Cipaturo 21

Cilato ca Yehova Cifiskikenge Mwaucindami

1, 2. (a) Kasi cilato ca Yehova kurazga ku vilengiwa vyake vyamahara ncivici? (b) Kasi mbanjani awo ŵakupanga mbumba ya Ciuta yakukolerana iyo yikumusopa?

 CILATO ca Yehova ncakuti vilengiwa vyake vyose vyamahara vikolerane pakumusopa iye Ciuta waunenesko yekha na kusangwa na wanangwa wa ucindami nga mbana ŵa Ciuta. Ili liriso khumbo la ŵantu wose awo ŵakutemwa urunji.

² Yehova wakamba kufiska cilato cake cikuru ici apo wakayamba kulenga vintu. Cilengiwa cake cakwamba cikaŵa Mwana wake uyo pamanyuma pa kuwuskika ku ŵakufwa ‘ncirongolero ca ucindami wa Ciuta, na cikozgo ceneco ca kaŵiro kake.’ (Ŵahebere 1:1-3) Mwana uyu wakaŵa wapadera comene, ici ncifukwa cakuti, wakalengeka na Ciuta iyemwene. Mukuruta kwa nyengo, vilengiwa vinyake vikeneranga kulengeka kwizira mwa Mwana uyu: cakudanga ŵangelo kucanya, ndipo pamanyuma pake ŵantu pano pa caru capasi. (Job 38:7; Luka 3:38) Vilengiwa vyose ivi vikupanga mbumba yimoza. Ku vilengiwa vyose ivi, Yehova ndiye wakaŵa Ciuta wawo, Muwusi wa Cilengiwa Cose na Dada wawo wacitemwa.

3. (a) Kasi ncivici ico ise tose tahara kufuma ku ŵapapi ŵithu ŵakudanga? (b) Ncawanangwa wuli ico Yehova wapereka ku ŵana ŵa Adamu?

³ Peneapo ŵapapi ŵithu ŵakudanga ŵakeruzgikira ku nyifwa cifukwa ca kwanangira dala, iwo ŵakafumiskika mu Edeni ndipo Ciuta wakaŵakana. Ŵakaleka kuŵa ŵa mu mbumba yake. (Genesis 3:22-24; Duteronome 32:4, 5)  Ise ndise ŵana ŵawo, anteura tiri kubabika na cizgoŵi ca kucita zakwananga. Ndipouli, Yehova wakamanya kuti ŵana ŵanyake ŵa Adamu na Heva ŵazamutemwa urunji. Anteura iye wakapereka cawanangwa cakuti ŵana aŵa ŵasange “wanangwa wa ucindami wa ŵana ŵa Ciuta.”—Ŵaroma 8:20, 21.

Ŵaisrayeli Ŵataya Mwaŵi

4. Ni mwaŵi wuli wapadera uwo Yehova wakapereka ku mtundu wamwaka wa Israyeli?

⁴ Virimika 2,500 pamanyuma pa kulengeka kwa Adamu, Yehova wakapereka mwaŵi wapadera ku ŵantu ŵanyake kuti ŵaŵe paubwezi na Iye. Ciuta wakasanka mtundu wa Israyeli wamwaka kuti uŵe ŵantu ŵake ndipo wakawupa Dango lake. (Genesis 12:1, 2) Uwu ukazgoka mtundu ndipo Ciuta wakawugwiriskira ncito kuti ufiske cilato cake. (Duteronome 14:1, 2; Yesaya 43:1) Ndipouli, ŵantu ŵa mtundu uwu ŵakaŵa ŵacali ŵazga ŵa zakwananga na nyifwa, anteura ŵakasangwa yayi na wanangwa waucindami uwo Adamu na Heva ŵakaŵa nawo pakudanga.

5. Ni mwauli umo Ŵaisrayeli ŵakatayira ubwezi wawo na Ciuta?

⁵ Nangauli vikaŵa nteura, kweni Ŵaisrayeli ŵakaŵa paubwezi na Ciuta. Ŵakaŵa na ncito ya kucindika Yehova uyo wakaŵa Dada wawo ndiposo ŵakeneranga kucita vintu mwakuyana na cilato cake. Yesu wakayowoya mwakudidimizga kuzirwa kwa kufiska ncito iyo ŵakaŵa nayo. (Mateyu 5:43-48) Ndipouli, mtundu wa Israyeli ukatondeka kucita khumbo la Ciuta. Nangauli Ŵayuda ŵara ŵakayowoyanga kuti “tiri na Dada yumoza, ndiyo Ciuta,” Yesu wakaŵavumbulira kuti vyakucita vyawo na kaghanaghaniro kawo vikasuskana na ivyo ŵakayowoyanga. (Yohane 8:41, 44, 47) Mu 33 C.E., Dango ilo Ciuta wakapereka kwa iwo likaleka kugwira ncito, ndipo ubwezi wapadera uwo Ŵaisrayeli ŵakaŵa nawo na Ciuta ukamara. Kasi ici cikung’anamura  kuti sono ncamacitiko yayi kuti ŵantu ŵaŵe paubwezi na Ciuta?

Kuwunganiska Pamoza ‘Vintu vya Kucanya’

6. Kasi ncivici ico cili cilato ca “urongozgi” uwo Paulos wakayowoya pa lemba la Ŵaefeso 1:9, 10?

⁶ Mpostole Paulos wakarongora kuti ŵantu ŵanji ŵasangwenge na ubwezi wapadera na Ciuta. Mwaciyerezgero, pakuyowoya za ndondomeko iyo Yehova walikunozga yakuti awo ŵali na cipulikano ŵaŵe ŵa mu mbumba Yake, Paulos wakalemba kuti: ‘[Ciuta] wakatimanyiska camucindindi ca khumbo lake, kwakulingana na kukondwa kwake kuweme uko wakasimikizga mwa Iyo [“kuti paŵe urongozgi,” NW], kuti para nyengo yafiskika nkanira vintu vyose, vintu vya kucanya na vintu vya pa caru, virungike mwa Kristu.’ (Ŵaefeso 1:9, 10) “Urongozgi” uwu wuli mu mawoko gha Kristu. Kwizira mwa iye, ŵantu ŵakuŵa paubwezi na Ciuta. Ŵantu ŵacoko waka ŵamukhala kucanya. Kweni ŵantu ŵanandi comene ŵazamukhala pano pa caru capasi kwamuyirayira.

7. Kasi mbanjani awo ŵakupanga ‘vintu vya kucanya’?

⁷ Cakudanga, kuyambira pa Pentekoste wa 33 C.E., pwererero likaŵikika danka pa ‘vintu vya kucanya,’ ivi vikwimira awo ŵamuwusira lumoza na Kristu mu Ufumu wa kucanya. Cifukwa ca cipulikano cawo mu sembe ya Yesu, iwo ŵawoneka ŵarunji na Ciuta. (Ŵaroma 5:1, 2) Mukuruta kwa nyengo, Ŵayuda na ŵantu ŵa mitundu yinyake nawo ŵakacemeka, ndipo ŵantu aŵa ŵakupanga ‘vintu vya kucanya,’ ndipo ŵakukwana 144,000. (Ŵagalatiya 3:26-29; Civumbuzi 14:1) Mbakukhalira ŵacoko waka ŵa gulu ili awo ŵali pano pa caru capasi.

Kuwunganiska Pamoza ‘Vintu vya pa Caru’

8. Kasi mbanjani awo ŵakupanga ‘vintu vya pa caru,’ ndipo ŵakumuwona wuli Yehova?

⁸ Urongozgi wenewuwu ukugwiraso ncito pa kuwunganiska  pamoza ‘vintu vya pa caru.’ Ŵantu mamiliyoni ghanandi ŵakuwunganiskika sono kuti ŵazakakhale pano pa caru capasi kwandanda. Mwakukolerana na awo ŵamuwusa mu Ufumu wa kucanya, iwo ŵakucindika na kuthuwuska zina la Yehova pakumusopa. (Yesaya 2:2, 3; Zefaniya 3:9) Iwo ŵakumucema Yehova kuti “Ŵadada” cifukwa ŵakumanya kuti iye ndiye mupi wa umoyo. Ndiposo ŵakusangwa kuti mbamapokerereko kwa Ciuta cifukwa ŵali na cigomezgo mu ndopa zakuthiskika za Yesu. (Civumbuzi 7:9, 14) Kweni pakuti ŵacali ŵambura urunji, kuti ŵazakacemeke nadi kuti mbana ŵa Ciuta kuzamucitika kuntazi.

9. Ni layizgano wuli ilo lemba la Ŵaroma 8:21 likupereka ku ŵantu?

⁹ Ŵantu awo ŵali na cilindizga ca kuzakakhala pano pa caru capasi ŵakulindizga mwakunweka nyengo iyo ŵantu ‘ŵazamusutuka ku wuzga wa kuvunda.’ (Ŵaroma 8:21) Wanangwa uwu uzamuyamba pamanyuma pakuti Kristu na magulu ghake gha nkondo gha kucanya ghazakamalizga mulimo wawo wa pa suzgo yikuru, umariro uwu uzamucitika pa nkondo ya Haramagedoni. Mgonezi uheni wa Satana uzamuparanyikirathu, ndipo pamanyuma pake ŵantu ŵazamupokera vitumbiko mu nyengo ya Muwuso wa Virimika Cikwi wa Kristu kwizira mu mazaza gha Ufumu.—Civumbuzi 19:17-21; 20:6.

10. Ni sumu wuli ya marumbo iyo ŵateŵeti ŵa Yehova ŵazamuyimba?

¹⁰ Mwee, nako nkukondweska umo kuzamuŵira kuti ŵateŵeti ŵa Yehova pano pa caru capasi ŵazakayowoye mazgu agho ŵateŵeti ŵake kucanya ŵakuyowoya, awo mwacimwemwe ŵakuti: ‘Yikuru na yakuzizwiska ndi milimo yinu, Fumu Ciuta mwee, Mwene-nkongono-zose; zakunyoroka na zakuneneska ndi ntowa zinu, Karonga wa muyirayira mwee. Ndi njani wati warekenge kopa na kucindika  zina linu, Fumu mwee? Pakuti Imwe pera ndimwe ŵatuŵa: pakuti mitundu yose yiti yizenge na kulambira pa maso pinu; pakuti milimo yinu yakunyoroka yiri kurongoreka.’ (Civumbuzi 15:3, 4) Enya, ŵateŵeti wose ŵa Yehova ŵazamukolerana pakusopa Ciuta yekha waunenesko. Nanga ŵangaŵa ŵakufwa nawo ŵazamuwukiskika na kupika mwaŵi wakuti nawo ŵazakarumbe Yehova.—Milimo 24:15.

Wanangwa Weneco Waneng’enera

11. Kasi ni wanangwa wuli uwo ŵantu awo ŵazamuponoskeka pa suzgo yikuru ŵazamusangwa nawo?

¹¹ Pamanyuma pa suzgo yikuru, iyo yizamumara pa Haramagedoni, uheni wose uzamumara pa caru capasi, Satana Dyabulosi wazamuŵaso yayi “ciuta wacaru cino.” Ŵasopi ŵa Yehova ŵazamusuzgikaso yayi na nkongono ziheni za Satana. (2 Ŵakorinte 4:4; Civumbuzi 20:1, 2) Cisopo cautesi cizamuyimiraso Yehova yayi, ndiposo kugaŵaniska ŵantu uko capanga kuzamumara. Ŵateŵeti ŵa Ciuta waunenesko ŵazamuyuzgikaso yayi na ŵantu awo ŵakuwusa. Mwee, tizamusangwa na wanangwa weneco nadi!

12. Ni mwauli umo ŵantu wose ŵazamufwatukira ku zakwananga na vyakufumapo vyake?

¹² Nga ni “Mwana-mberere wa Ciuta, uyo wakuwuskako kwananga kwa caru,” Yesu wazamugwiriskira ncito sembe yake kuti wazakamazgire zakwananga za ŵantu. (Yohane 1:29) Apo Yesu wakaŵa pano pa caru capasi, wakagowokeranga ŵantu zakwananga zawo, wakacizganga awo wakaŵagowokeranga nga mbukaboni wakuti ŵagowokereka nadi. (Mateyu 9:1-7; 15:30, 31) Mwakuyana waka, Yesu Kristu, nga ni Themba la Ciuta la Ufumu wa kucanya, wazamucizga ŵantu ŵaciburumutira, ŵambura kuyowoya, ŵambura kupulika, ŵakupendera, ŵakufunta, ndiposo na maurwari ghanyake. (Civumbuzi 21:3, 4) “Dango la kwananga” la ŵantu wose ŵakupulikira lizamumara, ndipo  ici cizamupangiska kuti maghanoghano na vyakucita vyawo vizakaŵe vyakukondweska, pose paŵiri, kwa iwoŵene na kwa Ciuta. (Ŵaroma 7:21-23) Pakuzakafika kuumariro kwa Muwuso wa Virimika Cikwi, ŵantu ŵazamuŵa ŵarunji, ndipo ŵazamuŵa ‘cikozgo na ŵakulingana’ na Ciuta waunenesko.—Genesis 1:26.

13. Pa umariro wa Muwuso wa Virimika Cikwi, kasi Yesu wazamucitaci, ndipo cakufumapo cake cizamuŵa civici?

¹³ Pamanyuma pakuti Kristu wapangiska ŵantu kuŵa ŵarunji, iye wazamuwezgera mazaza ku Ŵawiske agho ŵakamupa kuti wacitire mulimo uwo wakapika: “Wati wapereke Ufumu kwa Ciuta Ŵawiske; para wamarizga ufumu wose na mazaza ghose na nkongono. Cifukwa kukwenerera Iyo kuwusa, wasuke [Ŵawiske] ŵaŵike ŵalwani ŵake ŵose kusi ku marundi ghake.” (1 Ŵakorinte 15:24, 25) Pa nyengo iyi Muwuso wa Virimika Cikwi uzamuŵa kuti wafiska cilato ca Ciuta, anteura cizamuŵa cakukhumbikwa yayi kuti pazakaŵeso muwuso waciŵiri pakati pa Yehova na ŵantu. Pakuti zakwananga na nyifwa vizamuŵa kuti vyafumiskikapo, ndiposo kuti ŵantu ŵawomboleka, Yesu wazamukhumbikwaso yayi kuŵa Muwomboli. Baibolo likurongosora kuti: ‘Penepapo Mwana nayo wamkulambiskika [kujilambika] kwa Mweneuyo wakamulambiskira vyose, mwakuti Ciuta waŵe vyose mu vyose.’—1 Ŵakorinte 15:28.

14. Kasi ncivici ico cizamucitikira ŵantu ŵarunji wose, cifukwa wuli?

¹⁴ Pamanyuma pake ŵantu ŵarunji ŵazamupika mwaŵi wakuti ŵarongore usange ŵasanka nadi kuteŵetera Ciuta kwamuyirayira. Anteura, pambere wandaŵapokelere iwo kuŵa nga mbana ŵake, Yehova wazamuzomerezga kuti ŵantu wose ŵazakayezgeke kwaumariro. Satana na viŵanda vyake ŵazamufwaturika mu cizongwe. Kufwaturika uku kuti kuzamupereka urwani kwa awo ŵakumutemwa  nadi Yehova yayi. Kweni ŵantu wose awo ŵazamuleka kupulikira Yehova ŵazamuparanyika kwamuyirayira, ŵazamuparanyikira lumoza na Satana na viŵanda vyake.—Civumbuzi 20:7-10.

15. Kasi ncivici ico cizamucitika paumaliro pake pakati pa vilengiwa vyauzimu kucanya na ŵantu pano pa caru capasi?

¹⁵ Paumariro pake Yehova wazamupokelera ŵantu ŵarunji wose awo ŵazamukhozgera Muwuso wa Ciuta pa nyengo ya ciyezgo caumariro, iwo ŵazamuŵa nga mbana ŵake. Kufuma pa nyengo iyo, iwo ŵazamusangwa comene na wanangwa wa ucindami wa ŵana ŵa Ciuta ndipo ŵazamuŵa ŵana ŵa mu mbumba ya Ciuta. Vilengiwa vyauzimu kucanya na ŵantu pano pa caru capasi, ŵazamukoleranaso pakumusopa iye nga ni Ciuta waunenesko yekha. Pa nyengo iyi cilato ca Yehova cizamuŵa kuti cafiskika mwaucindami! Kasi mukukhumba kuti muzakaŵe yumoza wa mu mbumba yacimwemwe iyi? Usange ndimo viliri, tikumupempani kuti mugwiriskire ncito ivyo Baibolo likuyowoya pa lemba la 1 Yohane 2:17: “Caru cikuruta na makhumbiro ghake, kweni uyo wakucita khumbo la Ciuta, wakukhalirira muyirayira.”

Kudumbiskana Mwakuweleramo

• Pambere cigaruka cikaŵa cindacitike mu Edeni, kasi mbukhaliro wuli uwo ukaŵapo pakati pa Yehova na ŵasopi wose?

• Ni ncito wuli iyo ŵateŵeti ŵa Ciuta ŵali nayo?

• Kasi mbanjani awo kuntazi ŵazamucemeka ŵana ŵa Ciuta, ndipo ni mwauli umo fundo iyi yikukolerana na cilato ca Yehova ca kusopa mwakukolerana?

[Mafumbo]

 [Cithuzithuzi pa peji 190]

Ŵantu ŵakupulikira ŵazamusangwa na umoyo mu paradiso wa pa caru cose