Ni Mwauli Umo Yehova Wakurongozgera Gulu Lake?
Cipaturo 14
Ni Mwauli Umo Yehova Wakurongozgera Gulu Lake?
1. Ncimanyisko wuli ca gulu la Yehova ico Baibolo likuyowoya, ndipo ncifukwa wuli cimanyisko ici ncakuzirwa kwa ise?
KASI Ciuta wali na gulu? Malemba ghakutiphalira kuti wali nalo. Mu Mazgu ghake, wakutiphalira mwakudumura umo gulu lake la kucanya, ilo ndakucitiska wofi, liliri. (Ezekiel 1:1, 4-14; Daniel 7:9, 10, 13, 14) Nangauli gulu la kucanya ndambura kuwoneka, kweni likukhwaska ŵasopi ŵake ŵaunenesko lero. (2 Mathemba 6:15-17) Yehova waliso na gulu lakuwoneka ilo liri pano pa caru capasi. Baibolo likutovwira kuti tilimanye makora ndiposo umo Yehova wakulirongozgera.
Kumanya Gulu Lakuwoneka
2. Kasi ni mpingo wuli upya uwo Ciuta walikulinganizga?
2 Kwa virimika 1,545, mtundu wa Israyeli ukaŵa mpingo wa Yehova. (Milimo 7:38) Kweni mtundu wa Israyeli ukatondeka kusunga marango gha Ciuta ndiposo ukakana Mwana wake. Nga ncakufumapo cake, Yehova wakawukana mpingo wula ndipo wakawuleka. Yesu wakaphalira Ŵayuda kuti: “Henani, nyumba yinu yamukhalirani mapopa.” (Mateyu 23:38) Pamanyuma pake Ciuta wakalinganizga mpingo upya, ndipo wakapangana nawo pangano lipya. Mpingo uwu wuli na ŵantu ŵakukwana 144,000 awo ŵasankika na Ciuta. Ŵantu aŵa ŵamuŵira lumoza na Mwana wake kucanya.—Civumbuzi 14:1-4.
3. Ncivici ico cikacitika pa Pentekoste wa 33 C.E. ico cikaŵa ukaboni wakuti Ciuta wakamba kugwiriskira ncito mpingo upya?
3 Ŵantu ŵakwambilira ŵa mpingo uwu ŵakaphakazgika na mzimu utuŵa wa Yehova pa Pentekoste wa 33 C.E. Pakuyowoya za cakucitika capadera ici, tikuŵazga kuti: ‘Ndipo likati liza zuŵa la Pentekoste, wose ŵakaŵa pamoza mu malo ghamoza. Ndipo kwamabucibuci kukaŵa mpomo yakufuma kucanya nga ndi kuputa kwa mpepo ya nkongono, ndipo yikazura nyumba yose mwenemumo ŵakakhalanga. Ndipo ghakaŵawonekera malulimi ghakugaŵikana, nga ni moto; ndipo lulimi lukakhala pa wose yumoza-yumoza. Ndipo wose ŵakazuzgika na mzimu utuŵa.’ (Milimo 2:1-4) Mzimu utuŵa wa Ciuta ukaŵa ukaboni wakuti Ciuta wagwiriskirenge ncito ŵantu aŵa kuti wafiske vilato vyake kwizira mu urongozgi wa Yesu Kristu kucanya.
4. Kasi mbanjani lero awo ŵakupanga gulu la Yehova lakuwoneka?
4 Lero, pali ŵakukhalira ŵa gulu la 144,000 awo ŵali pano pa caru capasi. Kweni kuti ucimi wa Baibolo ufiskike, ŵantu awo ŵakupanga “mzinda ukuru” wa “mberere zinyake,” awo sono ŵakukwana mamiliyoni ghanandi, ŵakucitira vintu pamoza na ŵakukhalira ŵakuphakazgika. Yesu, Muliska Muweme, wagumatiska pamoza mberere zinyake izi na ŵantu ŵakukhalira kuti ŵapange mskambo umoza. Mskambo uwu ukurongozgeka na iye nga ni Muliska wake. (Civumbuzi 7:9; Yohane 10:11, 16) Magulu ghaŵiri agha ghakupanga mpingo umoza wakukolerana, uwo ukupanga gulu la Yehova lakuwoneka.
Gulu Ilo Likurongozgeka na Ciuta
5. Ni njani uyo wakurongozga gulu la Ciuta, mwauli?
5 Mazgu gha mu Malemba ghakuti “Ekleziya [mpingo] la Ciuta wamoyo” ghakurongora uyo wakurongozga mpingo uwu. Mpingo uwu ngwakuwusika na Ciuta. Yehova wakurongozga ŵantu ŵake kwizira mwa Yesu, uyo Ciuta wakamusanka kuŵa Mutu wa mpingo, ndiposo wakurongozga kwizira mu Mazgu Ghake ghakufunyilirika, Baibolo.—1 Timote 3:14, 15; Ŵaefeso 1:22, 23; 2 Timote 3:16, 17.
6. (a) Ni mwauli umo urongozgi wakufuma kucanya kuruta ku mpingo ukarongorekera mu virimika vya mu handiredi lakudanga? (b) Ncivici ico cikurongora kuti Yesu wacali Mutu wa mpingo?
6 Urongozgi wanteura uwo ukawoneka makora comene pa Pentekoste. (Milimo 2:14-18, 32, 33) Urongozgi uwu ukawoneka apo mungelo wa Yehova wakarongozga kuti makani ghaweme ghapharazgike kuno ku Africa, pa nyengo yinyake mazgu gha Yesu ghakapereka urongozgi wa kuphenduka kwa Saulos wa ku Tarso, ndiposo urongozgi unyake ukaperekeka apo Petros wakapharazganga ku ŵantu Ŵamitundu. (Milimo 8:26, 27; 9:3-7; 10:9-16, 19-22) Kweni mazgu ghakufuma kucanya mukuruta kwa nyengo ghakaleka. Ŵangelo ŵakaleka kuwoneka ndiposo vyawanangwa vya mzimu vikaleka kuperekeka. Kweni ndipera, Yesu wakalayizga kuti: “Ine ndiri namwe mazuŵa ghose mpaka ku umariro wa mgonezi.” (Mateyu 28:20; 1 Ŵakorinte 13:8) Lero, Ŵakaboni ŵa Yehova ŵakurondezga urongozgi wa Yesu. Kwambura urongozgi wake, ntena canguŵa camacitiko yayi kupharazga uthenga wa Ufumu mu nyengo za masuzgo.
7. (a) Kasi ni njani uyo wakupanga “muzga wa magomezgeko na wa vinjeru,” ndipo cifukwa wuli? (b) Ni ncito wuli iyo yilikuperekeka kwa “muzga” uyu?
7 Yikati yakhala nyengo yicoko waka wandafwe, Yesu wakaphalira ŵasambiri ŵake za “muzga wa magomezgeko na wa vinjeru” uyo iye nga ndi Mweneco, wali kumupa ncito yapadera. “Muzga” uyu wakaŵapo apo Yesu wakarutanga kucanya ndipo wakeneranga kurutirizga kugwira ncito mwankongono mupaka pa nyengo iyo Kristu wakiza mwambura kuwoneka mu nkongono ya Ufumu. Muzga wanteura uyo kuti wangaŵa muntu yumoza yayi, kweni wakwimira mpingo wa Kristu wakuphakazgika na mzimu. Pakuti walikuwugura na ndopa zake, ndico cifukwa cake Yesu wakawucema kuti “muzga” wake. Wakaphalira muzga wake kuti wapange ŵasambiri na kuŵapa vyakurya nyengo zose, enya, kuŵapa “vyakurya [vyauzimu] mu nyengo yakwenerera.”—Mateyu 24:45-47; 28:19; Yesaya 43:10; Luka 12:42; 1 Petros 4:10.
8. (a) Kasi gulu la muzga liri na ncito wuli? (b) Ncifukwa wuli ncakuzirwa kuti tizomerezge urongozgi uwo Ciuta wakupereka kwizira mwa muzga wake?
8 Cifukwa cakuti muzga wakagwiranga ncito mwakugomezgeka pa nyengo iyo Mweneco wa ncito wakiza mwambura kuwoneka mu 1914, pali ukaboni wakuti muzga uyu wakapika ncito yakusazgikira mu 1919. Mu virimika ivyo vyajumpa, paŵa ncito yakupharazga Ufumu pa caru cose capasi, ndipo mzinda ukuru wa ŵasopi ŵa Yehova ukuwunganiskika kuti uzakapone pa suzgo yikuru iyo yikwiza. (Mateyu 24:14, 21, 22; Civumbuzi 7:9, 10) Mzinda uwu ukukhumbikwiraso cakurya cauzimu, ndipo ukupokera cakurya ici kufuma kwa gulu la muzga. Kuti tikondweske Yehova, tikukhumbikwira kuzomera urongozgi uwo iye wakupereka kwizira mwa muzga wake na kuwugwiriskira ncito.
9, 10. (a) Mu virimika vya mu handiredi lakudanga, kasi pakaŵa ndondomeko wuli yakupwererera mafumbo agho ghakaŵako ghakukhwaskana na visambizgo vithu, na kupereka urongozgi wa kupharazga makani ghaweme? (b) Ni ndondomeko wuli iyo yilipo ya kendeskero ka ncito ya ŵantu ŵa Yehova lero?
9 Nyengo zinyake ŵantu ŵakufumba mafumbo ghakukhwaskana na visambizgo vithu ndiposo kendeskero ka ncito yithu. Kasi ncici ico cikwenera kucitika? Buku la Milimo cipaturo 15 likutiphalira umo nkani yakukhwaskana na Ŵamitundu awo ŵakaphenduka yikamazgikira makora. Nkani iyi yikaperekeka kwa ŵapostole na ŵanarumi ŵarara ku Yerusalemu, awo ŵakateŵeteranga nga ni wupu wakurongozga. Ŵanarumi aŵa kuti ŵakaŵavya zakwananga yayi, kweni Ciuta wakaŵagwiriskira ncito. Iwo ŵakasanda malemba ghakukhwaskana na nkani iyo yikaŵapo, ndiposo ŵakawona ukaboni wakuti mzimu wa Ciuta ukamba kugwira ncito pa ŵantu Ŵamitundu. Pamanyuma pakusanda uku ŵakakaka fundo. Ciuta wakatumbika manozgero agho ghakapangika. (Milimo 15:1-29; 16:4, 5) Wupu wakurongozga wula ukatuma ŵantu ku vigaŵa vyakupambana-pambana kuti ŵakapharazge makani gha Ufumu.
10 Mu nyengo yithu yino, Wupu Wakurongozga wa gulu la Yehova lakuwoneka ngwakupangika na ŵabali ŵakuphakazgika na mzimu awo mbakufuma mu vyaru vyakupambana-pambana. Wupu uwu wuli pa cinyina ca pa caru cose ca Ŵakaboni ŵa Yehova. Pasi pa urongozgi wa Yesu Kristu, Wupu Wakurongozga ukurutiska pantazi kusopa kwaunenesko mu caru cilicose, ndipo ukwendeska ncito ya upharazgi mu mipingo ya Ŵakaboni ŵa Yehova iyo sono yikukwana vikwi vinandi. Awo ŵali mu Wupu Wakurongozga ŵakugwiriskira ncito mazgu agho Paulos wakayowoya, iye wakalembera Ŵakristu kuti: “Kuti ncifukwa tikuwusa pa cipulikano cinu cara, kweni tiri ŵalimiŵanyinu ŵa cimwemwe cinu: cifukwa mu cipulikano cinu mukungangamika.”—2 Ŵakorinte 1:24.
11. (a) Ni mwauli umo ŵarara na ŵateŵeti ŵakuteŵetera ŵakwimikikira? (b) Ncifukwa wuli tikwenera kukolerana nawo ŵantu ŵakwimikika aŵa?
11 Ŵakaboni ŵa Yehova pa caru cose capasi ŵakulaŵiska ku Wupu Wakurongozga kuti usanke ŵabali ŵakwenereskeka, pamanyuma pake ŵabali aŵa ŵakupika mazaza ghakuti ŵazomerezge kwimikika kwa ŵarara na ŵateŵeti ŵakuteŵetera kuti ŵapwererere mipingo. Viyeneresko vya awo ŵimikika vilikurongosoreka mu Baibolo, ndipo awo ŵakuzomerezga kwimikika kwawo ŵakumanya kuti ŵarara na ŵateŵeti aŵa mbantu ŵambura urunji ndiposo ŵakubuda nyengo zinyake. Ŵarara awo ŵakuzomerezga na awo ŵakwimika ŵabali ŵali na ncito ya kuzirwa comene pamaso gha Ciuta. (1 Timote 3:1-10, 12, 13; Tito 1:5-9) Anteura ŵakupereka lurombo lwakuti mzimu wa Ciuta uŵawovwire ndiposo ŵakuthemba urongozgi wakufuma mu Mazgu ghake ghakufunyilirika. (Milimo 6:2-4, 6; 14:23) Tiyeni tiwongere ‘vyawanangwa mu ŵantu’ ivi, vyeneivyo vikutovwira ise tose kuti tifike ku “umoza wa cipulikano.”—Ŵaefeso 4:8, 11-16.
12. Ni mwauli umo Yehova wakugwiriskira ncito ŵanakazi mu gulu lake?
12 Malemba ghakurongora kuti udangiliri mu mpingo ukwenera kucitika na ŵanarumi. Ndondomeko iyi kuti yikuyuyura ŵanakazi yayi, pakuti ŵanakazi ŵanyake mbawusi ŵa Ufumu kucanya. Ndiposo ŵanyake ŵa iwo ndiwo ŵakupharazga comene. (Salmo 68:11, NW) Mwakusazgirapo, mwakupwererera makoraghene mbumba zawo, ŵanakazi ŵakupereka lumbiri luweme lwa mpingo. (Tito 2:3-5) Kweni kusambizga mu mpingo kukucitika na ŵanarumi ŵeneawo mbakwimikika kucita mulimo uwu.—1 Timote 2:12, 13.
13. (a) Kasi Baibolo likupereka urongozgi wuli ku ŵarara pakuyowoya za udindo uwo ŵali nawo? (b) Kasi ise tose tiri na mwaŵi wuli?
13 Mu caru capasi, muntu uyo wali na udindo ukuru wakuwoneka wakuzirwa, kweni mu gulu la Ciuta dango ndakuti: “Uyo ndi mucoko mwa imwe mose, mweneuyo ndi mukuru.” (Luka 9:46-48; 22:24-26) Malemba ghakurongozga ŵarara kuti ŵareke kuyuzga ŵantu ŵa Ciuta, kweni ŵakwenera kupereka ciyerezgero ciweme ku mskambo. (1 Petros 5:2, 3) Kuti mbantu ŵakusoreka ŵacoko waka yayi awo ŵakwimira Murara wa cilengiwa cose, kweni pali ŵanarumi na ŵanakazi awo mwakujiyuyura ŵakuyowoya za zina lake na kuphalira ŵantu kulikose uko ŵali pakuyowoya za Ufumu wake.
14. Mwakugwiriskira ncito malemba agho gharongoreka, zgorani mafumbo ghakurondezgapo agha.
14 Tikwenera kujifumba tekha kuti: ‘Kasi nkumanya makora na kuwongera umo Yehova wakurongozgera gulu lake lakuwoneka? Kasi kawonero kane ka vintu, kayowoyero kane na kacitiro kane ka vintu vikurongora nadi?’ Kuranguruka pa fundo zakurondezgapo izi kungatovwira ise tose kuti tijisande.
Usange nkujilambika nadi kwa Kristu uyo ni Mutu wa mpingo, ipo nkhwenera kucitaci nga ni umo malemba ghakurondezgapo agha ghakurongolera? (Mateyu 24:14; 28:19, 20; Yohane 13:34, 35)
Para nkuzomerezga vyawanangwa vyauzimu na ndondomeko ya kendeskero ka vintu kufuma kwa gulu la muzga na Wupu wake Wakurongozga, kasi nkucindika njani? (Luka 10:16)
Ni mwauli umo ise tose mu mpingo, comene-comene ŵarara, tikwenera kuwonerana? (Ŵaroma 12:10)
15. (a) Kasi kacitiro kithu ka vintu kurazga ku gulu la Yehova lakuwoneka kakuvumbura vici? (b) Ni mwauli umo tingarongolera kuti Dyabulosi ni mutesi, na kukondweska mtima wa Yehova?
15 Yehova wakutirongozga mazuŵa ghano kwizira mu gulu lake lakuwoneka ilo likurongozgeka na Kristu. Kacitiro kithu ka vintu kurazga ku manozgero agha kakuvumbura umo tikuwonera nkani ya muwuso. (Ŵahebere 13:17) Satana wacali kuyowoya utesi wakuti cilato cithu ncakuti tijikondweske tekha. Kweni para tikuteŵetera mu ntowa yakwenelera na kutceŵa vintu ivyo vingarongora kuti tikukhumba kujikondweska tekha, mbwenu tirongorenge kuti Dyabulosi ni mutesi. Usange tikutemwa na kucindika ŵarara na kukana ‘kurumba cisko’ ca waliyose, tikukondweska Yehova. (Yuda 16; Ŵahebere 13:7) Para tiri ŵakugomezgeka ku gulu la Yehova, tikurongora kuti Yehova ni Ciuta withu ndiposo tikukolerana pakumusopa.—1 Ŵakorinte 15:58.
Kudumbiskana Mwakuweleramo
• Kasi gulu la Yehova lakuwoneka ni ndini? Kasi cilato cake ncivici?
• Kasi uyo wali kwimikika kuŵa Mutu wa mpingo ni njani, ndipo ni manozgero wuli agho iye walikuŵika kuti wapereke urongozgi kwa ise?
• Kasi nkawonero wuli kaweme ako tikwenera kuŵa nako kurazga kwa awo ŵali mu gulu la Yehova?
[Mafumbo]
[Cithuzithuzi pa peji 133]
Yehova wakutirongozga kwizira mu gulu lake lakuwoneka ilo Kristu wakulirongozga
