PAKATI pajumpha myezi yichoko waka nati nabatizika, ŵalara ŵakanipempha usange ningatemwa kusazgirako uteŵeti wane. Pa Meyi 4, 1992, nkhaŵapo pa ungano wapadera wa ŵapharazgi awo ŵakaŵa ŵakunozgeka kusamukira ku chigaŵa uko kukakhumbikwiranga ŵapharazgi. Zuŵa lakulondezgapo, ine na munyane uyo ŵakatituma kumoza tikaluta ku dowoko la Batumi, mu chigaŵa cha Ajaria.

Apo nkhambanga kupharazga ku Batumi, nkhaŵa na wofi chomene. Nkhajifumbanga kuti, ‘Kasi ningayamba wuli kuyowoya na ŵanthu?’ Kweni nkhazizwa chomene na ivyo mama wakwamba uyo nkhamupharazgira wakanizgora. Mama uyu wakati: “Kasi mukaŵa nkhu nyengo yose iyi?” Mama uyu wakakhumbanga chomene kuti wamanye vinandi vya Ŵakaboni ŵa Yehova, ndipo zuŵa lakulondezgapo tikamba kusambira nayo Baibolo.

Pambere tindanyamuke kuluta ku Batumi, ŵabali ŵakatipa mazina gha ŵanthu ŵanandi awo ŵakakhumbanga kusambira  Baibolo. Pakuti tikawumanyanga makora yayi msumba uwu, tikafumbanga ŵanthu kuti ŵatilongozge ku ŵanthu aŵa. Ŵanthu ŵanandi awo tikaŵafumbanga ŵakatondekanga kutilongozga makora chifukwa chakuti misewu yinandi ŵakayisintha mazina. Kweni nawo ŵakaŵa ŵakukondwa na uthenga withu. Pakati pajumpha nyengo yichoko waka, tikamba kusambira Baibolo na ŵanthu mu magulu. Nyengo zinyake pa gulu limoza pakaŵanga ŵanthu 10 panji 15.

Pakati pajumpha myezi yinayi kufuma apo tikafikira mu msumba uwu, ŵanthu ŵakujumpha 40 ŵakizanga ku maungano ghithu mwakukhazikika. Ntheura tikajifumbanga kuti, ‘Kasi ni njani wapwelelerenge ŵanthu wose aŵa?’ Kweni chifukwa cha nkhondo iyo yikaŵa pakati pa ŵasilikari ŵa boma na ŵanthu ŵakugaluka ku Abkhazia, mpingo wose uwo nkhaŵako pakwamba ukasamukira ku Batumi. Ntheura mu zuŵa limoza pera pakapangika mpingo uphya, uwo ukaŵa na ŵalara ŵaluso kweniso ŵapayiniya.