WONA makuni ghatali, maluŵa ghakutowa na mapiri ghatali. Kasi apa mphakutowa yayi? Wona nyiska iyo yikuryera pa woko la musepuka. Wonani nkharamu na ŵakavalo (mahaci), vyose vili pa malo apo pali utheka. Kasi ungatemwa kukhala mu nyumba iyo yingaŵa pa malo ghanthena agha?

Ciuta wakukhumba kuti uzakakhale na umoyo wamuyirayira mu paradiso pano pa caru capasi. Iyo wakukhumba yayi kuti usuzgikenge na vyakuŵinya ivyo ŵanthu ŵakusuzgika navyo lero. Pano pali layizgano ilo Baibolo likuphalira awo ŵazamukhala mu paradiso muphya: ‘Ciuta wazamuŵa nawo. Nyifwa yizamuŵakoso yayi; panji nesi kulira panji vyakuŵinya. Vyakale vyose vizamumara.’

Yesu wazamuwoneseska kuti vinthu vyose viwemi ivi vizakacitike. Kasi ukumanya apo vizamucitikira? Nadi, vizamucitika para Yesu wazakatozga caru capasi na kuwuskapo uheni wose na ŵanthu ŵaheni. Kumbuka kuti apo Yesu wakaŵa pano pa caru capasi, wakacizga matenda ghaliyose, ndiposo wakawuska ŵanthu ŵakufwa. Yesu wakacita ivi kuti walongore ivyo wazamucita munthazi pa caru cose capasi apo wazamuwusa nga ni Fumu ya Ufumu wa Ciuta.

Aghanaghanira waka umo umoyo uzamuŵira wakukondweska mu paradiso muphya uyo wazamuŵa pano pa caru capasi! Yesu, pamoza na ŵanthu ŵanyake awo wali kuŵasankha ŵazamuwusanga kucanya. Ŵazamupwelelera ŵanthu wose pano pa caru capasi na kuwona kuti waliyose ngwakukondwa. Tisambirenge ivyo tikwenera kucita kuti Ciuta wazakatipe umoyo wamuyirayira mu paradiso wake muphya.