KASI ukumanya ivyo kasungwana aka kakuyowoya? Kakuphalira mwanakazi uyu za Elisha, nchimi ya Yehova, na vinthu vyakuziziswa ivyo Yehova wakumovwira kucita. Mwanakazi uyu wakumumanya yayi Yehova cifukwa ni Muisrayeli cara. Ipo tiye tiwone cifukwa ico kasungwana aka kakusangikira mu nyumba ya mwanakazi uyu.

Mwanakazi uyu ni Musiriya. Mfumu wake ni Namani, mulara wa ŵasilikari ŵaku Siriya. Ŵasilikari ŵaku Siriya ŵakakora kasungwana ka Ciisrayeli aka ku nkhondo, ndipo ŵakiza nako kwa muwoli wa Namani kuti kaŵe muteŵeti wake.

Namani wakaŵa na nthenda yiheni ya vyoni. Nthenda iyi yingapangiska munofu wa munthu kunyeka. Kasungwana aka kakaphalira muwoli wa Namani kuti: ‘Usange Sekuru wane wangaluta kwa nchimi ya Yehova ku Israyeli, mbwenu yamumucizga vyoni vyake.’ Nyengo yikati yajumphapo mfumu wa mwanakazi yula wakaphalirika mazgu agha.

Namani wakakhumba comene kuti wacire; ntheura wakaghanaghana za kuluta ku Israyeli. Wakati wafika ku Israyeli, wakaluta ku nyumba ya Elisha. Elisha wakatuma muteŵeti wake kuti waphalire Namani kuti wakageze kankhondi na kaŵiri mu Mronga wa Yorodani. Ici cikakwiyiska comene Namani, ndipo wakati: ‘Mironga ya kukaya njiwemi kuluska mironga yose ya mu Israyeli!’ Wati wayowoya mazgu agha, Namani wakazgoka na kuwelera.

Kweni yumoza wa ŵateŵeti ŵake wakamuphalira kuti: ‘Sekuru wane, usange Elisha wamuphaliraninge kuti mucite cinthu cinyake cakusuzga, mwatenge mucitenge. Sono kasi mwalekeraci kukageza waka nga ni umo wayowoyera?’ Namani wakapulikira muteŵeti wake ndipo wakaluta na kubira mu Mronga wa Yorodani kankhondi na kaŵiri. Wati wacita ntheura, thupi lake likaŵa liwemi na la nkhongono!

Namani wakakondwa comene. Wakawelera kwa Elisha na kumuphalira kuti: ‘Sono namanya kuti Ciuta wa Ŵaisrayeli ndiyo yekha Ciuta waunenesko pa caru cose capasi. Ntheura, naŵeya, pokelani cawanangwa ici.’ Kweni Elisha wakazgora kuti: ‘Yayi, nipokenge cara.’ Elisha wakamanya kuti mbuheni kupoka cawanangwa, cifukwa ni Yehova uyo wakacizga Namani. Kweni Gehazi, muteŵeti wa Elisha, wakakhumba kuti cawanangwa cira ciŵe cake.

Antheura ici ndico Gehazi wakacita. Namani wati waluta, Gehazi wakacimbira pamanyuma pake na kumulondezga. ‘Elisha wanituma kuti nimuphalirani kuti mumupeko cawanangwa cicoko waka cifukwa ca ŵalendo awo ŵiza kuzakamucezgera,’ Gehazi wakayowoya mwantheura. Uwu ukaŵa utesi wa zanimuwone. Kweni Namani wakamanya yayi kuti mbutesi; wakapeleka vinyake mwa vinthu ivyo wakaŵa navyo kwa Gehazi.

Gehazi wati wawelera ku nyumba, Elisha wakamanya ivyo wacita. Yehova wakamuphalira. Mwantheura wakati: ‘Cifukwa cakuti wacita cinthu ciheni ici, vyoni vya Namani vizenge kwa iwe.’ Ndipo nyengo yeneiyo vikiza nadi!

Kasi tingatorapo sambiro wuli pa cakucitika ici? Cakwamba, tikwenera kuŵa nga nkhasungwana kara ako kakayowoya za Yehova. Kucita ntheura kungatipa vinthu viwemi vinandi. Caciŵiri, tikwenera cara kuŵa ŵakujikuzga nga ni umo Namani wakaŵira pakwamba, kweni tikwenera kupulikira ŵateŵeti ŵa Ciuta. Ndipo Cacitatu, tikwenera yayi kuyowoya utesi nga ni umo Gehazi wakacitira. Kasi tingasambira vinandi yayi usange tikuŵazga Baibolo?