Ŵanthu ŵanandi awo tasambira mu buku ili mbawukirano awo ‘ŵakakumbuka Mlengi wawo Mukuru mu mazuŵa gha uwukirano wawo.’ (Muph. 12:1) Mu Georgia muli ŵapayiniya 3,197, ndipo ŵanandi ŵali na vyaka 25 kukhilira pasi. Chifukwa wuli mu charu ichi ŵawukirano ŵanandi ŵakuchita makora nthena?

Ukaboni ukulongora kuti pali vifukwa vinandi. Chakwamba, mbumba za ku charu ichi zikutemwa kuchezga pamoza ndipo ni zakukolerana. Konstantine, uyo wali kovwira ŵana ŵake 5 kusambira unenesko, wakulongosora kuti: “Icho chikanovwira ine kuti nisambire unenesko ni fundo yakuti Yehova ni Dada wachitemwa. Ntheura nkhati naŵa dada, nkhakhumbanga chomene kovwira ŵana ŵane kuti ŵafwatukenge nane.”

Malkhazi na muwoli wake, ŵali na ŵana ŵatatu, ndipo ŵakulimbikira chomene kuti wose pa nyumba yawo ŵatemwanenge  na kufwatukirana. Malkhazi wakuti: “Nyengo na nyengo tikuŵafumba ŵana ŵithu kuti ŵayowoye umo ŵakutiwonera ise taŵapapi ŵawo, kweniso ŵana ŵanyawo. Kufuma apo, tikuŵapempha kuti ŵazakayowoye maghanoghano ghawo pa kusopa kwa mbumba. Pa chifukwa ichi, ŵana ŵithu ŵasambira kuwonamo viwemi mu ŵanji na kuŵawonga.”

Pakukhumba kovwira ŵapapi kusambizga ŵana, ŵalara mu mpingo ŵakutendekera kuŵapa vyakuchita ŵawukirano. Nestori, uyo wakabatizika wali na vilimika 11, wakuti: “Ŵalara ŵakamba kunipa tumilimo pa mpingo nichali mwanichi. Ivi vyanovwira kuti nane nijiwonenge kuti nili chigaŵa cha mpingo.”

Chinyake icho chikovwira ŵana kukura makora ni para pa mpingo pali ŵabali awo ŵakuchita makora mwauzimu kweniso ŵalara awo ŵakujipeleka kovwirapo. Koba, mukuru wa Nestori, wakuti: “Apo nkhaŵa muwukirano nkhaŵa wamphuvya chomene, kupambana na ŵanung’una ŵane. Mulara yumoza  wachinyamata, uyo wakaŵa chiyelezgero chiwemi chomene kwa ine, ndiyo wakanipulikiskanga ndipo wakaneruzganga yayi. Mubali uyu ndiyo wakanovwira chomene kuti niwelere kwa Yehova.”

Pasono, Nestori na Koba, pamoza na mudumbu wawo Mari, ŵakuteŵetera lumoza ku chigaŵa chinyake chakutali. Koba wakuti “Sono nili wakukhorwa na umoyo!”

Pakukhumba kovwira ŵapapi pa ntchito yawo ya kulera ŵana, ofesi ya munthavi yikupempha ŵawukirano kuti ŵagwireko ntchito zinyake zaufumu. Mubali munyake wa mu Komiti ya Munthavi wakuti: “Tikuŵatemwa ŵawukirano ŵithu, ntheura tikuyezga kuŵawovwira apo ŵakulimbikira kuti ŵafiske vilato vyawo vyauzimu.”

Para ŵawukirano ŵakugwira ntchito kweniso kuchezga na ŵabali na ŵadumbu ŵakukhwima mwauzimu, ŵakovwirika chomene. Mamuka, wakagwirapo ntchito ya kuzenga Nyumba Yakuchitiramo Maungano Ghakuru ku Tbilisi pamoza na ŵabali ŵakufuma ku vyaru vinyake. Iyo wakuyowoya umo ivi vyamovwilira, wakuti: “Nasambira vinandi chomene kufuma ku ŵabali aŵa chifukwa cha kugwira nawo ntchito. Padera pakusambira maluso pa ntchito ya kuzenga, nili kusambirakoso vinthu vinandi vyauzimu.”

Ŵawukirano ŵanandi ku Georgia ŵakuchita makora chomene mwauzimu chifukwa cha kutemwana na kufwatukirana mu mbumba, kukhwimiskika na ŵalara, kweniso kusambira kufuma ku ŵabali awo ŵakuchita makora mu mpingo. Ŵapapi ŵawo ŵakukondwa nga umo wakakondwera mpositole Yohane, uyo wakalemba kuti: “Palije chinyake icho chikunikondweska chomene kuluska ichi, chakuti nipulikenge kuti ŵana ŵane ŵakulutilira kwenda mu unenesko.”—3 Yoh. 4.

Mu 2013, Wupu Wakulongozga ukapempha minthavi yose kuti yiwone usange mabuku ghithu ghangang’anamulikaso mu viyowoyero vinyake vya mu vigaŵa vyawo. Chilato chake chikaŵa chakuti makani ghawemi ghafike ku ŵanthu ŵanandi.

Ntheura, munthavi wa ku Georgia ukamba kung’anamulira mabuku ghanyake mu Chisvan na Chimangrelia, viyowoyero ivyo vikuyanako na Chigeorgia.

Ŵapayiniya ŵakujipeleka ŵa ku chigaŵa cha Svaneti ŵakalemba kuti: “Ŵanthu ŵa mtundu wa Svan ŵakutemwa chomene vinthu vyauzimu ndipo ŵakulichindika chomene Baibolo. Nanga ni awo pakwamba ŵakakhumbanga yayi kupoka mabuku ghithu sono ŵakupoka kwambura suzgo mabuku agho ghali kung’anamulika mu chiyowoyero chawo chakonkhera.”

 Ŵapharazgi wose awo ŵakuyowoya Chimingrelia ŵakakondwa chomene ŵakati ŵamba kuchita maungano mu chiyowoyero chawo chakonkhera. Giga, mupayiniya wachinyamata, wakuti: “Sono pa maungano nkhuzgora mu mazgu ghane na ghane. Nkhusuzgikaso yayi kuti ning’anamulire dankha zgoro mu mtima.”

Zuri, mulara mu mpingo wa chiyowoyero cha Chimingrelia ku Tkaia, wakuti: “Pa umoyo wane nawona vinthu vinandi vyakukondweska na vyachitima, kweni nindathiskepo masozi. Ndipouli, tikati tamba kwimba sumu za Ufumu mu Chimingrelia pa maungano, pakaŵavya uyo wakaleka kuthiska masozi, tose na ine wuwo.”

Chinthu chinyake chapadera mu mdauko wa Ŵakaboni ku Georgia chikachitika pa Chisulo, Epulero 6, 2013, apo David  Splane wa mu Wupu Wakulongozga wakayowoya nkhani ya kujulira ofesi ya munthavi iyo ŵakayinozgaso, Nyumba Yakuchitiramo Maungano Ghakuru, na sukulu yakusambizga Baibolo. Pa ungano uwu pakiza ŵalendo 338 ŵakufuma mu vyaru 24, ndipo Ŵakaboni ŵa mu charu ichi ŵakaŵapokelera na mtima wose na kuŵagoneka mu nyumba zawo.

Zuŵa lakulondezgapo, Mubali Splane wakayowoya nkhani yapadera ku ŵanthu 15,000 awo ŵakawungana mu malo ghakupambanapambana mu Georgia. Ŵanyake ŵakapulikizganga nkhani iyi kwizira pa mafoni, ŵanyake ŵakawoneleranga pa mavidiyo. Aka kakaŵa kakwamba kuti mu Georgia muchitikire ungano ukuru wakuŵa na ŵanthu ŵakufuma mu vyaru vinyake. Chikaŵa chinthu chakukondweska chomene kuwona ŵabali na ŵadumbu ŵakukhozgana kweniso kusekelerana chomene. Mubali munyake wachiwukirano wakayowoya kuti: “Sono namanya umo vinthu vizamuŵira mu charu chiphya.”

Ŵanthu ŵa Yehova mu Georgia ŵatumbikika na Sukulu Yakusambizga Baibolo ya Ŵakhristu Ŵakutorana, iyo pasono ni Sukulu ya Ŵapharazgi ŵa Ufumu. Kufuma mu 2013, ŵanthu ŵakujumpha 200 ŵali kumalizga sukulu iyi. Pakukhumba kulongora kuwonga chifukwa cha masambiro agho ŵali kupokera, ŵabali aŵa mbakunozgeka kukateŵetera kulikose uko kungakhumbikwira wovwiri.

Chifukwa cha chitatata cha ŵapharazgi ŵakwambilira mu Georgia, makani ghawemi ghafika palipose mu charu ichi. Ŵabali na ŵadumbu ŵatumbikika chomene chifukwa cha kutemwa Chiuta na ŵazengezgani, kweniso chifukwa cha chipulikano, chikanga, na maluso ghawo.

Ŵabali na ŵadumbu ŵakujumpha 18,000 ŵa mu charu cha Georgia mbakukondwa kulutizga mulimo uwo ŵanyawo ŵakambiska, kuti ŵawovwire ŵazengezgani ŵawo kuwona nkhongono ya Mazgu gha Chiuta.—Fil. 3:13; 4:13.