ŴABALI na ŵadumbu ŵa ku Kyrgyzstan pamoza na ŵabali ŵakufuma mu vyaru vinyake ŵakagwira ntchito chaka chimoza na hafu kunozga na kusazgirako ofesi ya munthavi ku Bishkek, msumba ukuru wa charu ichi. Pulogiramu yakujulira ofesi iyi yikaŵako pa Okutobala 24, 2015, mwezi umoza kufuma apo ntchito yikamalira. Ŵanthu ŵakujumpha 3,000 mu Nyumba za Ufumu 18 kweniso mu malo ghanyake 5 ŵakakondwa kuti ŵakajoyinika kuti ŵapulikeko pulogiramu iyi. Mubali Stephen Lett wa mu Wupu Wakulongozga ndiyo wakayowoya nkhani yakujulira ofesi, ya mutu wakuti “Teŵeterani Yehova na Mtima Wakufikapo.” Zuŵa lakulondezgapo, pakaŵaso pulogiramu yinyake yakukhozga, ndipo ŵapharazgi ŵanandi mu charu ichi ŵakaŵa na mwaŵi wa kupulikizgako pulogiramu iyi.

 Pa Chisulo, Meyi 14, 2016, ŵanthu ŵakukwana 6,435 ŵakaŵapo pakujulira ofesi ya munthavi ya Armenia. Ofesi iyi yili pa nambara 6 mu nyumba yakudikanya ka 18. Pa nyengo iyi ŵakajuliraso Nyumba Yakuchitiramo Maungano Ghakuru na makilasi gha Sukulu ya Ŵapharazgi ŵa Ufumu. Nkhani izo zikayowoyeka pa pulogiramu iyi zikalongosora umo ntchito ya ŵateŵeti ŵa Yehova mu Armenia yikambira. Ntchito iyi yikamba na ŵanthu ŵachoko waka ŵa ku Armenia awo ŵakasambira unenesko ku United States of America kuuyambiro wa m’ma 1900. Kufuma apo, yikambaso mu Armenia m’ma 1970, apo charu ichi chikaŵa mu wupu wa Soviet Union. Sonosono apa, gulu lithu likalembeskeka ku boma ndipo ofesi yikajulika. Ŵanandi awo ŵakaŵapo pakujulira ofesi ŵakaghanaghanapo yayi kuti vinthu ivi vingachitika apo iwo ŵachali ŵamoyo. Ungano ukafika peneko apo wose awo ŵakaŵapo ŵakakolerana na Mubali David Splane wa mu Wupu Wakulongozga kupeleka malo ghakutowa agha kwa Yehova.