Cipaturo 37

Yesu Wakumazga Citima ca Cokoro

NYENGO yicoko waka Yesu wati wacizga muteŵeti wa mulara wa ŵasilikari, wakunyamuka kuya ku Nayini, msumba uwo uli pa mtunda wakujumpha makilomita 32 kumwera ca kuzambwe kwa Kaperenaumu. Ŵasambiri ŵake na mzinda ukuru ŵakulongozgana nayo. Yikwenera kuti ni nyengo ya mise apo ŵakufika kufupi na Nayini. Kwenekura, ŵakukumana na ŵanthu ŵa nyifwa. Ŵayegha citanda ndipo ŵakuluta naco kukasunga kuwaro kwa msumba. Uyo wafwa ni munyamata.

Nyina wa munyamata uyu citima cakoma comene, pakuti ni cokoro ndiposo uyu wanguŵa mwana yekha uyo wanguŵa nayo. Mfumu wake wakati wafwa, wakapembuzgikanga pakumanya kuti wali na mwana. Iyo wakagomezganga kuti mwana uyu ndiyo wamovwirenge pa vyose ivyo wakukhumba. Kweni sono palije uyo wangamupembuzga. Wali na citima cikuru comene apo ŵanthu ŵa mu msumba ŵakumupelekezga pakuluta ku malaro.

Yesu wati wamuwona mama uyu, citima camukora comene. Ntheura mwalusungu ndiposo mwakusimikizga, wakuphalira mama uyu kuti: “Leka kulira.” Mzinda ukuzizikika na ivyo wayowoya. Ntheura apo wakusendelera pafupi na kukhwaska macira agho ŵayeghapo citanda, ŵakunyamura ŵakwimilira. Wose ŵakwenera kuti ŵakujifumba ico Yesu wakukhumba kucita.

Mbunenesko kuti awo ŵakwenda na Yesu ŵali kumuwonapo kuti wakucizga ŵanthu ŵanandi mwamunthondwe. Kweni ŵakwenera kuti ŵandamuwonepo kuti wakuwuska munthu wakufwa. Kasi wangawuska munthu wakufwa? Yesu wakulangura citanda, wakuti: “Munyamata, nkhukuphalira, Wuka!” Ndipo munyamata wakukhazikika! Wakwamba kuyowoya, ndipo Yesu wakumupeleka kwa nyina.

Ŵanthu ŵati ŵawona kuti munyamata ngwamoyo nadi, ŵakwamba kuyowoya kuti: “Nchimi yikuru yawuskika pakati pithu.” Ŵanji ŵakuti: “Ciuta wazgokera ku ŵanthu ŵake.” Mwaluŵiro nkhani ya cakuzizwiska ici yikuthandazgika mu Yudeya mose na caru cose cakuzingilizga.

Yohane Mbapatizi wacali mu jele, ndipo wakukhumba kumanya vinandi vyakukhwaskana na milimo iyo Yesu wakucita. Ŵasambiri ŵake ŵakumuphalira za minthondwe iyi. Kasi Yohane wakucita wuli? Luka 7:11-18.

▪ Kasi nchivici cikucitika apo Yesu wakufika kufupi na Nayini?

▪ Kasi ivyo Yesu wakuwona vikumukhwaska wuli, ndipo wakucita vici?

▪ Kasi ŵanthu ŵakucita wuli ŵati ŵawona munthondwe uwo Yesu wacita?