Cipaturo 110

Yesu Wakumalizga Uteŵeti wa pa Tempele

YESU wakuwoneka kaumaliro pa tempele. Nakuti wakumalizga uteŵeti wake wa pa caru capasi, ndipo kwakhala kuti wayezgeke na kukomeka. Kwakhala mazuŵa ghatatu kuti ivi vicitike. Sono wakulutizga kucombora ŵalembi na Ŵafarisi.

Wakuyowoyaso katatu kuti: “Soka kwa imwe, ŵalembi na Ŵafarisi, ŵapusikizgi!” Cakwamba, wakupharazga soka pa iwo cifukwa ŵakusuka “kuwaro kwa nkhombo na mbale, kweni mukati ni vyakuzura na vyakupoka na kujumphizga mu vyakucita.” Ntheura wakuti: “Suka dankha mukati mwa nkhombo na mbale, mwakuti kuwaro kwake nako kuŵe kwakutowa.”

Kufuma apo, wakupharazga soka pa ŵalembi na Ŵafarisi cifukwa cakuti mbakuvunda mukati, ndipo ŵakujibisa mwa kujilongora nga mbarunji. Iyo wakuti: “Mukukozgana na madindi ghakuphakika utoto utuŵa, agho kuwaro ghakuwoneka ghakutowa nadi, kweni mukati ngakuzura na viwangwa vya ŵanthu ŵakufwa na mtundu uliwose wa ukazuzi.”

Caumaliro, ŵakulongora kuti mbapusikizgi pakukhumbisiska kuzenga madindi gha zinchimi na kughatozga mwakuti ŵalongore kuti ŵakucita milimo yiwemi. Kweni nga umo Yesu wakuvumbulira, iwo mbana “ŵa awo ŵakakoma zinchimi.” Nadi, waliyose uyo wakuvumbulira dala upusikizgi wawo wakupenja nyifwa.

Pakulutilira, Yesu wakuŵacombora na mazgu ghakomi. Wakuti: “Zinjoka, mphapu za vipiri, kasi muzamucimbira wuli ceruzgo ca Gehena?” Gehena ni malo ghakutayako viswaswa vya mu Yerusalemu. Ntheura Yesu wakuti cifukwa ca uheni wawo, ŵalembi na Ŵafarisi ŵazamuparanyika kwamuyirayira.

Pakuyowoya za awo wakuŵatuma nga mbimiliri ŵake, Yesu wakuti: “Ŵanji ŵa iwo muŵakomenge na kuŵapayika, ndipo ŵanji ŵa iwo muŵathyapulenge mu masunagoge ghinu na kuŵatambuzga mu msumba na msumba; mwakuti zize pa imwe ndopa zose za ŵarunji izo zathiskika pa caru capasi, kufuma ku ndopa za Abelu murunji mpaka ku ndopa za Zekariya mwana wa Barakiya [uyo wakucemeka Yehoyada mu buku Laciŵiri la Midauko], mweneuyo mukamukomera pakati pa malo ghakupatulika na jochero. Nadi pano nkhumuphalirani, Vinthu vyose ivi vizamwiza pa muwiro uwu.”

Cifukwa cakuti Zekariya wakasuska ŵalongozgi ŵa Israyeli, iwo “ŵakamucitira ciŵembu, ndipo na languro la themba ŵakamubwanya na mawe mu bwalo la nyumba ya Yehova.” Kweni nga umo Yesu wakuyowoyera, Israyeli walangikenge cifukwa ca ndopa zose za ŵarunji izo zili kuthiskika. Cilango ici cikucitika pati pajumpha vilimika 37, mu 70 C.E., apo ŵasilikari ŵa Ŵaroma ŵakubwangandura Yerusalemu ndipo Ŵayuda ŵakujumpha miliyoni yimoza ŵakukomeka.

Apo Yesu wakughanaghanira cinthu cakofya ici, wakukweŵeka. Wakuwerezgapo kupharazga kuti: “Yerusalemu, Yerusalemu, wakukoma zinchimi na wakudinya na malibwe awo ŵakatumika kwa iyo! Kanandi waka nkhakhumbanga kuwunganya ŵana ŵako pamoza, nga ni umo nyatazi wakuwunganyira twana twake pamoza kusi ku mapapindo ghake! Kweni imwe mwaŵanthu mukakhumba cara. Wonani! Nyumba yinu yajowoleka kwa imwe.”

Ndipo Yesu wakusazgirapo kuti: “Kufuma sono muzamuniwonaso cara mpaka muzakayowoye kuti, ‘Ngwakutumbikika uyo wakwiza mu zina la Yehova!’” Zuŵa ili lizenge pa kuŵapo kwa Khristu mu Ufumu wake wakucanya ndipo ŵanthu ŵazamumuwona na maso gha cipulikano.

Sono Yesu wakuluta pa malo ghanyake apo wangawona makora ivyo ŵakuponyamo vyakupeleka mu tempele ndipo wakuwona mizinda yikuponyamo ndalama. Ŵasambazi ŵakuponyamo ndalama zinandi. Kweni cokoro cikavu cikwiza na kuponyamo tundalama tuŵiri twakuzirwa pacoko.

Wati wacema ŵasambiri ŵake, Yesu wakuti: “Nadi pano nkhumuphalirani kuti cokoro cikavu ici caponyamo zinandi kuluska wose awo ŵakuponya ndalama mu vyakuponyamo vyakupeleka.” Iwo ŵakwenera kuti ŵakuzizwa kuti vingacitika wuli. Ntheura Yesu wakulongosora kuti: “Wose ŵaponyamo kufuma pa uzali wa usambazi wawo, kweni ico, mu kusoŵerwa kwake, caponyamo vyose ivyo cikaŵa navyo, vyose ivyo cikenera kulereka navyo.” Wati wayowoya vinthu ivi, Yesu wakufumako ku tempele kaumaliro.

Pakuzizwa na ukuru ndiposo kutowa kwa tempele, ŵasambiri ŵake ŵakuti: “Msambizgi, wonani! mtundu wa malibwe na mtundu wa nyumba!” Nadi, malipoti ghakulongora kuti malibwe agha nga mamita 11 mu utali, mamita ghankhondi mu usani, ndiposo gha msinkhu mamita ghatatu.

Yesu wakuzgora kuti: “Kasi ukuziwona nyumba zapacanya izi? Lizamulekekapo cara pano libwe pa libwe linyake kwambura kuponyeka pasi.”

Wati wayowoya vinthu ivi, Yesu na ŵapositole ŵake ŵakwambuka Dambo la Kidroni na kukwera Lupiri lwa Maolive. Pa lupiri ulu, tempele ilo ndakutowa comene likuwoneka makora. Mateyu 23:25–24:3; Mariko 12:41–13:3; Luka 21:1-6; 2 Midauko 24:20-22.

▪ Kasi Yesu wakucita vici pa ulendo wake waumaliro wa ku tempele?

▪ Kasi ŵalembi na Ŵafarisi ŵakuwoneka wuli kuti mbapusikizgi?

▪ Kasi “ceruzgo ca Gehena” cikung’anamuraci?

▪ Cifukwa wuli Yesu wakuti cokoro capeleka ndalama zinandi kuluska ŵasambazi?