Cipaturo 11

Yohane Wakunozga Nthowa

VILIMIKA 17 vyajumphapo kufuma apo Yesu wakafumbanga mafumbo ŵasambizgi mu tempele, peneapo wakaŵa na vilimika 12. Sono ni nyengo ya vuna cilimika ca 29 C.E., ndipo vikuwoneka kuti waliyose wakuyowoya vya Yohane mbali wa Yesu, uyo wakupharazga mu caru cose cakufupi na Mlonga wa Yorodani.

Yohane ni munthu wakuzizika mu kawonekero na kayowoyero wuwo. Cakuvwara cake ncha weya wa ngamila, ndipo wakuvwara lamba wacikumba mu ciwuno. Cakurya cake ni zombe na uci wa mu thengere. Kasi uthenga wake ngwakuti wuli? “Perani, cifukwa ufumu wa kucanya waneng’enera.”

Ŵanthu ŵakukondwa na uthenga uwu. Ŵanandi ŵakumanya kuti ŵakwenera kupera, ndiko kuti, ŵasinthe nkharo yawo na kuleka milimo yawo yiheni. Ntheura ŵanthu ŵanandi ŵakwiza kwa Yohane, kufumira mu vigaŵa vyose vyakufupi na Yorodani, na ku Yerusalemu wuwo, ndipo wakuŵabapatiza, kuŵabizga mu maji gha mu Yorodani. Cifukwa wuli?

Yohane wakubapatiza ŵanthu nga nchimanyikwiro, panji kuzomerezga kuti ŵapera kufumira pasi pa mtima ku zakwananga izo ŵakabudira phangano la Dango la Ciuta. Ntheura, Ŵafarisi ŵanji na Ŵasaduki ŵati ŵiza ku Yorodani, Yohane wakuŵasuska. Iyo wakuti: “Imwe mphapu ya vipiri . . . pambikani cipambi cakwenelera kupera; ndipo muleke kujikhungurufya kuyowoya kwa mwaŵene kuti, ‘Tili nayo dada withu Abrahamu.’ Pakuti nkhumuphalirani kuti Ciuta wangamanya kumuwuskira ŵana Abrahamu kufuma ku malibwe agha. Mbavi yaŵikika kale pa msisi wa khuni; ntheura khuni lililose lambura kupambika cipambi ciwemi likwenera kudumulika na kuponyeka mu moto.”

Pakuwona umo ŵanthu ŵakutemwera kupulikizga kwa Yohane, Ŵayuda ŵakutuma ŵasofi na Ŵalevi kwa iyo. Aŵa ŵakumufumba kuti: “Kasi ndiwe njani?”

Yohane wakuŵazgora kuti: “Ndine Khristu cara.”

Ŵakufumba nipera kuti: “Ipo ndiwe njani? Kasi ndiwe Eliya?”

Wakuzgora kuti: “Ndine cara.”

“Kasi ndiwe Nchimi?”

“Cara!”

Ntheura ŵakulutilira kufumba: “Ndiwe njani? mwakuti tikaŵape zgoro awo ŵali kutituma. Iwe wamwene ukuti ndiwe njani?”

Yohane wakulongosora kuti: “Ndine lizgu la uyo wakucemerezga mu mapopa kuti, ‘Nyoloskani nthowa ya Yehova,’ umo Yesaya nchimi wakayowoyera.”

Ŵakukhumba kumanya vinandi, ndipo ŵakufumba kuti: “Cifukwa wuli pera ukubapatiza, usange iwe wamwene ndiwe Khristu cara panji Eliya panji Nchimi?”

Iyo wakuzgora kuti: “Ine nkhubapatiza na maji. Pakati pinu pakwimilira yunji uyo mukumumanya cara, mweneuyo wakwiza pamanyuma pane.”

Yohane wakunozga nthowa mwa kovwira ŵanthu kuti ŵasinthe nkharo na kupokelera Mesiya, uyo wazamuŵa Themba. Pakuyowoya za iyo, Yohane wakuti: “Uyo wakwiza pamanyuma pane ngwankhongono kuluska ine, mweneuyo vilyato vyake nili wakwenelera cara kuvura.” Nakuti Yohane wakuyowoyaso kuti: “Uyo wakwiza pamanyuma pane wadangirako panthazi pane, cifukwa iyo wakaŵako pambere ine nindaŵeko.”

Ntheura uthenga wa Yohane wakuti “ufumu wa kucanya waneng’enera,” ukovwira ŵanthu kumanya kuti Yesu Khristu, Themba lakwimikika la Yehova, wali pafupi kwamba uteŵeti wake. Yohane 1:6-8, 15-28; Mateyu 3:1-12; Luka 3:1-18; Milimo 19:4.

▪ Kasi Yohane ni munthu wa mtundu wuli?

▪ Cifukwa wuli Yohane wakubapatiza ŵanthu?

▪ Cifukwa wuli Yohane wakuyowoya kuti Ufumu waneng’enera?