Kwambira m’ma 1990, chiŵerengero cha ŵapharazgi na ŵakunweka chikusazgikira chomene mu Georgia. Mu 1998, ŵanthu 32,409 ŵakiza pa Chikumbusko cha nyifwa ya Yesu.

Kweni ŵapharazgi ŵanandi nanga ŵangaŵa ŵalara ŵa mpingo ŵakaŵa kuti ŵasambira waka unenesko ndipo ŵakamanyanga vinandi yayi. Ŵanandi ŵakakhumbikwiranga kusambizgika umo gulu likwendera kweniso umo ŵangapharazgira makora. Kasi chikakhumbikwanga ntchivichi kuti ŵasambizgike?

Arno Tüngler na muwoli wake Sonja, ŵakamalizga masambiro ghawo gha Sukulu ya Giliyadi iyo yikachitikira ku Germany, ndipo mu Malichi 1998 ŵakaŵatuma ku Georgia. Chaka chenechichi, Wupu Wakulongozga ukazomerezga kuti ŵajure ofesi mu Georgia, yakulaŵilirika na munthavi wa Russia.

Nyengo yichoko waka, pakapangika Komiti ya Charu iyo yikamba kulaŵilira ntchito ya kupharazga. Gulu lithu likati lalembeskeka ku boma, tikamba kupokera mabuku ghakulongosora Baibolo kufuma ku Germany. Pakuti boma likazomerezga mulimo withu, gulu likagura malo ghakuzengapo Nyumba za Ufumu na ofesi ya munthavi.

Mu nyengo ya Soviet Union mulimo withu ukaŵa wakukanizgika, ndipo ŵapharazgi ŵanandi ŵakatondekanga kupharazga pakweru ku nyumba na nyumba. Arno Tüngler wakuti: “Ŵapharazgi ŵanandi ŵakatemwanga kupharazga  mu misewu, kweni ŵanyake ŵakatemwanga yayi kupharazga nyumba na nyumba kweniso kuwelerako ku ŵakunweka.”

Mubali Davit Devidze, uyo mu Meyi 1999 wakamba kuteŵetera pa ofesi iyo ŵakajura mu Georgia, wakuti: “Pakaŵa vinthu vinandi vyakuti tichite mu mipingo kweniso pa Beteli. Vinthu vinyake tikaviŵerenganga waka kweni tikamanyanga yayi umo tingavichitira. Ntheura tikawoneleranga na kusambira kwa ŵabali ŵaluso awo Wupu Wakulongozga ukatitumira.”

Pakanozgeka ndondomeko yakusambizga ŵabali milimo mu Georgia. Kweni nga umo vikuŵira nyengo zinandi, awo ŵakovwira ŵanyawo na awo ŵakovwirika, wose ŵakusanga chandulo. (Zinth. 27:17) Ŵabali awo ŵakiza kuzakawovwira ŵabali na ŵadumbu ku Georgia nawo ŵakasambirakoso vinandi kwa iwo.

Mubali Arno na muwoli wake Sonja ŵakukumbuka umo ŵabali na ŵadumbu ŵakaŵapokelelera makora ŵakati  ŵafika ku Georgia. Ŵabali na ŵadumbu ŵakayezgeska kovwira mubali na mudumbu Tüngler kuti ŵazgoŵere charu ichi.

Sonja wakukumbuka umo ŵabali ŵakalongolera mtima wa kupa. Wakuti: “Mbumba iyo tikakhalanga nayo pafupi yikatipanga chakurya chiwemi. Mudumbu munyake wakaluta nase mu uteŵeti, wakatilongora ku mpingo withu wasono, ndipo wakatilongosolera mitheto ya ku Georgia. Mudumbu munyake wakajipeleka kutisambizga Chigeorgia.”

Warren Shewfelt na muwoli wake Leslie ŵa ku Canada, ŵakaŵatuma ku Georgia mu 1999. Iwo ŵakati: “Chitemwa icho ŵabali na ŵadumbu ŵa ku Georgia ŵakatilongora chikatikhwaska chomene mu mtima. Ŵalara na ŵana wuwo ŵakalongora kuti ŵakufwatukirana na kutemwana chomene.”

Ŵabali ŵakufuma mu vyaru vinyake kukateŵetera ku Georgia ŵakaŵika mtima pa nkharo yiwemi ya ŵanthu  m’malo mwa masuzgo agho ŵakakumananga nagho. Ivi vikawovwira kuti ŵabali ku Georgia ŵaŵatemwenge ŵamishonale aŵa chifukwa cha kuchita vinthu mwakujiyuyura kweniso mwachitemwa.

Mu vyaka vyose vya m’ma 1990, ŵanthu ŵanandi ŵakazomeranga unenesko. Mu 1998 pera, ŵanthu 1,724 ŵakabatizika. Ntchivichi chikachitiska ŵanthu ŵanandi ku Georgia kukhumba kumanya unenesko?

Tamazi Biblaia, uyo kwa vyaka vinandi wakaŵa mulaŵiliri wakwendakwenda, wakulongosora kuti: “Mwakawiro ŵanthu mu charu ichi ŵakusambizgika kutemwa Chiuta. Ntheura para tikuŵaphalirako uthenga wa mu Baibolo ŵakuzomera waka.”

Davit Samkharadze, uyo ni msambizgi wa Sukulu ya Ŵapharazgi ŵa Ufumu, wakuti: “Para munthu wamba kusambira Baibolo, kanandi ŵabali na ŵazengezgani ŵake ŵakunjilirapo. Ŵakuyezga kumugongoweska kuti waleke kusambira Baibolo, kweni kanandi icho chikuchitika ntchakuti ŵanandi ŵa iwo ŵakwambaso kusambira Baibolo.”

Uthenga wa Ufumu ukathandazgika chomene ndipo ukawovwira ŵanthu ŵanandi kusintha umoyo wawo. Mu Epulero 1999, ŵanthu 36,669 ŵakiza pa Chikumbusko, ndipo aka kakaŵa kakwamba kuti ŵanthu ŵanandi nthena ŵasangike pa Chikumbusko.

Pakuyowoya vya uteŵeti wake wa mu Efeso, mpositole Paulosi wakalemba kuti: “Mulyango ukuru wakulongozgera ku mulimo wanijulikira, kweni pali ŵakususka ŵanandi.” (1 Kor. 16:9) Ivyo wakalemba vikuyana waka na  ivyo vikachitikira Ŵakaboni ŵa mu Georgia myezi yichoko waka ŵakati ŵachita Chikumbusko cha mu 1999.

Mu Ogasiti chaka chenechira, gulu linyake la tchalitchi la Orthodox, lakulongozgeka na Vasili Mkalavishvili uyo ŵakamulekeska usembe, likachitiska ungano mu msumba wa Tbilisi. Pa ungano uwu ŵakawotcha mabuku ghithu. Kufuma apo, ŵabali mu Georgia ŵakamba kutambuzgika m’paka vyaka vinayi.

Pa Okutobala 17, 1999, gulu lankhaza la tchalitchi ili likakumba ŵanthu pafupifupi 200, ndipo ŵakatimbanizga maungano gha mpingo wa Gldani, mu msumba wa Tbilisi. Ŵakatora nthonga kweniso mphinjika zavisulo na kutimbira ŵabali, ndipo ŵabali na ŵadumbu ŵanandi ŵakagonekeka mu chipatala.

Chachitima ntchakuti ŵanthu aŵa ŵakakakika yayi, ndipo Ŵakaboni ŵakalutilira kutambuzgika. Ŵalara ŵanyake ŵa boma, kweniso Pulezidenti Shevardnadze, ŵakayowoya kuti ivi vileke kuchitikaso, kweni pakaŵavya chamahara icho chikachitikapo. Ŵapolisi nawo kanandi ŵakizanga kuti ŵachiŵembu ŵaluta kale.

Nyengo yeneyira, mwimiliri munyake wa ku mphara ya malango zina lake Guram Sharadze, wakamba kuvundura ŵanthu kuti ŵasuzgenge Ŵakaboni. Wakatenge Ŵakaboni mbakofya chomene. Vikawoneka nga kuti “nyengo yiwemi” yakupharazgira makani ghawemi yamara.

Gulu la Yehova likachitapo kanthu mwaluŵiro kuti liwovwire Ŵakaboni mu Georgia. Ŵabali ŵakapokera ulongozgi wa umo ŵangachitira para ŵanthu ŵaŵawukira. Kweniso ŵakakumbuskika chifukwa icho nyengo zinyake Ŵakhristu ŵaunenesko ŵakutambuzgikira.—2 Tim. 3:12.

 Padera pa ivi, gulu la Yehova likamangara ku khoti kuti livikilire ŵabali ŵithu. Mubali uyo wakaŵa mu Dipatimenti ya Vyamalango pa ofesi ya munthavi ya Georgia, wakuti: “Mu vyaka vinayi ivyo tikatambuzgikiranga, tikadumura samoni ya milandu yakujumpha 800 kukaka gulu la Vasili Mkalavishvili. Tikapempha ŵalara ŵa boma na mawupu ghakuwona vya wanangwa wa ŵanthu kuti ŵatovwire. Ofesi yikuru ya Ŵakaboni ŵa Yehova pa charu chose yikalemba nkhani zinandi kususkana na ivyo vikachitikanga, kweni ŵabali ŵakalutilira kutambuzgika.” *