Cipaturo 133

Yesu Wakumalizga Vyose Ivyo Ciuta Wakamutuma

CIZAMUŴA cakukondweska comene para Fumu ya Nkhondo, Yesu Khristu, yazakawuskapo Satana na caru cake cambura urunji. Para ivi vyacitika, Muwuso wa Yesu wa Vilimika Cikwi, uwo ngwamtende, uzamwamba.

Mwakulongozgeka na Yesu ndiposo mafumu agho ghazamuwusa nayo, awo ŵazamupona pa Haramagedoni ŵazamunozga vinthu ivyo vizamunangika pa nkhondo yaurunji iyi. Ŵanthu awo ŵazamupona ŵakwenera kuti ŵazamubaba ŵana kwa kanyengo, ndipo aŵa nawo ŵazamukondwa na mulimo wa kunozga caru capasi kuŵa munda wakutowa comene.

Pa nyengo iyi, Yesu wazamuwuska ŵanthu mamiliyoni ghanandi kufuma ku malaro kuti ŵasangwe na Paradiso wakutowa uyu. Wazamucita ivi pakufiska mazgu ghake ghakugomezgeka ghakuti: ‘Ora likwiza mu leneilo wose awo ŵali mu malaro gha cikumbusko ŵazamufumira kuwaro.’

Pakati pa ŵanthu awo ŵazamuwuskika pazamuŵa munthu uyo wakacitanga viheni, mweneuyo wakafwira pamoza na iyo pa khuni lakusuzgikirapo. Kumbukani kuti Yesu wakamulayizga kuti: “Nadi pano nkhukuphalira muhanya uno, Uzamuŵa na ine mu Paradiso.” Munthu uyu kuti wazamutolekera kucanya kukawusa nga ni fumu lumoza na Yesu yayi, nesi kuti Yesu wazamuzgokaso munthu na kukhala na iyo mu Paradiso pa caru capasi. M’malo mwake, Yesu wazamuŵa na munthu uyu mu fundo yakuti wazamumuwuska ku ŵakufwa kuti wazakaŵeso na umoyo mu Paradiso, na kuwoneseska kuti wakupokera vyose ivyo wazamukhumbikwira, vyathupi na vyauzimu, nga umo cithuzithuzi ico cili pa peji lakulondezgapo cikulongolera.

Wonani fundo iyi. Pakuti Yesu wazamuŵalaŵiliranga mwacitemwa, ŵanthu wose awo ŵazamupona pa Haramagedoni, ŵana ŵawo, ndiposo ŵanthu ŵakupulikira mamiliyoni ghanandi awo ŵazamuwuskika ku ŵakufwa, ŵazamuzgoka ŵakufikapo. Kwizira mu Mwana wake, Yesu Khristu, Yehova wazamukhala pamoza na ŵanthu mwauzimu. Ndipo nga umo lizgu lakufuma kucanya ilo Yohane wakapulika likuyowoyera, “wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara.” Pa caru capasi pazamuŵavya munthu uyo wazamusuzgika panji kulwara.

Paumaliro wa Muwuso wa Yesu wa Vilimika Cikwi, vinthu vizamuŵa nga umo Ciuta wakakhumbiranga pakwamba, apo wakaphalira ŵanthu ŵakwamba, Adamu na Eva, kuti ŵandane na kuzuzga caru. Enya, caru cizamuzura na ŵanthu ŵarunji ŵakufikapo. Vizamuŵa ntheura cifukwa cakuti waliyose wazamuŵa kuti wasanga candulo na sembe yakuwombora ya Yesu. Nyifwa iyo yikiza cifukwa ca kwananga kwa Adamu yizamuŵakoso yayi.

Ntheura Yesu wazamuŵa kuti wafiska vyose ivyo Yehova wakamutuma kuti wacite. Pa cifukwa ici, paumaliro wa vilimika cikwi, Yesu wazamupeleka Ufumu na ŵanthu ŵakufikapo ku Ŵawiske. Kufuma apo, Ciuta wazamufwatura Satana na viŵanda vyake kufuma ku cizongwe, ico cikung’anamura kuleka kucita cilicose nga ni para mbakufwa. Cifukwa wuli wazamuŵafwatura?

Paumaliro wa vilimika cikwi, ŵanthu ŵanandi awo ŵazamuŵa mu Paradiso ŵazamuŵa awo ŵakawuskika ndipo cipulikano cawo cindayezgekepo. Pambere ŵandafwe, ŵakaghamanyanga yayi malayizgo gha Ciuta, ntheura ŵakalongora yayi cipulikano cawo mwa igho. Ŵati ŵawuskika na kusambizgika unenesko wa mu Baibolo, cikaŵa cipusu kwa iwo mu Paradiso kuteŵetera Ciuta, cifukwa mukaŵavya wakuŵasuska. Kweni para Satana wangapika mwaŵi kuti waŵalekeske kuteŵetera Ciuta, kasi ŵalongorenge kuti mbakugomezgeka? Kuti fumbo ili lizgoreke Satana wazamufwatulika.

Uvumbuzi wakupelekeka kwa Yohane ukuvumbura kuti para Muwuso wa Yesu wa Vilimika Cikwi wamara, Satana wazamupuluska ŵanthu ŵanandiko kuti ŵaleke kuteŵetera Ciuta. Para ciyezgo caumaliro camara, Satana, viŵanda vyake na wose awo wazamuŵapuluska ŵazamuparanyika muyirayira. Kweni ŵakugomezgeka awo ŵazamupona, ŵati ŵayezgeka fikepo, ŵazamuŵa ŵamoyo na kusangwa na vitumbiko vyakufuma kwa Dada wawo wakucanya muyirayira wose.

Nadi, Yesu wacita mulimo wakuzirwa ndipo walutilirenge kucita ntheura pakufiska khumbo laucindami la Ciuta. Tizamusangwa na vinthu viwemi comene munthazi cifukwa ca vyose ivyo Yesu wakufiska pakuŵa Themba la Ciuta lakucanya. Ndipouli, tingaluwa yayi ivyo wakacita apo wakaŵa munthu.

Yesu wakakondwa kwiza pa caru capasi na kutisambizga vya Ŵawiske. Apa pera yayi, wakalongora wunthu uwemi comene uwo Ciuta wali nawo. Tikukhozgeka comene mu mitima yithu para tikughanaghanira cikanga cake na kukhwima mtima, vinjeru vyake vyapadera, luso lwake lwapadera nga msambizgi, udangiliri wake wambura wofi, ndiposo mtima wake waciwuravi na kulengera ŵanji citima. Nadi, mitima yithu yikukhuŵilizgika kumuwonga para tikukumbuka umo wakasuzgikira na vinthu vyambura mayowoyeko apo wakapelekanga ciwombolero, ceneico ni nthowa yimoza pera iyo ise tingasangira umoyo.

Pakusambira za umoyo wa Yesu, tawona kuti wakaŵa munthu wapadera nadi. Nadi, munthu uyu wakaŵa mukuru na wakuzizwiska. Nase tikuciskika kuyowoya mazgu agho kazembe wa Ŵaroma Pontiyo Pilato wakayowoya, ghakuti: “Wonani! Munthu uyu!” Enya, “munthu uyu,” mukuru comene kuluska waliyose uyo wali kuŵako.

Para tingazomera sembe yake yakuwombora iyo watipa, tingawuskako uzito wa kwananga na nyifwa ivyo tili kuhara kwa Adamu, ndipo Yesu wangaŵa “Dada [withu] Wamuyirayira.” Wose awo ŵakukhumba kuzakasanga umoyo wamuyirayira ŵakwenera kumanya Ciuta na Mwana wake, Yesu Khristu. Mphanyi mwamanya vinthu vyakupa umoyo ivi apo mukuŵazga na kusambira buku ili. 1 Yohane 2:17; 1:7; Yohane 5:28, 29; 3:16; 17:3; 19:5; Luka 23:43; Genesis 1:28; 1 Ŵakorinte 15:24-28; Uvumbuzi 20:1-3, 6-10; 21:3, 4; Yesaya 9:6.

▪ Kasi awo ŵazamupona pa Haramagedoni pamoza na ŵana ŵawo ŵazamuŵa na mwaŵi kucita vici?

▪ Kasi mbanjani awo ŵazamuŵaso mu Paradiso padera pa awo ŵazamupona pa Haramagedoni na ŵana ŵawo, ndipo Yesu wazamuŵa nawo mu fundo wuli?

▪ Kasi vinthu vizamuŵa wuli paumaliro wa vilimika cikwi, ndipo Yesu wazamucita vici pa nyengo iyo?

▪ Cifukwa wuli Satana wazamufwatulika ku cizongwe, ndipo paumaliro nchivici cizamucitika kwa iyo na wose awo ŵazamumulondezga?

▪ Kasi Yesu wangaŵa wuli “Dada [withu] Wamuyirayira”?