Cipaturo 82

Yesu Wakulazgaso ku Yerusalemu

MWALUŴIRO Yesu waliso pa ulendo, wakusambizga msumba na msumba ndiposo muzi na muzi. Wakwenera kuti wali mu cigaŵa ca Pereya, sirya linyake la Mlonga wa Yorodani kufuma ku Yudeya. Kweni ulendo wake ngwakuya ku Yerusalemu.

Panji cifukwa ca cisambizgo ca Ŵayuda cakuti ŵanthu ŵacoko ndiwo ŵazamwenelera ciponosko, munthu yunji wakufumba kuti: “Fumu, kasi awo ŵakuponoskeka mbacoko waka?” Cifukwa ca ivyo Yesu wakuzgora, ŵanthu ŵakughanaghanira ico cikukhumbikwa kuti munthu waponoskeke. Iyo wakuti: “Limbalimbani [ndiko kuti, pilipitani, panji kuti phapatizgani] comene kunjira pa mulyango ufinyi.”

Ivi vikwenera kucitika luŵiro, pakuti Yesu wakulutilira kuti: “Cifukwa ŵanandi, . . . ŵazamukhumba kunjiramo kweni ŵazamutondeka.” Cifukwa wuli ŵazamutondeka? Iyo wakulongosora kuti ‘malinga mwenenyumba wiza waka na kujara cijaro ndipo ŵanthu ŵakwimilira kuwaro na kukhung’uska kuti “Dada, tijulirani,” iyo wazamuti: “Nkhumanya cara uko mwafuma. Fumaniko kwa ine, mose imwe ŵakucita ubendezi!”’

Vikuwoneka kuti awo ŵakujalirika kuwaro ŵakwiza pa nyengo yawo. Kweni nyengo iyo ŵakwizira ndikuti mulyango wajalika kale ndipo ŵakiyako. Ŵatendekerenge kwiza mphanyi ŵangunjira, nangauli mphanyi yanguŵa nyengo yiwemi yayi kwa iwo. Nadi, vinthu vyacitima vikulindilira awo kusopa Yehova nchinthu cakwamba yayi mu umoyo wawo.

Ŵayuda awo Yesu wali kutumikako kuŵateŵetera, ŵatondeka kuwupokelera mwaŵi wapadera uwo Ciuta waŵapa kuti ŵazakaponoskeke. Ntheura Yesu wakuti ŵazamulira na kuska mino para ŵaponyeka kuwaro. Kweni ŵanthu ŵakufuma ku “vigaŵa vyakuvuma na vyakuzambwe, ndiposo kufuma kumpoto na kumwera,” enya, kufuma ku mitundu yose, “ŵazamukhala pa thebulu mu ufumu wa Ciuta.”

Yesu wakulutilira kuti: “Pali awo mbaumaliro [ŵanthu ŵa mitundu yinyake na Ŵayuda ŵakuyuzgika] ŵeneawo ŵazamuŵa ŵakwamba, ndipo pali awo mbakwamba [Ŵayuda ŵasambazi na ŵakutemweka mu cisopa] ŵeneawo ŵazamuŵa ŵaumaliro.” Ŵanthu ŵakata aŵa na ŵambura kuwonga ŵazamuŵa ŵaumaliro mu fundo yakuti ŵazamuŵamo yayi mu Ufumu wa Ciuta.

Sono Ŵafarisi ŵakwiza kwa Yesu na kuyowoya kuti: “Fumanimo muno ndipo lutaninge, cifukwa Herode [Antipasi] wakukhumba kumukomani.” Vingacitika kuti Herode iyomwene ndiyo wakambiska nkhani iyi kuti Yesu wafumemo mu cigaŵa ici. Panji Herode wakopa kuti wangakhwaskikaso pakukoma nchimi yinyake ya Ciuta nga umo vikaŵira apo Yohane Mbapatizi wakakomekanga. Kweni Yesu wakuphalira Ŵafarisi kuti: “Lutani ndipo mukamuphalire kambwe yura kuti, ‘Wona! nkhufumiska viŵanda na kufiska kucizga muhanya uno kweniso macero, ndipo zuŵa lacitatu nizamuŵa kuti namara.’”

Wati wamalizga mulimo wake kura, Yesu wakulutilira na ulendo wake wa ku Yerusalemu cifukwa nga umo mweneco wakulongosolera, “nchambura kuzomerezgeka kuti nchimi yikomekere kuwaro kwa Yerusalemu.” Cifukwa wuli Yesu wakulindizgika kukakomekera ku Yerusalemu? Cifukwa cakuti Yerusalemu ni msumba ukuru, uko kuli khoti likuru la Sanihedirini la ŵanthu 71, kweniso uko sembe za nyama zikupelekekera. Ntheura cingaŵa cambura kuzomerezgeka kuti “Mwanamberere wa Ciuta” wakomekere ku malo ghanyake padera pa Yerusalemu.

Yesu wakutengera wakuti: “Yerusalemu, Yerusalemu, wakukoma zinchimi na wakudinya na malibwe awo ŵakatumika kwa iyo! Kanandi waka nkhakhumbanga kuwunganya ŵana ŵako pamoza, mwakuyana na umo nyatazi wakuwunganyira twana twake pamoza kusi ku mapapindo ghake, kweni imwe mwaŵanthu mukakhumba cara! Wonani! Nyumba yinu yajowoleka kwa imwe.” Mtundu uwu uli pa soka cifukwa ca kukana Mwana wa Ciuta.

Apo Yesu wakulutilira kuya ku Yerusalemu, wakucemeka ku nyumba ya muwusi wa Ŵafarisi. Ni Sabata, ndipo ŵanthu ŵakumulaŵisiska comene, pakuti muli munthu uyo wakulwara nthenda ya mburu, nthenda iyo munthu wakuzura maji mu mawoko na malundi. Yesu wakuyowoya na Ŵafarisi ndiposo ŵakumanya Dango awo ŵalipo, wakufumba kuti: “Kasi nchakuzomerezgeka pa sabata kucizga panji cara?”

Palije uyo wakuyowoyapo. Ntheura Yesu wakucizga munthu uyu na kumuphalira kuti walutenge. Ndipo wakufumba kuti: “Ni njani wa imwe, usange mwana wake panji nkhambako yake yawa mu cisimi, walekenge kuyifumiska nyengo yeneyiyo pa zuŵa la sabata?” Palijeso nanga njumoza wakumuzgora. Luka 13:22–14:6; Yohane 1:29.

▪ Kasi Yesu wakulongora kuti nchivici cikukhumbikwa kuti munthu waponoskeke, ndipo cifukwa wuli ŵanandi ŵakujalirika kuwaro?

▪ Kasi “ŵakwamba” awo ŵakuŵa ŵaumaliro mbanjani, ndiposo “ŵaumaliro” awo ŵakuŵa ŵakwamba?

▪ Kasi mazgu ghakuti Herode wakukhumba kukoma Yesu ghakwenera kuti ghakayowoyeka cifukwa ca vici?

▪ Cifukwa wuli nchambura kuzomerezgeka kuti nchimi yikomekere kuwaro kwa Yerusalemu?