ILI ni buku la nkhani izo zikacitika nadi. Nkhani zake zatoleka mu Buku lakuzirwa kuluska mabuku ghose pa caru capasi, Baibolo. Zikulongosora mbiri ya caru kufuma apo Ciuta wakayamba kulenga caru mupaka kufika lero. Zikuyowoyaso ivyo Ciuta wakulayizga kuti wazamucita munthazi.

Buku ili likupeleka cithuzithuzi ca ivyo vili mu Baibolo. Likuyowoya za ŵanthu ŵa mu Baibolo na vinthu ivyo ŵakacita. Likuyowoyaso za cilindizga ca umoyo wamuyirayira pa caru capasi ca paradiso ico Ciuta wapeleka ku ŵanthu.

Buku ili liri na nkhani zakukwana 116. Nkhani izi zaŵikika mu vigaŵa eyiti. Peji lakwamba la cigaŵa cilicose likuyowoya mwakudumura za ivyo vili mu cigaŵa ico. Nkhani izi zili mu ndondomeko ya umo vinthu vikacitikira mu mbiri. Ici cimovwiraninge kuti mumanye nyengo iyo cakucitika cilicose cikacitikira mu mdauko.

Nkhani zake ni zambura kusuzga kupulikiska. Ŵanandi ŵa imwe ŵana ŵacoko muŵazgenge pamwekha. Mwa ŵapapi musangenge kuti ŵana ŵinu ŵacoko ŵazamuŵa ŵakukondwa kuŵaŵazgira nkhani izi nyengo na nyengo. Muwonenge kuti buku ili ndakukondweska comene ku ŵana na ŵalara wuwo.

Mavesi gha mu Baibolo ghalembeka paumaliro pa nkhani yiliyose. Tikumuciskani kuti muŵazge mavesi agha mwenemumo mwafuma nkhani izi. Para mwamara kuŵazga nkhani yiliyose, wonani mafumbo gha nkhani iyo mwaŵazga, agho ghakwambira panthazi pa Nkhani Nambara 116.