Cipaturo 19

Rutilirani Kuyowoya Mazgu gha Ciuta na Cikanga

1. (a) Ni makani wuli ghaweme agho ŵasambiri ŵa Yesu ŵakapharazganga, ndipo ni mwauli umo Ŵayuda ŵanji ŵakacitira? (b) Ni mafumbo wuli agho tingajifumba?

 PAFUPIFUPI virimika 2,000 ivyo vyajumpa, Yesu Kristu, Mwana wa Ciuta, wakaphakazgika na mzimu kuŵa Themba la muntazi la caru cose. Yesu wakakomeka na ŵarwani ŵa visopo, kweni Yehova wakamuwuska ku ŵakufwa. Kwizira mwa Yesu, umoyo wamuyirayira ngwamacitiko. Ndipouli, peneapo ŵasambiri wa Yesu ŵakapharazganga pakweru makani ghaweme, ŵantu ŵakamba kuŵasuzga. Ŵanji ŵa iwo ŵakaŵikika mu jere, kuthyapulika na kuphalirika kuti ŵalekerethu kuyowoya za Yesu. (Milimo 4:1-3, 17; 5:17, 18, 40) Kasi ŵakenera kucitaci? Kasi muŵenge imwe nga mukacita wuli? Nga mukarutilira kupharazga mwacikanga?

2. (a) Ni nkani wuli yakukondweska iyo yikukhumbikwira kupharazgika mu nyengo yithu yino? (b) Ni njani uyo wali na udindo wakupharazga makani ghaweme?

² Mu 1914 Themba la Ufumu wa Ciuta, Yesu Kristu, likamba kuwuska kucanya ‘mukati mwa ŵarwani ŵake.’ (Salmo 110:2) Cakurondezgapo cake, Satana na viŵanda vyake ŵakapondomoskekera pa caru. (Civumbuzi 12:1-5, 7-12) Mazuŵa gha ku umariro gha mu nyengo yithu yino ghakamba. Peneapo nyengo iyi yikumara, Ciuta wazamutekenyura mgonezi wose wa Satana. (Daniel 2:44; Mateyu 24:21) Awo ŵazamupona ŵazamuŵa na cilindizga ca kuŵa na umoyo wamuyirayira mu paradiso  pa caru capasi. Usange mwasambira makani ghaweme agha, phalirani ŵanyinu. (Mateyu 24:14) Kweni pangaŵa vyakufumapo wuli?

3. (a) Ni mwauli umo ŵantu ŵakucitira para tikuŵapharazgira uthenga wa Ufumu? (b) Ni fumbo wuli ilo tikwenera kujifumba?

³ Peneapo mukupharazga makani ghaweme gha Ufumu, ŵanji ŵangakondweskeka nagho, kweni ŵanandi ŵangakondweskeka nagho cara. (Mateyu 24:37-39) Ŵanji ŵangamusekani panji kumususkani. Yesu wakacenjezga kuti nyengo zinyake ŵabali ŵinu ndiwo ŵangamususkani. (Luka 21:16-19) Awo mukusambira nawo sukulu panji kugwira nawo ncito ŵangamususkani. Mu vigaŵa vinyake vya caru, Ŵakaboni ŵa Yehova mbakuzomerezgeka cara na maboma. Para mungaŵa mu ukhaliro wakusuzga uwu, kasi mungarutilira kuyowoya mazgu gha Ciuta na cikanga na ‘kuŵa ŵakukhora mu cipulikano’?—1 Ŵakorinte 16:13.

Tingagomezganga Nkongono Zithu Cara

4. (a) Kuti tirongore kuti ndise ŵateŵeti ŵa Ciuta ŵakugomezgeka, kasi tikwenera kucitaci? (b) Ncifukwa wuli maungano gha Cikristu ngakuzirwa comene?

⁴ Ncakuzirwa comene kuŵa muteŵeti wa Yehova wakugomezgeka na kuthemba vintu viweme vyauzimu ivyo wapereka. Cimoza mwa vintu ivi ni maungano gha mpingo. Malemba ghakuticiska kuti tileke kukhala ku maungano. (Ŵahebere 10:23-25) Awo ŵakurutilira kuŵa Ŵakaboni ŵakugomezgeka ŵa Yehova, ŵakujipereka mwakusangika pa maungano nyengo zose pamoza na ŵasopi ŵanyawo. Pa maungano agha, cimanyisko cithu ca m’Malemba cikusazgikira. Ndiposo tikupulikiska makora unenesko na kunyolorera ntowa izo tingagwiriskilira ncito ivyo tikusambira. Tikuŵa paubwezi uweme na ŵabali ŵithu ŵa Cikristu apo tikusopa mwakukolerana na kukhozgeka kuti ticite khumbo la Ciuta. Mzimu wa  Yehova ukupereka urongozgi kwizira mu mpingo, ndipo kwizira mu mzimu uwu, Yesu wali pakati pithu.—Mateyu 18:20; Civumbuzi 3:6.

5. Para Ŵakaboni ŵa Yehova mbakukanizgika mu caru, kasi maungano ghakucitika wuli?

⁵ Kasi mukusangikapo pa maungano ghose nyengo zose na kugwiriskira ncito ivyo mukusambira? Nyengo zinyake, para Ŵakaboni ŵa Yehova mbakukanizgika mu caru, nciweme kucita maungano mu tumagulu tucoko-tucoko mu zinyumba. Malo na nyengo vingasinta ndipo nyengo zinyake kungaŵa kutali, maungano ghanyake ghangacitika pakati pa usiku. Kweni mwambura kupwererako za kuŵika umoyo pa urwani, ŵabali na ŵadumbu ŵakugomezgeka ŵakuyezgayezga kuti ŵasangikepo pa ungano uliwose.

6. Kasi tikurongora wuli kuti tikugomezga Yehova, ndipo ici cingatovwira wuli kurutilira kuyowoya mwacikanga?

⁶ Kugomezga Yehova kukukhora para tikuromba kwa iye mwakufumira pasi pa mtima nyengo zose, kumanya kuti tikukhumbikwira covwiro ca Ciuta. Kasi mukucita ici? Peneapo wakacitanga uteŵeti wake pa caru capasi, Yesu wakarombanga mwakuwerezgawerezga. (Luka 3:21; 6:12 ,13; 22:39-44) Ndipo pa usiku uwo wakakhala pacoko kuti wakomeke, wakaphalira ŵasambiri ŵake kuti: “Muŵe maso murombenge, mwakuti mureke kunjira mu kuyezgeka.” (Marko 14:38) Usange tikukumana na ŵantu ŵakususka uthenga wa Ufumu, tingaŵa pa ciyezgo ca kuleka kucita uteŵeti withu na mtima wose. Para ŵantu ŵakutiseka, panji kutizikizga, tingaghanaghana za kuleka mwakuti titceŵe masuzgo. Kweni para tingaromba mwakufumira pasi pa mtima mzimu wa Ciuta kuti utovwire kurutilira kuyowoya mwacikanga, tizamuvikilirika kuti titonde viyezgo.—Luka 11:13; Ŵaefeso 6:18-20.

 Nkani ya Kupharazga Mwacikanga

7. (a) Ncifukwa wuli nkani iyo yikusangika mu buku la Milimo njapadera comene kwa ise? (b) Zgorani mafumbo agho gharongoreka ku umariro wa ndime iyi, didimizgirani umo nkani iyi yiliri ya candulo kwa ise.

⁷ Nkani iyo yili mu buku la Milimo njapadera comene kwa ise tose. Yikutiphalira umo ŵapostole na ŵasambiri ŵakudanga—ŵantu ŵambura urunji nga ndise– umo ŵakatondera masuzgo na kurongora cikanga na kuŵa ŵakaboni ŵakugomezgeka ŵa Yehova. Tiyeni tisande nkani iyi na covwiro ca mafumbo ghakurondezgapo agha, na malemba agho gharongoreka. Peneapo tikucita nteura, ghanaghanirani umo imwe mungasangira candulo kufuma mu ivyo mukuŵazga.

Kasi ŵapostole ŵakaŵa ŵakusambira comene? Kasi ŵakaŵa ŵantu ŵacikanga mwakawiro, mwambura kupwererako kantu za ivyo vikacitika? (Yohane 18:17, 25-27; 20:19; Milimo 4:13)

Ncivici ico cikamovwira Petros kuyowoya na cikanga pa maso pa khoti la Ŵayuda leneilo likanyoza Mwana wa Ciuta? (Mateyu 10:19, 20; Milimo 4:8)

Kasi ŵapostole ŵakacitangaci mu masabata agho ŵakaŵa ŵandatorekere ku Sanhedrin? (Milimo 1:14; 2:1, 42)

Peneapo ŵarongozgi ŵakalangura ŵapostole kuti ŵalekerethu kuyowoya mu zina la Yesu, kasi Petros na Yohane ŵakazgora wuli? (Milimo 4:19, 20)

Ŵakati ŵafumiskika, kasi ŵapostole ŵakapempa covwiro kwa njani? Kasi iwo ŵakaromba kuti ntambuzgo yimare, panji vici? (Milimo 4:24-31)

Kasi Yehova wakaŵawovwira wuli apo ŵantu ŵakususka ŵakayezgayezga kulekeska ncito ya kupharazga? (Milimo 5:17-20)

 Ni mwauli umo ŵapostole ŵakarongolera kuti ŵakapulikiska cifukwa ico ŵakasutulikira? (Milimo 5:21, 41, 42)

Nanga ni apo ŵasambiri ŵanandi ŵakacimbilira ku vigaŵa vyakupambana-pambana cifukwa ca ntambuzgo, kasi iwo ŵakarutilira kucitaci? (Milimo 8:3, 4; 11:19-21)

8. Ni vyakufumapo wuli vyakukondweska ivyo ŵasambiri ŵakudanga ŵakasanga mu uteŵeti, ndipo ni mwauli umo ise tikunjizgikiramo mu ncito yakupharazga?

⁸ Ncito yakupharazga makani ghaweme yikaŵa yambura candulo cara. Pafupifupi ŵantu 3,000 ŵakabapatizika pa Pentekoste wa 33 C.E. “Ŵakupulikana na Fumu ŵakasazgikirangako kwakuruska, mizinda ya ŵanarumi na ŵanakazi wuwo.” (Milimo 2:41; 4:4; 5:14) Mu kuruta kwa nyengo, nanga ni muntu uyo wakasuzganga comene ŵantu ŵa Ciuta, Saulos wa ku Tarso, wakazgoka Mkristu ndipo wakamba kupharazga unenesko mwacikanga. Wakamanyikwanga na zina lakuti mpostole Paulos. (Ŵagalatiya 1:22-24) Ncito iyo yikamba mu virimika vya mu handiredi lakudanga yindamare cara. Yikuruta pantazi comene mu mazuŵa gha umariro agha ndipo yafika mu vigaŵa vyose vya caru. Tiri na mwaŵi wakupharazga, ndipo peneapo tikucita nteura, tingasambira ku ciyerezgero ico ŵakarongora ŵakaboni ŵakugomezgeka aŵo ŵakateŵetera mu nyengo zakale.

9. (a) Kasi ni ntowa wuli izo Paulos wakagwiriskiranga ncito pa kupharazga? (b) Ni ntowa wuli izo imwe mukupharazgira uthenga wa Ufumu ku ŵanji?

⁹ Apo Paulos wakasambira unenesko wakuyowoya za Yesu Kristu, kasi wakacitaci? ‘Nyengo yeneyiyo wakapharazganga kuti Yesu ndiye Mwana wa Ciuta.’ (Milimo 9:20) Wakawongera comene lusungu ulo Ciuta wakarongora kwa iye, ndipo wakamanya kuti waliyose  wakukhumbikwira makani ghaweme agho iye wakasambira. Paulos wakaŵa Muyuda, ndipo mwakuyana na mudauko wa nyengo iyo, wakarutanga ku sunagoge kukapharazga. Wakapharazgangaso kunyumba na nyumba na kudumbiskana na ŵantu pa musika. Wakaŵa wakunozgeka kuruta ku malo ghacilendo kukapharazga makani ghaweme.—Milimo 17:17; 20:20; Ŵaroma 15:23, 24.

10. (a) Kasi Paulos wakarongora wuli kuti nangauli wakaŵa na cikanga, wakapharazganga mwa vinjeru? (b)Kasi tingarongora wuli mikhaliro iyo Paulos wakarongora para tikupharazgira ŵabali withu, awo tikugwira nawo ncito, panji awo tikusambira nawo sukulu?

¹⁰ Paulos wakaŵa wacikanga kweniso wavinjeru, ndipo ise tikwenera kuŵa ŵanteura. Ku Ŵayuda cidumbirano cake cikazikika pa layizgano ilo Ciuta wakaphalira ŵawiskewokuru. Ku Ŵagiriki cidumbirano cikazikika pa vintu ivyo ŵakavimanyanga kale. Nyengo zinyake wakagwiriskiranga ncito vyakukumana navyo vyake nga ni ntowa ya kucitira ukaboni. Iye wakati: ‘Nkucitira cifukwa ca ivangeli, mwakuti ndiŵe wakusangana na ŵanji.’—1 Ŵakorinte 9:20-23; Milimo 22:3-21.

11. (a) Kasi Paulos wakacitaci kuti ŵatceŵe kulimbana na ŵakususka? (b) Ni pauli apo tingarondezga ciyerezgero ca Paulos, ndipo mwauli? (c) Kasi nkongono zikufuma nku kuti tirutilire kupharazga mwacikanga?

¹¹ Peneapo Paulos wakawona kuti ncamahara kukapharazga kunyake cifukwa ca ŵantu ŵakususka, iye wakarutanga ku cigaŵa cinyake kuti waleke kulimbana nawo. (Milimo 14:5-7; 18:5-7; Ŵaroma 12:18) Wakakhozgekanga soni na makani ghaweme cara. (Ŵaroma 1:16) Nangauli Paulos wakakondwanga cara na kunyozeka panji kutimbika na ŵantu ŵakususka, iye ‘wakakhoma mtima mwa Ciuta withu’ na kurutirizga kupharazga. Iye wakati: ‘Fumu yikimirira nane pamoza, ndipo yikandikhomeska, mwakuti mwa ine uthenga  upharazgike nkanira.’ (1 Ŵatesalonika 2:2; 2 Timote 4:17) Mutu wa mpingo wa Cikristu, Yesu, wakurutirizga kupereka nkongono izo tikukhumbikwira mwakuti ticite ncito iyo yikayowoyekerathu kuti yizamucitika mu nyengo yithu.—Marko 13:10.

12. Ncivici ico cikurongora kuti Ŵakristu mbacikanga, ndipo cikuzikika pa vici?

¹² Tiri na vifukwa vyakukwana kurutilira kuyowoya mazgu gha Ciuta mwacikanga, nga ni umo Yesu na ŵateŵeti ŵanji ŵakugomezgeka ŵakacitira mu virimika vya mu handiredi lakudanga. Ici kuti cikung’anamura kuleka kughanaghanira panji kucicizga awo ŵakukana uthenga. Kweni tikuleka cara cifukwa cakuti ŵantu mbambura kukondweskeka; nesi cifukwa ca suskano. Nga ni Yesu, tikurongora kuti Ufumu wa Ciuta ndiwo wekha wakwenerera kuwusa caru. Tikupharazga na cigomezgo cose cifukwa tikwimira Yehova, Muwusi wa Cilengiwa Cose, na kuti uthenga uwo tikupharazga ngwithu cara kweni ngwa iye. Kutemwa kwithu Yehova ndiko kukwenera kuticiska kuti timurumbenge.—Ŵafilipi 1:27, 28; 1 Ŵatesalonika 2:13.

Kudumbiskana Mwakuweleramo

• Ncifukwa wuli ncakuzirwa kupharazgira waliyose uthenga wa Ufumu, kweni pangaŵa vyakufumapo wuli?

• Tingarongora wuli kuti tikugomezga nkongono zithu yayi para tikuteŵetera Yehova?

• Ni masambiro wuli ghakovwira agho tikusambira mu buku la Milimo?

[Mafumbo]

 [Cithuzithuzi pa peji 173]

Nga ni mu nyengo zakale, ŵateŵeti ŵa Yehova lero ŵakuyowoya mazgu gha Ciuta na cikanga