Mzinda Ukuru Pantazi pa Cizumbe ca Yehova
Cipaturo 13
Mzinda Ukuru Pantazi pa Cizumbe ca Yehova
1. (a) Kasi ncivici ico cikwenera kuŵacitikira ŵateŵeti ŵa Ciuta awo ŵakaŵako apo Cikristu kukaŵavya na ŵantu ŵakukwana 144,000 pambere ŵandapokere njombe yawo? (b) Ncintu wuli ico cicitikirenge “mzinda ukuru” uwo sono ngwamoyo?
ŴATEŴETI ŵakugomezgeka ŵa Ciuta kufuma pa Abelu mupaka pa Yohane Mbapatizi, ŵakaŵika khumbo la Ciuta kuŵa lakudanga mu umoyo wawo. Ndipouli, wose ŵalikufwa, ndipo ŵakulindizga kuti ŵazakawukiskike na kukhala na umoyo mu caru cipya ca Ciuta pano pa caru capasi. Ŵantu ŵakukwana 144,000, awo ŵamuwusira lumoza na Kristu mu Ufumu wa Ciuta kucanya, ŵakwenera kufwa danka kuti ŵapokere njombe yawo. Ndipouli, lemba la Civumbuzi 7:9 likurongora kuti mu mazuŵa gha ku umariro agha, kuŵenge “mzinda ukuru” wakufuma mu mitundu yose weneuwo ufwenge yayi, kweni uli na cilindizga ca kuzakakhala na umoyo wamuyirayira pano pa caru capasi. Kasi muli pakati pa mzinda uwu?
Kuwumanya Makora Mzinda Ukuru
2. Ncivici ico capangiska kuti mzinda ukuru uwo wazunurika pa Civumbuzi 7:9 umanyikwe makora?
2 Mu 1923, ŵateŵeti ŵa Yehova wakamanya kuti “mberere” izo zikazunurika mu ntharika ya Yesu iyo yikusangika pa Mateyu 25:31-46, na “mberere zinyake” izo zazunurika pa Yohane 10:16, zikwimira ŵantu awo ŵali na mwaŵi wakuzakakhala na umoyo wamuyirayira pano pa caru capasi. Mu 1931, ŵantu awo ŵazunurika pa Ezekiel 9:1-11, awo ŵakalembeka cimanyikwiro pa visko vyawo, nawo ŵakamanyikwa kuti ŵali na cilindizga ca kuzakakhala na umoyo pano pa caru capasi. Ndipo mu 1935 cikamanyikwa kuti mzinda ukuru ni gulu la mberere zinyake izo Yesu wakayowoya. Lero mzinda ukuru uwu ngwakukwana mamiliyoni ghanandi.
3. Ncifukwa wuli mazgu ghakuti ‘ukwimirira pantazi pa cizumbe’ ghakuyowoya za gulu lakuruta kucanya yayi?
3 Pa Civumbuzi 7:9, mzinda ukuru ukuwoneka nga ni para uli kucanya, kweni umu ndimo viliri yayi. Mazgu ghakuti ‘ukwimirira pantazi pa cizumbe’ ca Ciuta kuti ghakung’anamura kuti mzinda uwu uli kucanya yayi. Kweni ghakung’anamura kuti Ciuta wakuwuwona kufuma kucanya uko wali. (Salmo 11:4) Kuti timanye nadi kuti mzinda ukuru uwu, “uwo pakaŵavye muntu wakamanya kupenda,” ngwakukakhala kucanya yayi, cikuwoneka makora para tayaniska nambara yake yambura kumanyikwa na nambara yakumanyikwa iyo yazunurika pa Civumbuzi 7:4-8 na Civumbuzi 14:1-4. Malemba agha ghavumbura kuti ŵantu awo ŵafuma pano pasi kuruta kucanya mbakukwana 144,000.
4. (a) Kasi ncivici ico cili “cisuzgo cikuru” ico mzinda ukuru uzamupona? (b) Nga ni umo palembekera pa Civumbuzi 7:11, 12, kasi mbanjani awo ŵazamuwona mzinda ukuru na kukolerana nawo pakusopa?
4 Pakuyowoya za mzinda ukuru, lemba la Civumbuzi 7:14 likuti: “Ŵeneaŵa ndiŵo ŵafuma mu cisuzgo cikuru.” Iwo ŵazamupona suzgo yikuru comene yakuti ŵantu ŵandakumanepo nayo. (Mateyu 24:21) Pamanyuma pa kumuwonga Ciuta na Kristu cifukwa ca kuŵaponoska, vilengiwa vyose vyakugomezgeka kucanya vizamukolerana na mzinda ukuru uwu kuyowoya kuti: “Ameni! marumbo na ncindi, na vinjeru, na kuwonga, na thumbiko, na nkongono, na mankharo, viŵe kwa Ciuta withu muyirayira swi! Ameni!”—Civumbuzi 7:11, 12.
Kwenelera Ciponosko
5. Ncivici ico cikukhumbikwa kuti muntu waŵe yumoza wa mzinda ukuru?
5 Mzinda ukuru uzamuponoskeka pa cisuzgo cikuru mwakuyana na vipimo vyaurunji vya Yehova. Kuti ŵantu ŵazakaponoskeke, ŵakwenera kufiska viyeneresko ivyo vyarongosoreka mu Baibolo. Anteura, ncakwenelera kuti wose awo ŵakutemwa urunji ŵacitepo kantu sono kuti ŵazakaponoskeke. Kasi iwo ŵakwenera kucitaci?
6. Ncifukwa wuli ŵantu awo ŵakupanga mzinda ukuru ŵangacemeka nadi kuŵa mberere?
6 Mberere ni zakuzika ndiposo zikupulikira. Anteura apo Yesu wakayowonga kuti wali na mberere zinyake izo zamukhala kucanya yayi, iye wakang’anamuranga ŵantu awo ŵazamukhala na umoyo wamuyirayira pano pa caru capasi ndiposo awo ŵaŵenge ŵakupulikira visambizgo vyake. “Mberere zane zikupulika mazgu ghane, ndipo ine nkuzimanya, ndipo zikundirondezga.” (Yohane 10:16, 27) Mberere izi ni ŵantu awo ŵakutegherezga na kupulikira ivyo Yesu wakuyowoya, iwo mbasambiri ŵake.
7. Kasi ni mikhaliro wuli iyo ŵarondezgi ŵa Yesu ŵakwenera kuŵa nayo?
7 Kasi ni mikhaliro wuli yinyake iyo ŵarondezgi ŵa Yesu aŵa ŵakwenera kuŵa nayo? Mazgu gha Ciuta ghakuzgora kuti: ‘Muvule wuntu ukoroŵere uwo ngwakunangika . . . ndipo muvware wuntu upya, weneuwo wuli kulengeka mwakuyana na khumbo la Ciuta mu urunji na utuŵa wa unenesko.’ (Ŵaefeso 4:22-24) Iwo ŵakuŵa na mikhaliro iyo yikwiziska umoza pakati pa ŵateŵeti ŵa Ciuta, mikhaliro ya nga ni “kutemwa, cimwemwe, mtende, kuzizipizga, wezi, uweme, magomezgeko, kuzika, kujikora.”—Ŵagalatiya 5:22, 23.
8. Kasi ŵa mzinda ukuru ŵakumanenge na vici peneapo ŵakovwira kagulu ka ŵakukhalira?
8 Mzinda ukuru uwu ukuwovwira awo ŵali na cilindizga ca kukhala kucanya. Awo ŵamukhala kucanya aŵa ciŵerengero cawo ni cicoko waka, kweni ndiwo ŵakudangilira mulimo wa kupharazga. (Mateyu 24:14; 25:40) Nangauli mberere zinyake zikupereka wovwiri uwu, izo zikumanya kuti zikumanenge na suskano cifukwa apo mazuŵa gha ku umariro ghakayambanga, Yesu Kristu na ŵangelo ŵake ŵalikupondomoska Satana na viŵanda vyake kufuma kucanya. Ici cikung’anamura “soka ku caru ca pasi . . . cifukwa Satana wali kwikhira kwa imwe, wakuŵa na ukali ukuru, uku wakumanya kuti nyengo yake njicoko waka.” (Civumbuzi 12:7-12) Ici ndico cifukwa cake Satana wakususka comene ŵateŵeti ŵa Ciuta peneapo umariro wa nyengo iyi tilimo waneng’enera.
9. Ni mwauli umo ŵateŵeti ŵa Ciuta ŵarutira pantazi pakupharazga makani ghaweme, cifukwa wuli?
9 Nangauli pali ntambuzgo yikuru, ncito ya kupharazga yikurutilira kuya pantazi. Kufuma pa kagulu kacoko waka ka ŵapharazgi ako kakaŵako pa nyengo ya ku umariro kwa Nkondo Yakudanga ya Caru Cose, sono pali ŵapharazgi mamiliyoni, ici ncifukwa cakuti Yehova wakalayizga kuti: “Palije homwa ilo lafulikira iwe tilisakate.” (Yesaya 54:17) Yumoza wa khoti likuru la Ŵayuda wakazomerezga kuti ncito ya Ciuta yingajandizgika yayi. Pakuyowoya za ŵasambiri, wakaphalira Ŵafarisi ŵa mu virimika vya mu handiredi lakudanga kuti: ‘Muŵareke waka: pakuti usange fundo yeneiyi na mulimo weneuwu nvya ŵantu, viti vibwanganduke; kweni usange nvya Ciuta, kuti muti mumanyenge cara kuvibwangandula; mzire pakunji mungasangika kulimbana na Ciuta.’—Milimo 5:38, 39.
10. (a) Kasi “cimanyikwiro” ico cili na ŵa mzinda ukuru cikwimira vici? (b) Ni mwauli umo ŵateŵeti ŵa Ciuta ŵakupulikira ‘lizgu la kufuma kucanya’?
10 Ŵa mzinda ukuru ŵali na cimanyikwiro ca ciponosko. (Ezekiel 9:4-6) “Cimanyikwiro” ico ŵali naco mbukaboni wakuti ŵali kujipatura kuti ŵateŵetere Yehova, ndipo ŵali kubapatizika nga mbasambiri ŵa Yesu, ndiposo ŵakuyezgayezga kurondezga nkaro ya Kristu. Ŵakupulikira “lizgu” la “kufuma kucanya” ilo likuyowoya za Satana na gulu lake lose la cisopo cautesi la pa caru cose: “Fumaniko kwa iyo, mwa ŵantu ŵane, kuti mureke kusangana nayo [kugaŵana naye] zakwananga zake, na kuti mureke kupokako vilengo vyake.”—Civumbuzi 18:1-5.
11. Ni mwa ntowa wuli yakuzirwa iyo ŵa mzinda ukuru ŵakurongolera kuti mbateŵeti ŵa Ciuta?
11 Yesu wakaphaliraso ŵarondezgi ŵake kuti: “Na ceneici ndico ŵantu ŵose ŵati ŵamanyirenge kuti muli ŵasambiri ŵane, para mukutemwana.” (Yohane 13:35) Mwakupambana nkanira, ŵantu ŵa visopo vya caru ici ŵakukomana ŵekha-ŵekha mu nkondo, ici cikucitika cifukwa cakuti mba vyaru vyakupambana! Mazgu gha Ciuta ghakuti: “Mu ceneici ndimo ŵana ŵa Ciuta ŵakuvumbukwira, na ŵana ŵa Satana: yose uyo wakureka kucita urunji kuti ngwa Ciuta cara, panji uyo walive kutemwa mbali wake. . . . Titemwanenge: nga ndi Kayini cara, uyo wakaŵa wa muheni, ndipo wakakoma munung’una wake.”—1 Yohane 3:10-12.
12. Pa suzgo yikuru, ni mwauli umo Yehova wazamucitira na visopo ivyo vikuyana na ‘makuni’ agho ghakupasa vipasi viheni?
12 Yesu wakayowoya kuti: ‘khuni lose liweme likupasa vipasi viweme; kweni khuni liheni likupasa vipasi viheni. Khuni liweme kuti likumanya kupasa vipasi viheni cara, panji khuni liheni kupasa vipasi viweme. Khuni lose lambura kupasa vipasi viweme likutemeka, na kuponyeka mu moto. Nteura muti muŵamanyenge na vipasi vyaŵo.’ (Mateyu 7:17-20) Vipasi vya visopo vya caru vyarongora kuti visopo ivi ni ‘makuni’ ghaheni, ndipo sono-sono apa viparanyikenge na Yehova pa suzgo yikuru iyo yikwiza.—Civumbuzi 17:16.
13. Ni mwauli umo mzinda ukuru ukurongolera kuti mwakukolerana ‘wimirira pantazi za cizumbe’ ca Yehova?
13 Lemba la Civumbuzi 7:9-15 likuphara viyeneresko ivyo vizamupangiska mzinda ukuru kuzakaponoskeka. Mwakukolerana nkanira, mzinda ukuru uwu warongoreka kuti ‘wimirira pantazi pa cizumbe’ ca Yehova. Ici cikucitika mwakukhozgera muwuso ukuru wa Yehova. Mzinda ukuru ‘wasukutura [wacapa] minjirira yaŵo, ndipo ukayituŵiska mu ndopa za Mwana-mberere.’ Ici cikung’anamura kuti ŵakuzomerezga sembe ya Yesu yakuwombora ŵantu ku zakwananga. (Yohane 1:29) Iwo ŵajipereka kwa Ciuta ndipo ŵarongora kujipatulira kwawo mwakubapatizika mu maji. Anteura ŵakusangwa na ubwezi uweme na Ciuta, weneuwo warongoreka na minjirira yawo yituŵa, ndipo “ŵakumuteŵetera muhanya na usiku.” Kasi nkaro yinu yili na vigaŵa vinyake ivyo mukukhumbikira kusinta kuti yiyane na karongosolero ako kayowoyeka mu ndime yino?
Vyandulo Ivyo Vikusangika Sono
14. Kasi ni vyandulo wuli vyapadera ivyo ŵateŵeti ŵa Yehova ŵakuvisanga sono?
14 Mwambura kukayika, mwasanga vyandulo vyapadera ivyo vikusangika na ŵantu ŵekha awo ŵakuteŵetera Yehova. Mwaciyerezgero, peneapo mukasambira ntowa zaurunji za Yehova, mukapanikizga kuti pali cilindizga ciweme comene ca kuntazi. Anteura sono muli na cilato ciweme comene mu umoyo winu. Cilato cinu ncakuti muteŵetere Ciuta waunenesko uku muli na cilindizga cakuzakakhala na umoyo wamuyirayira mu paradiso pano pa caru capasi. Enya nadi, Themba Yesu Kristu ‘lizamkuŵarongozgera [ŵa mzinda ukuru] ku mbwibwi za maji gha umoyo.’—Civumbuzi 7:17.
15. Ni mwauli umo Ŵakaboni ŵa Yehova ŵakusangira candulo cifukwa ca kurondezga vipimo vyakakhaliro vya mu Baibolo vyakukhwaskana na ndyari na umoyo wa zuŵa na zuŵa?
15 Candulo cikuru ico ŵa mzinda ukuru ŵakusangwa naco ni citemwa, umoza na kukolerana uko ŵantu ŵa Yehova ŵali nako pa caru cose capasi. Cifukwa cakuti tose tikurya cakurya cauzimu cimoza, tose tikupulikira marango ghamoza na kurondezga vipimo vya kakhaliro vimoza ivyo vikufuma mu Mazgu gha Ciuta. Ici ndico cifukwa cake ndise ŵakugaŵikana yayi na ndyari panji kusankana mitundu. Kweniso, tikurondezga mikhaliro yapacanya comene iyo Ciuta wakukhumba kuti tiyirondezge. (1 Ŵakorinte 6:9-11) Anteura, m’malo mwakucita mphindano, kugaŵikana na kucita mikhaliro yiheni iyo njakuzara sono mu caru, ŵantu ŵa Yehova ŵakusangwa na paradiso wauzimu. Awonani umo paradiso uyu wakurongosorekera pa lemba la Yesaya 65:13, 14.
16. Mwambura kupwererako masuzgo agho ghazara, ni cilindizga wuli ico ŵa mzinda ukuru ŵali naco?
16 Ŵateŵeti ŵa Ciuta mbantu ŵambura urunji. Iwo ŵakukumana na masuzgo agho ŵantu ŵanandi ŵakukumana nagho mu caru, nga ndi kusuzgika cifukwa ca nkondo izo zikucitika. Nawo ŵakurwara, kusuzgika na kufwa. Ndipouli, ŵali na cigomezgo kuti mu caru cipya, Ciuta ‘wazamufyura sozi lose ku maso ghaŵo; ndipo nyifwa kuti yiti yizamuŵakoso cara; panji nesi citengero kuti citi cizamuŵakoso cara, nesi kulira, panji nesi kuŵinya.’—Civumbuzi 21:4.
17. Mwambura kupwererako za ivyo vingaticitikira sono, kasi ŵasopi ŵa Ciuta ŵali na muntazi mwa mtundu wuli?
17 Nangauli sono mungafwa cifukwa ca ucekuru, urwari, ngozi panji ntambuzgo, kweni Yehova wazamumuwukiskani mu Paradiso. (Milimo 24:15) Ndipo muzamurutilira kusangwa na ciphikiro cauzimu ca mu nyengo ya Muwuso wa Virimika Cikwi wa Kristu. Muzamumutemwa comene Ciuta peneapo muzamuwona vilato vyake vikufiskika. Ndiposo vitumbiko vyakuthupi ivyo Yehova wazamumutumbikani navyo vizamumupangiskani kuti murutilizge kumutemwa. (Yesaya 25:6-9) Mwee, ŵantu ŵa Ciuta wali na muntazi muweme comene!
Kudumbiskana Mwakuweleramo
• Kasi ncintu wuli capadera ico Baibolo likuyowoya cakukhwaskana na mzinda ukuru?
• Usange tikukhumba nadi kuti tiŵe ŵamoza ŵa mzinda ukuru, kasi tikwenera kucitaci?
• Ni mwauli umo mukuwonera vitumbiko ivyo mzinda ukuru ukusangwa navyo sono, na ivyo uzamusangwa navyo kuntazi mu caru cipya ca Ciuta?
[Mafumbo]
[Cithuzithuzi pa peji 123]
Mamiliyoni ghanandi gha mzinda ukuru ghakusopa Ciuta waunenesko
