NKHAMBA kupulika vya Ŵakaboni ŵa Yehova apo nkhaŵa ku koleji, mu msumba wa Kutaisi. Munyane ndiyo wakaniphalira kuti Ŵakaboni ŵakugwiliskira ntchito yayi vikozgo pakusopa kweniso ŵakugomezga yayi kuti Yesu ni Chiuta Wankhongonozose. Ivi vikapambananga chomene na ivyo ine nkhagomezganga pakuŵa Mkhristu wa Orthodox.

Nkhati nawelera ku tawuni yakwithu ku Tsageri, mu 1992, nkhasanga kuti nako kuli Ŵakaboni ŵakupharazga. Amama ŵakapulikapo kale viwemi vinandi vya Ŵakaboni ŵa Yehova. Ine nkhaŵatemwanga yayi ŵanthu aŵa, kweni amama ŵakaniphalira kuti, “Luta, ukajiwonere wekha ivyo ŵakusambizga.”

Ŵabali ŵaŵiri, Pavle na Paata, awo ŵakaŵa ŵapayiniya, kanandi ŵakizanga kuzakasambira Baibolo na mbumba yinyake mu chikaya chithu. Para ŵiza, ŵanthu ŵanandi ŵakizanga kuzakategherezga  ndipo paumaliro ŵakafumbanga mafumbo. Nane nkhaluta kuti nkhapulikizgeko. Para nafumba fumbo, ŵabali aŵa ŵakajuranga Baibolo na kunipempha kuti niŵazge nekha. Ivi vikanovwira chomene, chifukwa nkhajiwonera nekha ivyo Baibolo likuyowoya!

Nyengo yeneyiyo, nane nkhamba kusangikapo pa gulu ilo ŵabali aŵa ŵakasambiranga nalo Baibolo. Mu chaka chakulondezgapo, taŵanthu 10 pa gulu lithu tikabatizika. Pamanyuma, amama nawo ŵakazgoka Ŵakaboni ŵa Yehova.

Para nati chete, nkhuwonga chomene kuti ŵabali aŵa ŵakanijuliranga Baibolo pakuzgora mafumbo ghane kuti nijiŵazgirenge nekha. Ivi vikanovwira kuti nileke kukhuŵara nkhati namanya kuti ivyo nkhagomezganga vikaŵa vyautesi. Pakukumbuka umo ŵabali ŵakaniwovwilira kuti nimanye unenesko, nane nkhutemwa chomene kujulira ŵanthu Baibolo kuti ŵajiwonerenge ŵekha uwo mbunenesko.