CHARU cha Georgia chikamba kujiwusa chekha mu 1991, chaka icho wupu wa Soviet Union ukamaliranga. Kweni vinthu vikanangika chomene chifukwa cha kusintha kwa ndyali na viwawa. Genadi Gudadze, uyo wakaŵa mulaŵiliri wa dera pa nyengo iyo, wakukumbuka kuti ŵanthu ŵakandandanga pa mzere pafupifupi zuŵa lose kuti ŵagure buredi.

Pa nyengo iyi, Ŵakaboni ŵakasangirangapo mwaŵi ndipo ŵakamba kupharazgira ŵanthu awo ŵakaŵa pa mzere. Mubali Genadi wakuti: “Mu nyengo zakusuzga izi, vikawonekanga nga kuti waliyose wakukhumba kusambira unenesko. Tikapokeranga maadiresi ghanandi gha ŵanthu awo ŵakakhumbanga kusambira Baibolo.”

 Paumaliro wa maungano, ŵalara ŵakaŵerenganga mazina na maadiresi gha ŵanthu awo ŵakapemphanga kuti ŵasambire Baibolo. Kufuma apo, ŵapharazgi ŵakalutanga ku ŵanthu aŵa.

Mubali Levani Sabashvili, uyo wakaŵa mulara mu mpingo wa Tbilisi, wakukumbuka za banja linyake ilo likapempha kuti ŵabali ŵaluteko. Mubali Levani wakuti: “Ŵabali na ŵadumbu ŵakatora maadiresi ghose, kweni pakaŵavya uyo wakajipeleka kuluta ku banja ili. Banja ili likakhalanga kutali chomene, ndipo taŵanandi tikaŵa kale na masambiro ghanandi chomene.”

Pakati pajumpha myezi yichoko waka, banja ili likapemphaso kachiŵiri, kweni pakaŵavya uyo wakalutakoso. Ntheura likapemphaso kachitatu, ndipo sono likalembamo mazgu ghakuti Ŵakaboni ŵaleke kuŵa na mulandu wa ndopa. (Mil. 20:26, 27) Mubali Levani wakuti: “Yikaŵa nyengo iyo ŵanthu ŵakakondweleranga chaka chiphya, ndipo kanandi tikendanga viŵi yayi mu nyumba za ŵanthu. Kweni tikawona kuti tingatondeka yayi kuluta ku banja ili.”

Zuŵa linyake mulenji, uku kukuzizima chomene, Levani na munyake ŵakaluta ku nyumba ya banja ili. Ndipo banja ili, Roini Grigalashvili na muwoli wake Nana, ŵakati ŵaŵawona ŵabali aŵa, ŵakaŵa nga ŵakulota. Nyengo yeneyiyo ŵakamba kusambira Baibolo. Pasono Roini na Nana pamoza na ŵana ŵawo ŵaŵiri, mbapayiniya ŵanyengozose.

Ŵanthu awo ŵakasambira unenesko ŵakakondwa chomene. Ntheura nawo ŵakagwiliskira ntchito nyengo yawo, nkhongono zawo, na ivyo ŵakaŵa navyo kuti ŵaphalireko ŵanyawo makani ghawemi. Nangauli Badri Kopaliani na muwoli wake Marina ŵakaŵa na ŵana, kweni ŵakaŵa ŵamoza mwa ŵanthu awo ŵakendanga mitunda yitali kuluta ku mizi kuti ŵakawovwire ŵanthu awo ŵakakhumbanga kumanya unenesko.

Pa Chisulo na Sabata, Badri na Marina, pamoza na ŵana ŵawo ŵanalume ŵaŵiri, Gocha na Levani, ŵakalutanga ku  chigaŵa cha Dusheti, kumpoto kwa tawuni ya Tbilisi. Nyengo zinyake, ŵakendanga mtunda wa makilomita pafupifupi 150 mu misewu yakukhwetakhweta kuti ŵakafike ku mizi yakutali.

Zuŵa linyake, mwanakazi munyake wakachemera Badri na muwoli wake ku ntchito kwake. Mubali Badri wakuti: “Tikasanga ŵanthu 50 ŵakutilindilira mu chipinda chikuru. Pakwamba nkhawopa chomene, kweni nkhati nalomba kwa Yehova, nkhamba kudumbiskana nawo vimanyikwiro vya mazuŵa ghaumaliro pa Mateyu 24. Munthu munyake wakazizwa, ndipo wakafumba kuti, ‘Chifukwa wuli ŵaliska ŵithu ŵakutiphalira yayi vinthu ivi?’”

Chikumbusko cha nyifwa ya Yesu chikapeleka mwaŵi ku ŵanthu ŵanandi ŵa ku Georgia kuti ŵapulike unenesko. Mwachiyelezgero, Chikumbusko icho chikachitikira mu nyumba ya mudumbu Ia Badridze mu 1990 ku Tbilisi, chikapangiska kuti ŵanthu ŵanandi ŵanweke na unenesko.

 Mudumbu Badridze wakapeleka nyumba yake kuti ndimo muchitikire Chikumbusko. Iyo na ŵana ŵake ŵakawovwirana kusezga vinthu pa balaza kuti paŵe malo ghakukwana. Kweni kasi mipando yakuti yikwane ŵanthu wose wakayisanga wuli? Ŵanthu ŵa ku Georgia ŵakatemwanga kubwerekeska mathebulu na mipando para kuli ungano ukuru. Pakuti mudumbu Badridze wakabwereka mipando pera, ŵeneko ŵakamufumbanga kuti: “Kasi mathebulu mughakhumbenge yayi? Ŵanthu ŵamurya wuli kwambura mathebulu?”

Ŵanthu wose awo ŵakiza pa kukumbukira nyifwa ya Yesu ŵakakwana mu nyumba ya mudumbu Badridze. Chakukondweska ntchakuti ŵanthu 200 ŵakiza pa chikumbusko ichi. Ŵazengezgani ŵake ŵanandi ŵakakhumbanga kumanya vinandi vya Ŵakaboni ŵa Yehova.

Mu 1992, ŵabali ŵakachita renti maholo ghakurughakuru mu vigaŵa vinandi vya charu cha Georgia kuti ŵachitiremo Chikumbusko. Mubali Davit Samkharadze, uyo wakakhalanga ku Gori, wakukumbuka ivyo mulaŵiliri wakwendakwenda wakayowoya wakati waŵafumba uko ŵamuchitira Chikumbusko.

Mulaŵiliri uyu wakati wamanya kuti ŵabali ŵakughanaghana kuti ŵakachitire Chikumbusko mu nyumba ya mubali,  wakaŵafumba kuti: “Kasi mu msumba uwu mulije holo likuru? Kasi mungachita yayi renti holo?” Ŵabali ŵakawona kuti palije chifukwa cha kuchitira renti holo chifukwa pakaŵa ŵapharazgi ŵakujumpha 100 apo holo ya mu tawuni yikakwananga ŵanthu ŵakujumpha 1,000.

Mulaŵiliri wakwendakwenda wakaŵaphalira kuti: “Usange mupharazgi waliyose wangachema ŵanthu 10, mbwenu holo yamuzura.” Nangauli ivyo wakaŵaphalira vikawonekanga nga vingachitika yayi, kweni ŵapharazgi ŵakaŵikapo mtima kuchita ivyo wakayowoya. Ŵapharazgi ŵakazizwa kweniso kukondwa chomene chifukwa ŵanthu 1,036 ŵakiza ku Chikumbusko. *

Kuzakafika mu 1992, mu Georgia mukaŵa vigaŵa vinyake ivyo Ŵakaboni ŵa Yehova ŵakaŵa kuti ŵandapharazgeko. Kweni kasi Ŵakaboni ŵakachita wuli kuti ŵakapharazge ku vigaŵa ivi, pakuti nyengo iyi mu Georgia mukaŵa suzgo la vyachuma?

Mubali Tamazi Biblaia, uyo wakakhalanga kumanjiliro gha dazi kwa Georgia, wakati: “Mulaŵiliri wakwendakwenda wakakumana na ŵabali ŵachoko waka kuti tidumbiskane ivyo tingachita. Tikamanyanga vinandi yayi vya umo upayiniya wapadera ukenderanga. Kweni tikamanyanga kuti makani ghawemi ghakwenera kupharazgika mwaluŵiro.” (2 Tim. 4:2) Ntheura ŵabali ŵakasora ŵapayiniya 16, ndipo ŵakaŵatuma mu vigaŵa vyakupambanapambana vya mu Georgia.—Wonani pa mapu.

Mu Meyi 1992, ŵapayiniya awo ŵakasankhika kuti ŵakateŵetere mu vigaŵa ivi kwa myezi 5 ŵakaŵa na ungano wa maora ghatatu mu Tbilisi. Chilato chake chikaŵa cha kuŵakhwimiska ŵapayiniya aŵa. Kweniso mwezi uliwose, ŵalara ŵakalutanga kukaŵakhozga ŵapayiniya aŵa mwauzimu kweniso kuŵapa vinthu vyakukhumbikwa vyakuthupi.

 Ŵadumbu ŵaŵiri ŵapayiniya, Manea Aduashvili na Nazy Zhvania, ŵakaŵatuma mu tawuni ya Ozurgeti. Pa nyengo iyi, Manea wakaŵa na vyaka 60, ndipo wakukumbuka kuti: “Tikamanyanga kuti kufupi na Ozurgeti kukaŵa munthu wakunweka. Ntheura tikati tafika waka, tikaluta kuti tikakumane nayo. Tikati tafika pa nyumba ya mwanakazi uyu, tikasanga kuti wakutilindilira. Pakaŵaso ŵanyake 30 awo wakaŵachema. Pa zuŵa ili, tikamba kusambira Baibolo na ŵanthu ŵanandi.”

Mu myezi yakulondezgapo vinthu vikenda makora chomene. Pakati pajumpha myezi 5 pera, ŵanthu 12 ŵakaŵa ŵakwenelera kubatizika.

Ŵabali ŵaŵiri ŵapayiniya, Pavle Abdushelishvili na Paata Morbedadze, ŵakatumika ku Tsageri. Tawuni iyi yili ku chigaŵa icho ŵanthu ŵakulondezga chomene mitheto yakale yakusazgikana na visambizgo vya Chikhristu chautesi.

Apo nyengo yakuzizima chomene yikayambanga, myezi 5 iyo ŵapayiniya aŵa ŵakapika yikaŵa kuti yakwana. Mubali  Paata wakachemeka kuti wakawovwire pa mulimo wakung’anamura mabuku ku malo ghanyake. Ntheura Pavle wakeneranga kusankha chakuchita. Pavle wakuti: “Nkhamanyanga kuti chikaŵa chakusuzga chomene kukhala ku Tsageri mu nyengo yakuzizima. Kweni pakuti awo tikasambiranga nawo Baibolo ŵakakhumbikwiranga wovwiri, nkhasankha kuti nikhale dankha kwenekuko.”

Mubali uyu wakuti: “Nkhakhalanga na banja linyake. Zuŵa lose nkhatandaranga mu upharazgi. Namise para nawerako, tikachezganga na banja ili pa balaza uku tikotha moto. Kweni para nyengo yakuti nkhagone mu chipinda chane yakwana, nkhavwaranga chisoti chakuthukira na kudika chibulangeti chikhomi.”

Nyengo yakuzizima yikati yamara, ŵabali ŵalara ŵakaluta kukamuwona Pavle ku Tsageri. Pa nyengo iyi, ŵanthu 11 ŵakaŵa ŵakwenelera kuŵa ŵapharazgi ŵambura kubatizika. Pakati pajumpha kanyengo kachoko, wose ŵakabatizika.