakuŵacenjezga za ŵalembi na Ŵafarisi. Pakuti aŵa ŵakusambizga Dango la Ciuta, ndipo “ŵajikhazika pa citengo ca Mozesi,” Yesu wakuciska kuti: “Vinthu vyose ivyo ŵakumuphalirani, citani na kusungilira.” Kweni wakusazgirapo kuti: “Mungacitanga mwakuyana na milimo yawo cara, pakuti ŵakuyowoya kweni ŵakucita cara.”

Mbapusikizgi, ndipo Yesu wakuŵacombora nga umo wakacitira apo wakaryanga cakurya mu nyumba ya Mufarisi myezi iyo yajumpha. Iyo wakuti: “Milimo yose iyo ŵakucita, ŵakucita kuti ŵawoneke na ŵanthu.” Ndipo wakuyowoya viyelezgero, wakuti:

“Ŵakusanuzga tuvibiliti twakuŵikamo malemba uto ŵakuvwara nga nchivikiliro.” Mu tuvibiliti tucoko utu, uto ŵakuvwara pa cisko panji pa woko, muli vigaŵa vinayi vya Dango, ivyo ni: Exodus 13:1-10, 11-16; na Duteronome 6:4-9; 11:13-21. Kweni Ŵafarisi ŵakusanuzga tuvibiliti utu kuti ŵanthu ŵatenge mbamwamphu pa Dango.

Yesu wakulutizga kuti “ŵakukuzga mphonje za malaya ghawo.” Pa Maŵazgo 15:38-40, Ŵaisrayeli ŵakulangulika kusona mphonje ku malaya ghawo, kweni Ŵafarisi ŵakusonako mphonje zikuru kuluska za waliyose. Ŵakucita vyose ivi kuti ŵanthu ŵaŵawone. Yesu wakuti: “Ŵakutemwa malo ghakuzirwa comene.”

Cacitima nchakuti ŵasambiri ŵake nawo ŵakudokera malo ghakuzirwa. Ntheura wakuŵaphalira kuti: “Kweni imwe, kucemeka Rabi cara, pakuti msambizgi winu njumoza, peneapo imwe mose muli ŵabali. Kweniso, kucema munthu waliyose kuti wiskemwe cara pa caru capasi, pakuti Wiskemwe njumoza, wa kucanya. Nesi kucemeka ‘ŵalongozgi,’ pakuti Mulongozgi winu njumoza, Khristu.” Ŵasambiri ŵakwenera kuwuskamo khumbo lakuti ŵaŵenge ŵakwamba mu maghanoghano ghawo. Yesu wakuŵaciska kuti: “Mukuru comene pakati pinu wakwenera kuŵa muteŵeti winu.”

Kufuma apo, Yesu wakupharazga masoka pa ŵalembi na Ŵafarisi, wakuŵacema ŵapusikizgi mwakuwerezgawerezga. Wakuyowoya kuti ‘ŵakujalira ŵanthu ufumu wa kucanya,’ ndiposo “ŵakumilimitizga nyumba za vyokoro ndipo pakukhumba kujilongora, ŵakuyowoya malurombo ghatali.”

Yesu wakuti: “Soka kwa imwe, ŵalongozgi ŵacibulumutira.” Wakususka Ŵafarisi cifukwa cakuti ŵakuleka kuŵikako mahara ku vinthu vyauzimu, lekani ŵakutondeka kupambaniska makora vinthu. Mwaciyelezgero, ŵakuti, ‘Usange munthu wakujilapizga na tempele nkhanthu yayi, kweni munthu wakwenera kufiska cilapo usange wajilapizga na golide la tempele.’ Pakuŵika comene mtima pa golide la tempele kuluska vinthu vyauzimu vya malo ghakusoperapo agha, ŵakuvumbura kuti mbacibulumutira mu kacitiro ka vinthu.

Ndipo nga umo wakacitira nyengo yinyake, Yesu wakususka Ŵafarisi cifukwa ca kusulako “vinthu vyakuzirwa vya Dango, ivyo ni urunji na cisungusungu na cipulikano” peneapo ŵakuŵika mtima pa kupeleka cakhumi ca twakumera tucokotucoko.

Yesu wakucema Ŵafarisi kuti “ŵalongozgi ŵacibulumutira, awo ŵakusuja skuwuwu kweni ŵakumira ngamila!” Ŵakusuja skuwuwu ku vinyo lawo cifukwa cakuti nthumembe waka yayi kweni cifukwa cakuti nthwakufipirwa mwakuyana na dango. Ndipouli, pakuti ŵakusulako vinthu vyakuzirwa vya Dango vikuyana waka na kumira ngamila, iyo nayoso njakufipirwa mwakuyana na dango. Mateyu 22:41–23:24; Mariko 12:35-40; Luka 20:41-47; Leviticus 11:4, 21-24.

▪ Cifukwa wuli Ŵafarisi ŵakhala cete apo Yesu wakuŵafumba za ivyo Davide wakayowoya pa Salmo 110?

▪ Cifukwa wuli Ŵafarisi ŵakusanuzga tuvibiliti twakuŵikamo Malemba na kukuzga mphonje za malaya ghawo?

▪ Kasi Yesu wakuŵaphalira fundo wuli ŵasambiri ŵake?

▪ Kasi Ŵafarisi ŵakutondeka wuli kupambaniska makora vinthu, ndipo Yesu wakuŵasuska wuli cifukwa ca kusulako vinthu vyakuzirwa?