Cipaturo 96

Yesu na Muwusi Musambazi

APO Yesu wakujumpha mu Pereya kuya ku Yerusalemu, mwanalume munyake wakumucimbilira na kujikama panthazi pake. Munthu uyu wakucemeka muwusi, cifukwa panyake wali na udindo wapacanya mu sunagoge lakwake, panji njumoza wa Sanihedirini. Kweniso ni musambazi comene. Wakufumba kuti: “Msambizgi Muwemi, kasi nkhwenera kucita vici kuti nihare umoyo wamuyirayira?”

Yesu wakuzgora kuti: “Cifukwa wuli ukunicema muwemi? Palije uyo ni muwemi, kweni yumoza pera, Ciuta.” Mwanalume uyu wakwenera kuti wazunura mazgu ghakuti “muwemi” nga ni zina la nchindi, ntheura Yesu wakumuphalira kuti zina ili likwenelera Ciuta pera.

Yesu wakulutilira kuti: “Kweni usange ukukhumba kunjira mu umoyo, sungilira malango nyengo zose.”

Munthu uyu wakufumba kuti: “Malango nga?”

Pakuzunurapo ghankhondi mwa Malango Khumi, Yesu wakuzgora kuti: “Ungakomanga munthu cara, Ungacitanga uleŵi cara, Ungibanga cara, Ungapelekanga ukaboni wautesi cara, Cindika ŵawuso na ŵanyoko.” Ndipo Yesu wakusazgirapo dango lakuzirwa comene, wakuti: “Utemwenge mzengezgani wako umo ukujitemwera wamwene.”

Munthu uyu wakuzgora kufumira pasi pa mtima kuti: “Vinthu vyose ivi nasungilira kufuma ku uwukirano wane.” “Kasi nkhupeleŵera mpha?”

Pakutegherezga pempho lakufumira pasi pa mtima la munthu uyu, Yesu wakwamba kumutemwa. Kweni Yesu wakuŵanika kuti munthu uyu wakutemwa comene usambazi, ndipo wakumuphalira ico wakusoŵerwa, wakuti: “Cinthu cimoza cakhalako kwa iwe: Luta, ukaguliske vinthu ivyo uli navyo na kupeleka ku ŵakavu, ndipo uŵenge na usambazi kucanya, ndipo wize uŵe mulondezgi wane.”

Tikukayika yayi kuti Yesu wakumulengera lusungu mwanalume uyu apo wakuwukapo na citima. Vyuma vyake vyamubulumutizga kuti waleke kuwona usambazi weneco. Yesu wakudandawura kuti: “Cizamuŵa cinthu cinonono nadi ku awo ŵali na ndalama kunjira mu ufumu wa Ciuta!”

Ŵasambiri ŵakuzizikika na mazgu gha Yesu. Kweni ŵakulutilira kuzizwa apo Yesu wakusazgirapo kuti: “Nchipusuko kuti ngamila yisolote mu jiso la sindano yakusonera kuluska kuti munthu musambazi wanjire mu ufumu wa Ciuta.”

Ŵasambiri ŵakufumba kuti: “Ipo ni njani pera wangaponoskeka?”

Pakuŵalaŵiska, Yesu wakuzgora kuti: “Ku ŵanthu nchambura macitiko, kweni ndimo viliri na Ciuta cara, pakuti vinthu vyose ni vyamacitiko kwa Ciuta.”

Pakuwona kuti ivyo ŵali kusankha vikupambana na ivyo muwusi musambazi uyu wasankha, Petrosi wakuti: “Wonani! Ise tasida vinthu vyose na kumulondezgani.” Ntheura wakufumba kuti: “Kasi tizamuŵa na vici?”

Yesu wakulayizga kuti: “Mu kulengaso, para Mwana wa munthu wakhala pa cizumbe cake caucindami, imwe, mwaŵeneimwe mwanilondezga namweso muzamukhala pa vizumbe khumi na viŵiri, kweruzga mafuko khumi na ghaŵiri gha Israyeli.” Enya, Yesu wakulongora kuti kuzamuŵa kulengaso vinthu pa caru capasi mwakuti vizakaŵeso nga umo vikaŵira mu munda wa Edeni. Ndipo Petrosi na ŵasambiri ŵanyake ŵazamupokera njombe ya kuwusa Paradiso wa pa caru capasi uyu lumoza na Khristu. Nadi, mphake kusida cilicose cifukwa ca njombe yikuru ntheura.

Ndipouli, nanga ni sono njombe yilipo, nga umo Yesu wakuyowoyera kuti: “Palije uyo wasida nyumba panji ŵakuru panji ŵanung’una panji ŵadumbu panji nyina panji wiske panji ŵana panji minda cifukwa ca ine na cifukwa ca makani ghawemi uyo walekenge kusanga makumi khumi sono mu nyengo yino, nyumba na ŵakuru panji ŵanung’una na ŵadumbu na ŵanyina na ŵana na minda, pamoza na nthambuzgo, ndipo mu mgonezi uwo ukwiza umoyo wamuyirayira.”

Nga umo Yesu wakulayizgira, kulikose uko ŵasambiri ŵake ŵangaluta mu caru, ŵakusangwa na ubwezi uwemi ndiposo wakuzirwa comene na Ŵakhristu ŵanyawo, kuluska uwo ŵali nawo na ŵabali ŵawo ŵakuthupi. Ntheura mwanalume musambazi uyu wataya mwaŵi wa kusanga njombe iyi ndiposo ya umoyo wamuyirayira mu Ufumu wakucanya wa Ciuta.

Kufuma apo, Yesu wakusazgirapo kuti: “Ndipouli, ŵanandi awo mbakwamba ŵazamuŵa ŵaumaliro, ndipo ŵaumaliro ŵakwamba.” Kasi iyo wakung’anamuraci?

Wakung’anamura kuti ŵanthu ŵanandi awo “mbakwamba” pa kusangwa na maudindo mu cisopa, nga ni muwusi musambazi uyu, ŵazamunjira yayi mu Ufumu. Iwo ŵazamuŵa “ŵaumaliro.” Kweni ŵanandi, nga mbasambiri ŵa Yesu ŵakujiyuyura, awo Ŵafarisi ŵeneawo ŵakujirunjiska ŵakuŵawona kuti ‘mbaumaliro,’ ndiposo ŵanthu ŵapasi, panji ‛am ha·’aʹrets, ŵazamuŵa “ŵakwamba.” Ŵazamuŵa “ŵakwamba” mu fundo yakuti ŵazamupokera mwaŵi wa kuwusira lumoza na Khristu mu Ufumu. Mariko 10:17-31; Mateyu 19:16-30; Luka 18:18-30.

▪ Kasi mwanalume musambazi ni muwusi pa fundo wuli?

▪ Cifukwa wuli Yesu wakukana kucemeka muwemi?

▪ Kasi ivyo vyacitikira mwanalume musambazi vikulongora wuli uheni wa kuŵa musambazi?

▪ Kasi ni njombe wuli izo Yesu wakulayizga ŵalondezgi ŵake?

▪ Kasi ŵakwamba ŵakuzgoka wuli ŵaumaliro, ndipo ŵaumaliro ŵakuzgoka wuli ŵakwamba?