Cipaturo 7

Yesu na Ŵakumanya vya Nyenyezi

ŴANTHU ŵanji ŵakwiza kufuma Kuvuma. Iwo mbakumanya vya nyenyezi, ŵanthu awo ŵakuti ŵakumanya ivyo vikucitika pakuwona umo nyenyezi yakhalira. Apo ŵakaŵa kukwawo Kuvuma, ŵakawona nyenyezi yacilendo, ndipo ŵakayilondezga mtunda utali mpaka ku Yerusalemu.

Ŵakumanya vya nyenyezi ŵati ŵafika mu Yerusalemu ŵakufumba kuti: “Wali nkhu uyo wababika themba la Ŵayuda? Pakuti tikawona nyenyezi yake apo tikaŵa kuvuma, ndipo tiza kuti tizakamusindamire.”

Lati lapulika ivi, Themba Herode ilo likukhala mu Yerusalemu lakwiya comene. Ntheura likucema ŵalara ŵa ŵasofi na kuŵafumba uko Khristu wababikirenge. Pakuwona mu Malemba, ŵakuzgora kuti: “Mu Betelehemu.” Pakupulika nthena, Herode wakucema ŵakumanya vya nyenyezi na kuŵaphalira kuti: “Lutaninge mukapenjisiske mwana, ndipo para mwamusanga muzakaniphalire, mwakuti nane nilute nkhamusindamire.” Kweni Herode wakukhumba kusanga mwana uyu kuti wamukome.

Ŵati ŵanyamuka, cinthu cakuzizwiska cikucitika. Nyenyezi iyo ŵakayiwona Kuvuma yikudangira panthazi pawo. Nchakuwonekerathu kuti iyi ni nyenyezi bweka yayi, kweni yatumika kuti yiŵalongozge. Ŵakumanya vya nyenyezi ŵakuyilondezga mpaka apo yikwima pa nyumba iyo muli Yosefe na Mariya.

Ŵakumanya vya nyenyezi ŵati ŵanjira mu nyumba, ŵakusanga Mariya na mwana wake, Yesu. Wose ŵakumujikamira. Ndipo ŵakufumya vyawanangwa vya golide mu vikwama vyawo, lubani na mure. Pamanyuma, apo ŵakukhumba kunyamuka na kukaphalira Herode uko mwana wali, Ciuta wakuŵacenjezga mu loto kuti ŵaleke kucita nthena. Ntheura ŵakuwelera kukwawo na nthowa yinyake.

Kasi mukughanaghana kuti ni njani uyo wakatuma nyenyezi iyo yikendanga mucanya na kulongozga ŵakumanya vya nyenyezi? Kumbukani kuti nyenyezi iyi yikaŵalongozgera mwakudunjika ku Betelehemu yayi uko kukaŵa Yesu. Kweni yikaŵalongozgera ku Yerusalemu, uko ŵakakumana na Themba Herode, ilo likakhumbanga kukoma Yesu. Ndipo mphanyi likamukoma nadi, Ciuta walekenge kunjilirapo na kusoka ŵakumanya vya nyenyezi kuti ŵaleke kuphalira Herode uko Yesu wakaŵa. Wakaŵa Satana Dyabulosi, mulwani wa Ciuta, uyo wakakhumbanga kukoma Yesu, ndipo wakatuma nyenyezi iyi kuti wafiske cilato cake. Mateyu 2:1-12; Mika 5:2.

▪ Nchivici cikulongora kuti nyenyezi iyo ŵakumanya vya nyenyezi ŵakayiwona yikaŵa nyenyezi bweka yayi?

▪ Kasi ŵakumanya vya nyenyezi ŵamusanga nkhu Yesu?

▪ Kasi tikumanya wuli kuti Satana ndiyo wakatuma nyenyezi iyo yikalongozganga ŵakumanya vya nyenyezi?