Pambere Sanel wandababike, madokotala ghakaphalira ŵapapi ŵake kuti Sanel wababikenge wakufwa panji wababikenge na suzgo. Sanel wati wababika waka, wakakhumbikwiranga opareshoni. Ŵapapi ŵake ŵakakhalanga mu chigaŵa cha Abkhazia, icho chikagaluka ku charu cha Georgia. Ntheura ŵapapi ŵa Sanel ŵakatondeka kusanga dokotala uyo wangapanga opareshoni yambura ndopa.

Ŵapapi ŵa Sanel ŵakaphalira Komiti Yakudumbiskana na Chipatala (HLC). * Ŵapapi ŵa Sanel ŵakakondwa chomene kuti ŵabali ŵa mu HLC ŵakaŵawovwira kusanga dokotola uyo wakazomera kuchita opareshoni yambura ndopa, mu msumba wa Tbilisi, ku Georgia. Kweni amama ŵake ŵakaŵa ŵakuti ŵangenda yayi mtunda utali chifukwa chakuti ŵakaŵa ŵachali ŵalwari. Ntheura ŵakaghanaghana vyakuti ŵabuya ŵa Sanel, ndiwo ŵalute nayo ku chipatala ku Tbilisi. Ŵabuya ŵaŵiri aŵa wose ŵakaŵa Ŵakaboni.

Opareshoni yikenda makora. Pakati pajumpha nyengo yichoko waka, ŵabuya ŵaŵiri ŵara ŵakalemba kuti: “Tikakhala mu chipatala mazuŵa ghakujumpha 20. Nyengo yose iyi, ŵabali na ŵadumbu ŵakizanga kuzakatiwona na kutovwira. Ŵanandi ŵakatilengeranga lusungu. Tikaŵazganga na kupulika waka umo ŵabali ŵithu ŵakulongolera chitemwa, kweni sono tili kujiwonera tekha na maso ghithu.”