Cipaturo 99

Yesu Wakusambizga ku Yeriko

MWALUŴIRO Yesu na mizinda iyo yikwenda nayo ŵakufika ku Yeriko, msumba uwo uli pa mtunda wa zuŵa limoza kufuma ku Yerusalemu. Yeriko wali na misumba yiŵiri, wakale Waciyuda uwo uli pa mtunda wa kilomita yimoza na hafu kufuma ku Waciroma uwo nguphya. Apo mizinda yikufuma mu msumba wakale na kusendelera ku uphya, ŵanthu ŵaŵiri ŵacibulumutira awo mbakupempheska ŵakupulika ciwawa. Yumoza wawo zina lake ni Batimeyu.

Pakumanya kuti ni Yesu wakujumpha, Batimeyu na munyake ŵakwamba kucemerezga kuti: “Fumu, muŵe nase na cisungusungu, Mwana wa Davide!” Apo mzinda ukuŵaphalira mwaukali kuti ŵakhale cete, iwo ndipo ŵakucemerezga comene, ŵakuti: “Fumu, muŵe nase na cisungusungu, Mwana wa Davide!”

Pakupulika ciwawa, Yesu wakwimilira. Wakuphalira awo ŵakwenda nayo kuti ŵaceme awo ŵakucemerezga. Ŵakuluta kwa ŵacibulumutira na kuphalira yumoza wawo kuti: “Khwima mtima, wuka, wakukucema.” Mwakukondwa, munthu wacibulumutira uyu wakutaya pasi laya lake lakuwaro na kudukira mcanya, na kuluta kwa Yesu.

Yesu wakufumba kuti: “Kasi ukukhumba kuti nikucitire vici?”

Ŵacibulumutira ŵaŵiri aŵa ŵakuzgora kuti: “Fumu, maso ghithu ghabanuke.”

Pakuŵalengera lusungu, Yesu wakukora maso ghawo. Mwakuyana na umo Mariko wali kulembera, Yesu wakuphalira yumoza wawo kuti: “Lutanga, cipulikano cako cakucizga.” Penepapo, ŵakupempheska ŵacibulumutira aŵa ŵakwamba kulaŵiska, ndipo nchakukayikiska yayi kuti wose ŵakwamba kupeleka ucindami kwa Ciuta. Ŵanthu wose ŵati ŵawona ico cacitika, nawo ŵakwamba kulumba Ciuta. Mwaluŵiro, Batimeyu na munyake ŵakwamba kulondezga Yesu.

Apo Yesu wakujumpha mu Yeriko, mizinda yili waka nyomi. Waliyose wakukhumba kuwona uyo wacizga ŵanthu ŵacibulumutira. Ŵanthu ŵakumuwungilira Yesu, ntheura ŵanyake ŵakutondeka na kumuwona wuwo. Pakati pa ŵanthu awo ŵakutondeka kuwona Yesu pali Zakeyu, mulara wa ŵakusonkheska msonkho mu Yeriko. Ni mufupi comene mwakuti wangawona yayi ivyo vikucitika.

Ntheura Zakeyu wakucimbilira panthazi na kukwera mu khuni la mkuyu ilo lili mumphepete mwa nthowa iyo Yesu wakwendamo. Wati wakwera, cinthu cilicose wakuciwona makora. Apo mizinda yikufika, Yesu wakucemerezga uku wakulaŵiska mu khuni kuti: “Zakeyu, khira mwaluŵiro, pakuti muhanya uno nkhwenera kukhala mu nyumba yako.” Zakeyu wakukhira uku wakondwa comene ndipo wakucimbilira ku nyumba yake na kunozgera vinthu mulendo wake wakuzirwa.

Ndipouli, ŵanthu ŵati ŵawona ico cikucitika, wose ŵakwamba kunyunyuta. Ŵakuwona kuti nchakwenelera yayi kuti Yesu waŵe mulendo wa munthu uyu. Fundo njakuti Zakeyu wasambazga cifukwa ca kwibira ŵanthu pakusonkheska msonkho.

Ŵanthu ŵanandi ŵakumulondezga, ndipo Yesu wati wanjira mu nyumba ya Zakeyu, ŵakudandawura kuti: “Waluta kukakhala na munthu wakwananga.” Kweni Yesu wakuwona kuti Zakeyu ni munthu wakuti wangapera. Ndipo nadi, Zakeyu wakwimilira na kupharazga kuti: “Wonani! Hafu ya ivyo nili navyo, Fumu, nkhupeleka ku ŵakavu, ndipo cose ico nkhamulyera munthu pakumupa mulandu wautesi nkhuwezgerapo kanayi.”

Zakeyu wakulongora kuti wapera nadi, wakupeleka hafu ya vinthu vyake ku ŵakavu, ndipo hafu kuwezgera awo wakaŵibira. Vikuwoneka kuti wamanyenge ndalama izo wangapeleka kwa munthu waliyose mwa kuwona ivyo wakalembanga. Ntheura wakulayizga kuti wawezgerengepo kanayi mwakuyana na dango la Ciuta ilo likuti: ‘Usange munthu wiba mberere, wawezgenge mberere zinayi pa mberere iyo.’

Yesu wakondwa na umo Zakeyu walayizgira kuti wagaŵenge ivyo wali navyo, cifukwa wakuti: “Zuŵa ili ciponosko ciza mu nyumba iyi, cifukwa nayo ni mwana wa Abrahamu. Pakuti Mwana wa munthu wakiza kuzakapenja na kuponoska ico cikazgeŵa.”

Ni kale viŵi yayi apo Yesu wakalongosora za cinthu ‘cakuzgeŵa’ apo wakayowoya ntharika ya mwana wakuzgeŵa. Sono apa munthu wakazgeŵa nadi ndipo wasangika. Nangauli ŵalongozgi ŵa cisopa na awo ŵakuŵalondezga ŵakusinginika na kudandawura na umo Yesu wakucitira na ŵanthu nga ni Zakeyu, Yesu wakulutilira kupenja na kuwezga ŵana ŵakuzgeŵa ŵa Abrahamu. Mateyu 20:29-34; Mariko 10:46-52; Luka 18:35–19:10; Exodus 22:1.

▪ Vikuwoneka kuti ni nkhu uko Yesu wakukumana na ŵakupempheska ŵacibulumutira, ndipo wakuŵacitira vici?

▪ Kasi Zakeyu ni njani, ndipo cifukwa wuli wakukwera mu khuni?

▪ Kasi Zakeyu wakulongora wuli kuti wapera?

▪ Kasi tikusambirapo vici pa umo Yesu wakucitira na Zakeyu?