O! O! Nchivici cikucitika apa? Kasi msepuka uyo wagona pasi wajipweteka comene? Awona! Yumoza mwa ŵanalume awo ŵakufumira kuwaro kwa nyumba ni Paulosi! Kasi wamuwona Timote apa? Kasi msepuka uyu wanguwa kufuma pa windo?

Enya, ici ndico cacitika. Paulosi wakayowoyanga nkhani ku ŵasambiri mu Tirowa. Wakamanya kuti wawonanenge nawo yayi kwa nyengo yitali cifukwa namacero ghake wakeneranga kuluta ku malo ghanyake. Antheura wakalutizga kuyowoya nkhani mupaka pakati pa usiku.

Msepuka uyu, uyo zina lake ni Yutuko, wakakhala pafupi na windo ndipo wakasiwanga. Wakasondomoka kufuma pa windo la nyumba yakudikanya yacitatu ndipo wakawa pasi dweku! Nawe ungawona kuti ndico cifukwa cake ŵanthu mbacitima comene apa. Apo ŵanalume ŵakamunyamura msepuka uyu, ŵakamusanga nadi umo ŵakaghanaghaniranga. Wakafwa!

Apo Paulosi wakawona kuti msepuka wafwa, wakasindama pa iyo na kumukumbatira. Pamanyuma pake wakati: ‘Kudandaura yayi. Wali makora!’ Ndimo viliri nadi! Cakuziziswa cacitika! Paulosi wakawukiska msepuka ku nyifwa! Ŵanthu wose awo ŵalipo mbacimwemwe comene.

Pamanyuma pake ŵakalutaso pa nyumba yapacanya iyo ŵanguŵamo kuti ŵakarye cakurya. Paulosi wakalutizga kuyowoya nkhani mupaka kukaca. Nchakuwonekerathu kuti Yutuko wakasiwangaso yayi! Pamanyuma pake Paulosi, Timote na awo ŵakaŵa nawo pa ulendo ŵakakwera ngaraŵa. Kasi ukumanya uko ŵakaluta?

Paulosi wakamalizga ulendo wake wacitatu wa kupharazga ndipo wakaŵa pa ulendo kuwelera kukwake. Pa ulendo uwu, Paulosi wakakhala vilimika vitatu mu msumba wa Efeso. Ulendo uwu ukaŵa utali comene kuluska waciŵiri.

Ngaraŵa yikati yanyamuka ku Tirowa, yikima kwa nyengo yicoko waka pa Mileto. Pakuti msumba wa Efeso ukaŵa kutari yayi na Mileto, Paulosi wakatuma uthenga kuti ŵalara ŵa mpingo wa mu Efeso ŵize ku Mileto kuti wazakayowoye nawo kwaumaliro. Nyengo yikati yalutapo, ngaraŵa yikanyamuka, ndipo ŵakaŵa na citima comene kuwona Paulosi wakuluta!

Paumaliro pake ngaraŵa yikafika ku Kesareya. Peneapo Paulosi wakakhalanga mu nyumba ya musambiri Filipu, nchimi Agabo yikacenjezga Paulosi. Yikayowoya kuti Paulosi wazamukakika para wangaluta ku Yerusalemu. Vinthu vikacitika ndendende umo nchimi yikayowoyera. Pamanyuma pake, wati wakhala mu jere vilimika viŵiri mu Kesareya, Paulosi wakatumizgika ku Roma kuti wakeruzgike na Kesare, muwusi wa Roma. Tiye tiwone ico cikacitika apo wakalutanga ku Roma.