M’ma 1920, Ŵasambiri ŵa Baibolo ŵakaŵikapo mtima kuti ŵafikire ŵanthu awo ŵakakhumbanga kumanya unenesko mu charu cha Georgia. Mu 1924, ŵakajura ofesi ku Beirut mu charu cha Lebanon. Ofesi iyi yikalaŵiliranga mulimo wa kupharazga mu vyaru vya Armenia, Georgia, Syria, na Turkey.

Nangauli pa nyengo iyi mbuto ya unenesko yikaseŵeka mu charu cha Georgia, kweni pakwamba vipambi vyake vikawonekanga yayi. (Mat. 13:33) Ndipouli, pakati pajumpha nyengo, uthenga wa Ufumu ukathandazgika ndipo ukawovwira ŵanthu ŵanandi mu Georgia kusintha umoyo wawo.

Apo Nkhondo Yachiŵiri ya Charu Chose yikambanga, Vaso Kveniashvili wakaŵa na vilimika 14. Pakuti charu cha Georgia chikaŵa mu wupu wa Soviet Union, awiske ŵa Vaso ŵakaŵatuma  ku nkhondo pamoza na ŵasilikari ŵa Soviet. Pa nyengo iyi, amama ŵa Vaso ŵakaŵa kuti ŵafwa kale. Vaso ndiyo wakaŵa mwana mulara, ntheura wakayamba kwiba kuti wapwelelere ŵabali ŵake ŵatatu.

Vaso wakanjira gulu linyake la ŵanyamata ŵakusuzga, ndipo nayo wakamba kuchita viheni vinandi. Vaso wakati: “Nkhawonanga kuti mu magulu gha ŵanthu ŵakusuzga muli urunji kuluska mu boma panji mu mawupu ghanyake.” Kweni pamasinda Vaso wakawona kuti chinthu icho wakapenjanga, ŵanthu ŵangapeleka yayi. Iyo wakati: “Nkhapenjanga urunji.”

Vaso wakakakika chifukwa cha mphuvya zake ndipo ŵakamutumizga ku msasa ku Siberia. Apo wakaŵa mu msasa, Vaso wakasangana na Kaboni wa Yehova uyo wakajalirika chifukwa  cha chigomezgo chake. Vaso wakati: “Apa ndipo nkhasanga icho nkhapenjanga. Tikaŵavya mabuku ghalighose ghakulongosora Baibolo, kweni nkhayezgeska kutorapo kanthu pa ivyo mubali uyu wakaniphaliranga.”

Mu 1964, Vaso ŵakamufumiska, ndipo wakawelera ku Georgia. Wati wafika ku Georgia, wakamba kupenja Ŵakaboni ŵa Yehova. Pa nyengo iyi, wakalemberananga makalata na Kaboni uyo ŵakasangana mu msasa. Chachitima ntchakuti mubwezi wake uyu wakafwa, ndipo Vaso wakaŵavya mwaŵi wa kuyowoyeskana na ŵanthu ŵa Chiuta. Pakajumpha vyaka pafupifupi 20 kuti Vaso wasanganeso na Ŵakaboni ŵa Yehova. Tipulikengeso vya Vaso mu mapeji ghamunthazi.

Valentina Miminoshvili, mwanakazi wachiwukirano wa ku Georgia, wakajalirika mu msasa wakusuzgirako ŵanthu wa Nazi. Nangauli wakasuzgikanga kweni wakatumbikika chomene. Valentina wakakumana na Ŵakaboni ŵa Yehova kakwamba apo wakaŵa mu msasa. Iyo wakazizikika chomene  na chipulikano chambura kusunkhunyika cha Ŵakaboni aŵa. Ivyo Ŵakaboni ŵakamusambizganga kufuma mu Baibolo vikamufika pamtima.

Nkhondo yikati yamara, Valentina wakawelera ku Georgia, ndipo wakamba kuphalirako ŵanji unenesko uwo wakasambira. Kweni ŵalara ŵa boma ŵakakwiya chomene na ivyo wakachitanga. Ntheura ŵakamukora na kumupimira vyaka 10 kuti wakakhale ku msasa wakusuzgirako ŵanthu ku Russia. Uku nako wakasanganaso na Ŵakaboni ŵa Yehova, ndipo pamanyuma wakabatizika.

Mu 1967, Valentina ŵakamufumiska mu msasa, ndipo wakaluta kumanjiliro gha dazi kwa charu cha Georgia. Uku wakambiraso kupharazga kweni wakachitanga mwamahara. Valentina wakamanyanga yayi kuti wawovwirenge munthu munyake uyo wakapemphanga wovwiri kwa Chiuta.

Mu 1962, Mudumbu Antonina Gudadze, wakafumako ku Siberia na kuluta ku Georgia kwawo kwa mfumu wake, uyo wakaŵa Kaboni yayi. Antonina wakasambira unenesko kukwake ku Siberia kufuma ku Ŵakaboni awo ŵakatolekera ku misasa yakusuzgirako ŵanthu kwenekura. Sono Antonina wakamba kukhala mu msumba wa Khashuri, kumafumiro gha dazi kwa Georgia, ntheura wakaŵa kutali chomene na Ŵakaboni ŵanyake.

Antonina wakukumbuka umo Yehova wakazgolera malurombo ghake. Iyo wakuti: “Zuŵa linyake nkhapokera katundu kufuma kwa amama ku Siberia, ndipo nkhasangamo mabuku ghakulongosora Baibolo agho ŵakaghabisa mwaluso chomene. Amama ŵakalutilira kunitumizgira chakurya chauzimu munthowa iyi kwa vyaka 6. Nyengo yiliyose para napokera mabuku agha, nkhawonganga Yehova chifukwa cha kunilongozga, kunikhozga, na kunipwelelera.”

 Nangauli vikaŵa nthena, kweni Antonina wakaŵa yekha Kaboni uko wakakhalanga. Iyo wakuti: “Nkhalombanga Yehova kuti wanovwire kuti nikumaneso na ŵabali na ŵadumbu. Zuŵa linyake, ŵanakazi ŵaŵiri ŵakanjira mu sitoro iyo nkhagwirangamo ntchito. Ŵakanifumba kuti: ‘Kasi ndiwe Antonina?’ Umo visko vyawo vikawonekeranga, nkhamanya kuti mbadumbu. Tikavumbatirana na kuthiska masozi.”

Yumoza wa ŵadumbu aŵa wakaŵa Valentina Miminoshvili. Antonina wakakondwa chomene wakati wapulika kuti maungano gha mpingo ghakachitikiranga chakumanjiliro gha dazi kwa Georgia. Antonina wakalutanga ku maungano kamoza pa mwezi, nangauli ukaŵa mtunda wa makilomita ghakujumpha 300.

M’ma 1960, Ŵakaboni ŵanyake awo ŵakatambuzgikanga mu vigaŵa vinyake vya Soviet Union, ŵakasamira ku malo uko vinthu vikaŵako makora. Yumoza wa Ŵakaboni aŵa wakaŵa Vladimir Gladyuk, mubali wakulimbikira kupharazga na wankhongono. Mu 1969, mubali Vladimir wakafumako ku  Ukraine na kuluta ku Zugdidi, kumanjiliro gha dazi kwa Georgia.

Pakwamba, ŵabali awo ŵakiza ku Georgia ŵakachitanga maungano mu Chirussia. Kweni chiŵengelero cha ŵanthu ŵa ku Georgia awo ŵakizanga ku maungano chikati chamba kusazgikira chomene, ŵakamba kuchita maungano mu Chigeorgia. Mulimo wakupanga ŵasambiri ukendanga makora chomene mwakuti mu Ogasiti 1970, ŵanthu 12 ŵa ku Georgia ŵakabatizika.

Mu 1972, Vladimir na mbumba yake ŵakasamira ku Sokhumi, mumphepete mwa Black Sea. Vladimir wakulongosora kuti: ‘Tikasambazgika chomene mwauzimu, ndipo tikawonga chomene Yehova chifukwa cha kutitumbika nthena. Mpingo wa ku Sokhumi ukakura mwaluŵiro chomene.’ Mu chaka ichi, ungano wakwamba wakukumbukira nyifwa ya Yesu ukachitika ku Sokhumi, ndipo ŵanthu 45 ŵakasangikapo.

Babutsa Jejelava, uyo pasono wali na vilimika vya m’ma 90, njumoza mwa ŵanthu awo ŵakazomera mwaluŵiro unenesko ku Sokhumi kuuyambiliro wa chaka cha 1973. Iyo wakukumbuka kuti: “Zuŵa linyake nkhawona ŵanakazi ŵanayi awo ŵakadumbiskananga nkhani yakuzirwa chomene. Ŵaŵiri ŵakaŵa masisitere, ndipo pamasinda nkhazakamanya kuti ŵanyake ŵaŵiri ŵakaŵa Ŵakaboni ŵa Yehova.” Mudumbu munyake wakaŵa Lyuba, muwoli wa Vladimir Gladyuk. Ndipo munyake wakaŵa Itta Sudarenko, mupayiniya wamwamphu wakufuma ku Ukraine.

Babutsa wakukumbuka ivyo wakachita wakati wapulikako ivyo ŵanakazi aŵa ŵakadumbiskananga. Wakuti: “Nkhategherezga na mtima kweniso umoyo wane wose.” Wakati wapulika kuti Chiuta wali na zina, mwaluŵiro wakanjilirapo ndipo wakapempha kuti ŵamulongore mu Baibolo apo zina ili lili kulembeka. Wakafumba mafumbo ghanandi chomene mwakuti ŵakamara maora ghatatu ŵachali kudumbiskana.

Babutsa wakaghanaghananga kuti wazamusanganaso nawo yayi Ŵakaboni ŵa Yehova. Ntheura wakafumba kuti: “Kasi mukuluta na kunileka waka nthena?”

Ŵadumbu ŵakamuzgora kuti: “Yayi, tikulutirathu yayi, tizengeso Chisulo chikwiza.”

Zuŵa ilo ŵakapangana likati lakwana, Babutsa wakakondwa chomene kuwona kuti ŵadumbu ŵaŵiri aŵa ŵiza nadi. Nyengo yeneyiyo, ŵakamba kusambira nayo Baibolo. Apo sambiro likaŵa pafupi kumara, Babutsa wakakhumba yayi kuti watayane na ŵanthu ŵa Chiuta. Wakati mu mtima wake: ‘Naŵasanga ŵanthu aŵa. Sono nkhwenera kuwoneseska kuti nileke kutayana nawo.’

Babutsa wakasanga nthowa yakuti waleke kutayana nawo ŵanthu aŵa. Iyo wakukumbuka kuti: “Nkhamanyanga kuti Lyuba wakaŵa wakutengwa, ntheura nkhafumba Itta usange  nayo ngwakutengwa. Itta wakazgora kuti wandatengwe. Ntheura nkhamuphalira kuti: ‘Mbwenu wize tizakakhalenge na ine. Mu chipinda chane muli mabedi ghaŵiri, pakati pali nyali. Tingalutizga kusambira Baibolo nanga ungaŵa usiku.’” Itta wakazomera ndipo wakasamira ku nyumba ya Babutsa.

Babutsa wakukumbuka ivyo vikachitikanga. Wakuti: “Nyengo zinyake nkhagonanga yayi usiku, nkhaghanaghaniranga waka ivyo nasambira. Nyengo yeneyiyo fumbo likizanga mu mutu wane. Mbwenu nkhamuwuskanga Itta, na kumuphalira kuti: ‘Itta, tora Baibolo lako. Nili na fumbo!’ Uku tulo tuli m’maso, Itta wakazgoranga kuti: ‘Oho, napulika Babutsa.’ Kufuma apo, wakajuranga Baibolo na kunilongora zgoro.” Pakati pajumpha waka mazuŵa ghatatu kufuma apo Itta wakasamira, Babutsa wakamba kupharazga makani ghawemi.

Babutsa wakaŵa na mubwezi wake wapamtima zina lake Natela Chargeishvili. Babutsa wakukumbuka ivyo vikachitika. Wakuti: “Nkhaghanaghananga kuti Natela wangazomera yayi kusambira unenesko chifukwa cha usambazi. Kweni nkhabuda waka kughanaghana nthena. Kufuma waka apo tikambira kudumbirana, Natela wakazomera na mtima wose kusambira unenesko.” Nakalinga Babutsa na Natela ŵakamba kuyowoya vya chigomezgo chawo ku ŵabwezi ŵawo, ŵanyawo ŵa ku ntchito, na ŵazengezgani.