Cipaturo 72

Yesu Wakutuma Ŵasambiri 70

NI MU 32 C.E., ndipo pajumpha vilimika vitatu kufuma apo Yesu wakabapatizikira. Iyo na ŵasambiri ŵake ŵakaŵa ku Ciphikiro ca Mahema, ndipo ŵakwenera kuti ŵacali kufupi na Yerusalemu. Nakuti Yesu wakumalira myezi yinkhondi na umoza ya uteŵeti wake iyo yakhalako mu Yudeya panji ku sirya linyake la Mlonga wa Yorodani mu cigaŵa ca Pereya. Ku cigaŵa ici nako wakwenera kupharazgako.

Mbunenesko kuti Paska la 30 C.E. likati lajumpha, Yesu wakamalira myezi yinkhondi na yitatu kupharazga mu Yudeya. Kweni Ŵayuda ŵati ŵakhumba kumukoma pa Paska mu 31 C.E., wakamalira cilimika cimoza na hafu cakulondezgapo kupharazga mu Galileya pera. Pa nyengo yira, wakapanga gulu lakusambizgika makora la ŵapharazgi. Gulu ili wakaŵa nalo yayi pakudankha. Ntheura sono wakwambiska upharazgi wapadera waumaliro mu Yudeya.

Yesu wakwambiska upharazgi wapadera uwu, mwa kusora ŵasambiri 70 na kuŵatuma ŵaŵiriŵaŵiri. Ntheura pali magulu 35 gha ŵapharazgi ŵa Ufumu kuti ŵapharazge mu cigaŵa ici. Aŵa ŵakudangirako panthazi mu msumba uliwose na malo ghose agho Yesu na ŵapositole ŵake ŵakukhumba kufikako.

M’malo mwa kulongozgera ŵasambiri 70 mu masunagoge, Yesu wakuŵaphalira kuti ŵakanjire mu nyumba za ŵanthu, wakuti: “Kulikose uko mwamunjira mu nyumba, cakwamba mukati, ‘Nyumba iyi yiŵe na mtende.’ Ndipo usange mubwezi wa mtende walimo, mtende winu wamukhala pa iyo.” Kasi uthenga wawo uŵenge wakuti wuli? Yesu wakuti: “Lutilirani kuŵaphalira kuti, ‘Ufumu wa Ciuta waneng’enera kwa imwe.’” Pakuyowoya za ivyo ŵasambiri 70 aŵa ŵakucita, buku la Matthew Henry’s Commentary likuti: “Nga ni Fumu yawo, kulikose uko ŵakayanga, ŵakapharazganga ku nyumba na nyumba.”

Ivyo Yesu wakuphalira ŵasambiri 70 aŵa vikuyana waka na ivyo wakaphalira ŵasambiri 12 apo wakaŵatuma kukapharazga mu Galileya cilimika cimoza ico cajumpha. Padera pa kuŵacenjezga ŵasambiri 70 aŵa kuti ŵanthu ŵamuŵasuska, kuŵawovwira umo ŵamupharazgira uthenga, iyo wakuŵapaso nkhongono zakucizgira ŵalwari. Ntheura apo Yesu wakufika nyengo yicoko waka pamanyuma, ŵanthu ŵanandi ŵaŵenge ŵakunweka kuwona Fumu ya ŵasambiri awo ŵakucita vinthu vyakuzizwiska ivi.

Mulimo wa kupharazga wa ŵasambiri 70 ndiposo wa Yesu wa kuweleramo ukutora nyengo yicoko waka. Mwaluŵiro, magulu 35 gha ŵapharazgi ŵa Ufumu ghakwamba kuwelera kwa Yesu. Mwakukondwa, iwo ŵakuti: “Fumu, na viŵanda wuwo vikulambikika kwa ise mu zina linu.” Yesu wakukondwa nadi na lipoti la uteŵeti ili, cifukwa wakuzgora kuti: “Nkhamba kuwona Satana wawa kale nga ni leza kufuma kucanya. Wonani! namupani mazaza kufyadulira pasi njoka na ŵakalizga ku malundi.”

Yesu wakumanya kuti para Ufumu wa Ciuta wimikika mu nyengo zaumaliro, Satana na viŵanda vyake ŵazamucimbizgika kucanya. Kweni sono pakuti ŵanthu ŵafumiska viŵanda vyambura kuwoneka, mbukaboni wakusazgikira wa ivyo vizamucitika munthazi. Ntheura, Yesu wakuyowoya mwakusimikizga kuti Satana wazamuwa nadi kufuma kucanya. Ipo fundo yakuti ŵasambiri 70 ŵakupika mazaza gha kufyadulira pasi njoka na ŵakalizga njakuyelezgera waka. Ndipouli, Yesu wakuti: “Kusekelera na ici cara, kuti mizimu yikulambikika kwa imwe, kweni sekelerani cifukwa mazina ghinu ghalembeka kucanya.”

Yesu wali na cimwemwe cikuru ndipo wakulumba Ŵadada ŵake pakweru cifukwa ca kutuma ŵateŵeti ŵakujicefya aŵa kucita milimo mwankhongono ntheura. Pakuzgokera ku ŵasambiri ŵake, wakuti: “Ŵakukondwa mbanthu awo maso ghawo ghakuwona vinthu ivyo imwe mukuwona. Pakuti nkhumuphalirani kuti, Nchimi zinandi na mathemba ŵakakhumba kuwona vinthu ivyo imwe mukuwona kweni ŵakaviwona cara, na kupulika vinthu ivyo imwe mukupulika kweni ŵakavipulika cara.” Luka 10:1-24; Mateyu 10:1-42; Uvumbuzi 12:7-12.

▪ Kasi Yesu wakapharazganga nkhu mu vilimika vitatu vyakwambilira vya uteŵeti wake, ndipo mu myezi yaumaliro yinkhondi na umoza wakupharazga nkhu?

▪ Ni nkhu uko Yesu wakutuma ŵasambiri ŵake 70 kuti ndiko ŵakasange ŵanthu?

▪ Cifukwa wuli Yesu wakuyowoya kuti wakawona kuti Satana wawa kale kufuma kucanya?

▪ Kasi ŵasambiri 70 ŵangafyadulira pasi njoka na ŵakalizga mu fundo wuli?