PA Chitatu, Seputembala 23, 2015, Wupu Wakulongozga ukaphalira ŵabali na ŵadumbu wose awo ŵakuteŵetera pa Beteli kuti gulu lasintha vinthu vinyake mwakuti ndalama izo ŵabali ŵakupeleka ziwovwire pa ntchito zakukhumbikwa chomene. Kufuma apo, pa Chisulo, Okutobala 3, 2015, Wupu Wakulongozga ukapharazga kuti: “Pa Ŵafilipi 1:10, Baibolo likutiphalira kuti ‘tikwenera kusanda ivyo ni vinthu vyakuzirwa chomene.’ Pakupulikira ulongozgi wavinjeru uwu, ise [Wupu Wakulongozga] tikukhumba kuŵika mtima pa milimo iyo njakovwira chomene pa umoyo wauzimu wa ŵanthu ŵa Chiuta kweniso pakulutiska panthazi ntchito ya kupharazga pa charu chose.”

 Mubali Stephen Lett wa mu Wupu Wakulongozga wakalongosoraso pa JW Broadcasting kuti: “Wupu Wakulongozga wakhuka chomene na nkhani ya kulutiska panthazi mulimo wa kupharazga, ndipo taghanaghana kuchepeskako vinthu vinyake mu maofesi ghose mwakuti ndalama zinandi ziwovwire pa mulimo uwu. Mwachiyelezgero, tichepeskenge panji kuleka ntchito zinyake izo zikuchitika pa Beteli. Ichi chikung’anamura kuti pa Beteli pakhumbikwenge ŵanthu ŵachoko waka.”

Ntheura, kwambira mu Seputembala 2015, ŵabali na ŵadumbu pafupifupi 5,500 awo ŵakaŵa pa Beteli ŵali kuwelera ku mipingo. Nangauli ŵabali aŵa ŵakasintha vinandi, kweni vikuwoneka kuti Yehova wakuŵatumbika, ndipo vyawovwira kuti ntchito ya kupharazga na kusambizga yitotome.

Mubali munyake na muwoli wake ku Sri Lanka, awo ŵali kufumapo pa Beteli kukachita upayiniya ŵakawona kuti uwu ukaŵa mwaŵi wakulongolera kuti ŵali na chipulikano mwa Yehova kweniso ŵakugomezga gulu lake. Iwo ŵakalemba kuti: “Pakwamba tikamanyanga yayi umo vyamuŵira. Kweni tikagomezga kuti Yehova wangatitaya yayi. Ntheura tikalomba kuti, ‘A Yehova, ise tikulomba kuti mutovwire mwakuti tose ŵaŵiri tikalutilire kuchita upayiniya wanyengozose.’ Mu mwezi wakwamba, tikaŵa na tunthu tuchoko waka. Kweni tikawona kuti Yehova wakutitemwa na kutipwelelera, ndipo sono vinthu vikwenda makora. Tikutangwanika na milimo ya pa nyumba, ntchito, na upayiniya. Kweni tikugaŵa makora nyengo chifukwa cha ivyo tikasambira pa Beteli. Kovwira ŵanthu kumanya unenesko ntchinthu chiwemi chomene, ndipo tili ŵakukondwa kuti ndivyo tikuchita pakuŵa ŵapayiniya.”

 Ŵabali na ŵadumbu ŵanyake awo ŵakaŵa pa Beteli ku Colombia ŵasambira viyowoyero vinyake, ndipo ŵali kusamira ku vigaŵa vyakutali kuti ŵakapharazgire ŵanthu ŵa viyowoyero ivi. Mipingo iyo ŵabali na ŵadumbu aŵa ŵalutako, nayo yatumbikika chomene. Mulaŵiliri wa dera wakalemba vya mbumba yinyake iyo yikatumizgika ku mpingo wa mu dera lake, wakati: “Ŵabali na ŵadumbu mu mpingo uwu ŵakuwonga chomene wovwiri wa mbumba iyi. Ŵapharazgi ŵanandi ŵa mpingo uwu sono ŵakunjira mu uteŵeti wa m’munda, ndipo ŵabali ŵakusambizgika milimo yakupambanapambana ya mpingo.” Ŵanyakeso ŵanandi awo ŵakaŵa pa Beteli ŵajipeleka kuteŵetera pa Beteli mazuŵa ghachoko waka mu sabata.

Mubali munyake uyo wakateŵetera pa Beteli ku Japan kwa vyaka 31 wakasamira ku mpingo uwo ukaŵa na ŵalara ŵaŵiri pera. Pakuti mpingo uwu ukapanga ndondomeko yakuti ŵanozge Nyumba ya Ufumu, mubali uyu wakaleka dankha kupenja ntchito kwa sabata ziŵiri. Kweni pambere ŵandambe kunozga Nyumba ya Ufumu, chindindindi chikuru chikasunkhunya chigaŵa cha Kumamoto, uko kukaŵa mpingo uwu. Pakuti mubali uyu wakaŵa kuti wandambe ntchito, ndiyo wakadangilira pakupeleka wovwiri kweniso kuchita maulendo ghauliska pamanyuma pa chindindindi. Mubali uyu wakuti: “Para nati chete, nkhuwona kuti Yehova wakanituma uko wakamanya kuti kukhumbikwenge wovwiri.”

Phil na muwoli wake Sugar, awo ŵakaŵa pa ofesi ya Australasia, ŵakuti: “Uteŵeti withu ukati wasintha, tikaŵikapo mtima kuti tiŵe na umoyo wambura kukhumba vinandi. Ntheura tikalomba Yehova kuti watipe ulongozgi uwo ungatovwira pakusankha vyakuchita na  kutumbika chilichose icho tisankhenge. Ise tikakhumbanga kuti tijipeleke kukateŵetera mu charu chinyake. Yehova watitumbika chomene ndipo watinozgera nthowa kuti timuteŵetere na umoyo withu wose.” Pasono mbumba iyi yikuwungana na gulu la Chingelezi pa Samal Island, Davao, ku Philippines. Gulu ili lili na ŵapharazgi 34 na ŵapayiniya ŵanyengozose 9. Pasono ŵali na maadiresi 120 gha ŵanthu ŵakunweka kuti ŵawelereko. Iwo ŵakuti: “Pali ntchito yinandi yakuti tichite. Tili ŵakukondwa kuti tikathemba Yehova. Ichi chatovwira kuŵa na chipulikano chakukhora mwa iyo kweniso kumutemwa.”

Mudumbu wambura kutengwa wa ku Russia uyo wakatumika kukachita upayiniya wapadera, wakuti: “Upayiniya ukunipa mwaŵi wakuchitako mwakukwana ntchito yakuzirwa chomene ya kupharazga Ufumu wa Chiuta, iyo yizamuchitikaso yayi para yamara. Nkhukondwa chomene kuti nili chiteŵetero mu woko la Yehova.” Pasono mudumbu uyu wakusambira Baibolo na ŵanthu 6 ŵakufuma ku Iraq, Nigeria, Sri Lanka, Syria, na Zambia.

Ŵabali na ŵadumbu ŵanandi awo ŵakaŵa pa Beteli ku Zambia pasono ŵakuchita upayiniya, ndipo mbakukondwa kuti ŵakumalira nyengo yinandi mu uteŵeti wa m’munda. Andrew na muwoli wake awo mbapayiniya, ŵakuti: “Nyengo yichoko waka tikati tafumapo pa Beteli, tikawovwira ŵanthu ŵaŵiri kumanya kuŵazga na kulemba. Pa ŵasambiri ŵanayi awo tili nawo, yumoza ni msepuka wa vyaka 10, ndipo sonosono apa wayowoyenge nkhani yake yakwamba pa ungano wamukati mwa sabata. Mwanalume munyake na muwoli wake awo tikaŵapharazgira ŵakiza pa Chikumbusko, ndipo kwambira nyengo iyo ŵandakhalepo ku maungano gha mpingo.  Ŵakulutilira kusambira Baibolo ndipo ŵakuchita makora chomene. Tikughanaghana kuti tilekenge kulondezga ulongozgi wa Yehova, kugomezga kuti wali nase, kweniso kulindilira kuti watitumbike, mphanyi vyose ivi vindachitike.”

Edson na muwoli wake Artness nawo ŵakukhala ku Zambia. Pa nyengo iyo uteŵeti wawo ukasinthanga, pakaŵa kuti pajumpha myezi yichoko waka kufuma apo ŵakatolerana. Artness wakuti: “Ivyo tikasambira pa Beteli vyatovwira kuti tigwiliskirenge ntchito makora ivyo tili navyo na kuŵa ŵakukondwa, kwambura kujiphyora na ngongoli. Tindaghanaghanepo kuti tikabudiska kusankha kukateŵetera pa Beteli. Yehova watovwira, ndipo tasambira umo tingasinthira vilato vithu vyauzimu na kuvifiska. Chipulikano chithu mwa Yehova chakhora, ndipo tili ŵakunozgeka kulutilira kugomezgeka kwa Yehova.”