Cipaturo 18

Yohane Wakucepa, Yesu Wakusazgikira

PASKA la 30 C.E. lati lajumpha, Yesu na ŵasambiri ŵake ŵakuwukako ku Yerusalemu. Ndipouli, ŵakuwelera kukaya kwawo ku Galileya yayi kweni ŵakuluta ku Yudeya uko ŵakubapatiza ŵanthu. Yohane Mbapatizi nayo wacita mulimo wenewuwu pafupifupi cilimika cimoza sono, ndipo wacali na ŵasambiri ŵake.

Yesu wakubapatiza yayi, kweni ŵasambiri ŵake ndiwo ŵakubapatiza mwakulongozgeka na iyo. Ubapatizo wawo ukuyana waka na wa Yohane, cifukwa nchilongolero ca kupera ku zakwananga izo Ŵayuda ŵakacitira phangano la Dango la Ciuta. Ndipouli, Yesu wati wawuka, wakulongozga ŵasambiri ŵake kuti ŵabapatizenge ubapatizo uwo ngwakuzirwa mu nthowa yinyake. Ubapatizo Wacikhristu mazuŵa ghano nchilongolero cakuti munthu wajipeleka kuteŵetera Yehova Ciuta.

Ndipouli, pa nyengo iyi, Yesu wati wamba uteŵeti wake, iyo pamoza na Yohane, ŵakupharazga na kubapatiza awo ŵapera nangauli waliyose wakucitira kwayekha mulimo uwu. Kweni ŵasambiri ŵa Yohane ŵakwamba kuŵa na sanji na kwamba kumudandawulira vya Yesu kuti: “Rabi, . . . wonani, iyo uyu wakubapatiza ndipo wose ŵakuluta kwa iyo.”

M’malo mwa kuŵa na sanji, Yohane wakusangwa na umo uteŵeti wa Yesu ukwendera makora ndipo wakukhumba kuti ŵasambiri ŵake nawo ŵakondwenge. Wakuŵakumbuska kuti: “Imwe mwaŵene mukunicitira ukaboni kuti nkhati, Ndine Khristu cara, kweni natumika panthazi pa iyo yura.” Kufuma apo, wakuyowoya ciyelezgero ciwemi cakuti: “Uyo wali na mwali ni mwenenthengwa. Ndipouli, mubwezi wa mwenenthengwa, para wakwima na kumupulika, wakuŵa na cimwemwe cikuru cifukwa ca mazgu gha mwenenthengwa. Ntheura cimwemwe cane ici cazuzgika.”

Pakuŵa mubwezi wa Mwenenthengwa, Yohane wakakondwa myezi yinkhondi na umoza iyo yajumpha apo wakalongosolera ŵasambiri ŵake vya Yesu. Ŵanyake mwa iwo ŵakazgoka ŵamoza mwa awo ŵazamuŵa Mwali wakucanya wa Khristu, mweneuyo Mbakhristu ŵakuphakazgika na mzimu. Yohane wakukhumba kuti ŵasambiri ŵake awo wali nawo pasono nawo ŵalondezge Yesu, cifukwa mulimo wake nkhunozga nthowa kuti uteŵeti wa Khristu wende makora. Nga umo Yohane Mbapatizi wakulongosolera: “Iyo yura wakwenera kulutilira kusazgikira, kweni ine nkhwenera kulutilira kucepa.”

Msambiri muphya wa Yesu, Yohane, uyo pakwamba wakaŵa msambiri wa Yohane Mbapatizi, wakulemba vyakukhwaskana na mulimo weneko na wakuzirwa wa Yesu, kuti: “Uyo wakufuma kucanya wali pacanya pa ŵanji wose. . .  .Ŵawiske ŵakutemwa Mwana ndipo ŵapeleka vinthu vyose mu mawoko ghake. Uyo wakupulikana mwa Mwana wali na umoyo wamuyirayira; uyo wakuleka kupulikira Mwana wazamuwona umoyo cara, kweni kutukutwa kwa Ciuta kukukhalilira pa iyo.”

Pati pajumpha nyengo yicoko waka, Yohane Mbapatizi wati wayowoya kuti wakwenera kucepa, Themba Herode likumukaka na kumuŵika mu jele. Herode wali kutora Herodiya, muwoli wa mukuru wake Filipu kuŵa muwoli wake, ndipo Yohane wati wamususka pa nkhani iyi, Herode wakumuŵika mu jele. Yesu wati wapulika kuti Yohane wakakika, wakuwukako ku Yudeya na ŵasambiri ŵake na kuluta ku Galileya. Yohane 3:22–4:3; Milimo 19:4; Mateyu 28:19; 2 Ŵakorinte 11:2; Mariko 1:14; 6:17-20.

▪ Kasi ubapatizo uwo ukucitika mwakulongozgeka na Yesu pambere wandawuskike, ngwakuzirwa wuli? Ndipo uwo ukucitika wati wawuskika ngwakuzirwa wuli?

▪ Kasi Yohane wakulongora wuli kuti madando gha ŵasambiri ŵake ngambura kwenelera?

▪ Cifukwa wuli Yohane waŵikika mu jele?