Cipaturo 105

Zuŵa Lakuzirwa Comene Likwamba

APO Yesu wakufuma mu Yerusalemu pa Mande namise, wakuwelera ku Betaniya, kuvuma kwa Lupiri lwa Maolive. Mazuŵa ghaŵiri gha uteŵeti wake waumaliro mu Yerusalemu ghamara. Tikukayika yayi kuti Yesu wakugonaso ku nyumba ya mubwezi wake, Lazaro. Kwambira apo wakafumira ku Yeriko pa Cinkhondi, uwu mbusiku wacinayi, iyo wakugona ku Betaniya.

Sono pa Ciŵiri mulenji, Nisani 11, iyo na ŵasambiri ŵake ŵaliso pa ulendo. Ili ni zuŵa lakuzirwa comene pa uteŵeti wa Yesu, ilo wakutangwanika comene. Ni zuŵa laumaliro ilo wakuwonekera mu tempele. Ndiposo ni zuŵa laumaliro la uteŵeti wake pambere wanderuzgike na kukomeka.

Yesu na ŵasambiri ŵake ŵakwendaso mu nthowa yakujumpha ku Lupiri lwa Maolive kulazga ku Yerusalemu. Mu nthowa iyi, yakufuma ku Betaniya, Petrosi wakuwona khuni ilo Yesu wakalitemba mayiro mulenji. Ndipo wakuti: “Rabi, wonani! khuni la mkuyu lira mukalitemba lafota.”

Kweni cifukwa wuli Yesu wali kukoma khuni ili? Wakuphara cifukwa cake apo wakulutilira kuyowoya kuti: “Nadi pano nkhumuphalirani, Usange muli na cipulikano ndipo mukukayika cara, mucitenge ico nacita ku khuni la mkuyu pera cara, kweniso usange mungayowoya ku lupiri ulu, ‘Nyamuka ndipo uponyeke mu nyanja,’ cicitikenge. Ndipo vinthu vyose ivyo mukupempha mu lurombo, pakuŵa na cipulikano, mupokerenge.”

Ntheura pakufoteska khuni, Yesu wakusambizga ŵasambiri ŵake kuti nchakukhumbikwa kuŵa na cipulikano mwa Ciuta. Nga umo wakuyowoyera kuti: “Vinthu vyose ivyo mukulomba na kupempha, muŵe na cipulikano kuti mwapokera kale, ndipo muŵenge navyo.” Ili ni sambiro liwemi comene kwa iwo, comenecomene pakuwona viyezgo vyakofya ivyo vili pafupi kwiza. Kweniso pali kukolerana kunyake pakati pa kufota kwa khuni la mkuyu na cipulikano.

Mtundu wa Israyeli, nga ni khuni la mkuyu ili, uli na mawonekero ghakupusika. Nangauli mtundu uwu uli mu phangano na Ciuta ndipo kuwaro ukuwoneka nga ukulondezga malango, walongora kuti ulije cipulikano, ngwambura kupambika vipambi viwemi. Cifukwa ca kuŵavya cipulikano, ukukana Mwana wa Ciuta. Ntheura pakufoteska khuni la mkuyu lambura kupambika, Yesu wakulongora ivyo vicitikirenge mtundu wambura vipambi na wambura cipulikano uwu.

Mwaluŵiro Yesu na ŵasambiri ŵake ŵakunjira mu Yerusalemu, ndipo nga nkhaluso kawo, ŵakuluta mu tempele, uko Yesu wakwamba kusambizga. Tikukayika yayi kuti pakukumbuka ivyo Yesu wakacitira ŵakusintha ndalama mayiro, ŵalara ŵa ŵasofi na ŵanalume ŵalara ŵa ŵanthu ŵakwimikana nayo, ŵakuti: “Kasi ukucita vinthu ivi na mazaza wuli? Ndipo ni njani wakakupa mazaza agha?”

Pakuzgora, Yesu wakuti: “Nane nimufumbaninge cinthu cimoza. Usange mwaniphalira, nane nimuphaliraninge mazaza agho nkhucitira vinthu ivi: Ubapatizo wa Yohane, kasi ukafuma nkhu? Ukafuma kucanya panji ku ŵanthu?”

Ŵasofi na ŵanalume ŵalara ŵakwamba kudumbiskana ŵekhaŵekha umo ŵangamuzgolera. Ŵakuti: “Usange titenge, ‘Ukafuma kucanya,’ iyo watenge kwa ise, ‘Ipo cifukwa wuli pera mukamugomezga cara?’ Kweni usange titenge, ‘Ukafuma ku ŵanthu,’ tikopa mzinda, cifukwa wose ŵakutora Yohane kuŵa nchimi.”

Ŵalongozgi aŵa ŵakumanya yayi cakuti ŵamuzgore. Ntheura ŵakuzgora Yesu kuti: “Tikumanya cara.”

Yesu nayo wakuti: “Mbwenu nane nimuphaliraninge cara mazaza agho nkhucitira vinthu ivi.” Mateyu 21:19-27; Mariko 11:19-33; Luka 20:1-8.

▪ Kasi zuŵa la Ciŵiri, Nisani 11, ndakuzirwa wuli?

▪ Kasi ni masambiro wuli agho Yesu wakusambizga apo wakufoteska khuni la mkuyu?

▪ Kasi Yesu wakuŵazgora wuli awo ŵakumufumba za mazaza agho wakucitira vinthu?