ŴATI ŵafuma mu cipinda ca pacanya, Yesu na ŵapositole ŵake ŵakaluta ku munda wa Getisemane. Aka kuti kakaŵa kakwamba yayi kwiza ku malo agha. Yesu wakaŵaphalira kuti ŵaŵe maso na kulomba. Wati wendapo mtunda ucoko, wakasindamira pasi kuti walombe.

Pati pajumpha nyengo yicoko waka Yesu wakizaso uko kukaŵa ŵapositole ŵake. Kasi ukughanaghana kuti iwo ŵakacitanga vici? Ŵakaŵa mu tulo! Kwa nyengo zitatu Yesu wakaŵaphalira kuti ŵakeneranga kuŵa maso, kweni palipose para wakizanga wakaŵasanganga kuti ŵagona. Wati wizaso pa ulendo waumaliro Yesu wakati: ‘Kasi mungagona wuli pa nyengo ya nga ni iyi? Wonani! Nyengo yakwana yakuti ine nipelekeke ku ŵalwani ŵane.’

Pa nyengo yeneiyo vyongo vya wumba ukuru vikamba kupulikikwa. Wona! Ŵanalume aŵa ŵakwiza na malupanga na nthonga! Ndipo ŵayegha miliko kuti yiŵape ungweru. Ŵakati ŵafika pafupi, munthu munyake wakafuma mu wumba na kwiza kwa Yesu. Wakamufyofyontha nga ni umo ukuwonera apa. Munthu uyu ni Yuda Isikariyote! Kasi nchifukwa wuli wakufyofyontha Yesu?

Yesu wakafumba kuti: ‘Yuda, kasi ukunipeleka na mufyofyontho?’ Enya, mufyofyontho uwu nchimanyikwiro. Ukawovwira ŵanalume awo ŵakaŵa na Yuda kumanya kuti Yesu uyo ŵakukhumba ni uyu. Ntheura ŵalwani ŵa Yesu ŵakiza na kumukora. Kweni Petrosi wakazomerezga yayi kuti ŵatore waka Yesu kwambura mbembe. Wakasolora lupanga na kutimba nalo munthu uyo wakaŵa nayo pafupi. Lupanga likawinda pacoko waka mutu wa munthu ndipo m’malo mwake likawunguzura khutu lake la maryero. Kweni Yesu wakakhwaska khutu la munthu uyu na kumucizga.

Yesu wakaphalira Petrosi kuti: ‘Wezgera lupanga lwako mu malo ghake. Kasi ukumanya yayi kuti ningalomba mipingo ya ŵangelo kwa Ŵadada kuti ŵanithaske?’ Enya, nthena wakacita ntheura! Kweni Yesu wakalomba yayi kuti Ciuta wamutumire ŵangelo, cifukwa wakamanya kuti nyengo yakwana yakuti ŵalwani ŵake ŵamukore. Mwantheura wakaŵazomerezga kuti ŵalute nayo. Tiye tiwone ico cikamucitikira Yesu.