Chiŵelengero chikuru cha ŵanthu awo ŵakuchimbira kwawo na ŵakusama awo ŵali mu charu cha Germany chapangiska kuti ŵabali ŵaŵe na mwaŵi wa kupharazgira ŵanthu ŵa viyowoyero vinyake. Mu myezi 9 sonosono apa, pakapangika magulu 229 na tumagulu twa ŵanthu ŵakuyowoya viyowoyero vinyake. Ŵapharazgi pafupifupi 800 ŵali mu makilasi 30 ndipo ŵakusambira viyowoyero 13.

Ŵabali ŵithu ŵakupharazgira ŵanthu ŵakuchimbira kwawo mu makampu agho ŵafikira. Ŵakuŵika tumashelufu mu malo ghakujumpha 200, ndipo ŵagaŵira mabuku pafupifupi 640,000.

 Wupu Wakulongozga ukazomerezga kuti kuŵe upharazgi wapadera kufuma mu Meyi m’paka Julayi 2016. Ŵapharazgi pafupifupi 700 awo ŵakuyowoya Chiarabic, ŵakufuma mu vyaru 7, ŵakaluta mu vigaŵa 10 vya ku Austria na Germany kuti ŵakapharazgire ŵanthu ŵakuchimbira kwawo awo ŵakuyowoya chiyowoyero ichi.

Ŵapharazgi 50 ŵa mpingo wa Faber’s Road Kriol ku Belize kanandi ŵakwenda pasi pakupharazga mu chigaŵa chawo. Ŵabali ŵanandi mu chigaŵa ichi mbakavu, kweni ŵakuyezgayezga kulongora mzimu wakupa. Vyaka vinandi kumasinda, ŵabali ŵakamba kusora ndalama zanjawara izo ŵakazisanganga mu msewu wa fuvu apo ŵakapharazganga nyumba na nyumba. Kufuma apo ŵakambira, kuumaliro wa chaka chilichose, wose ŵakukhala pasi na kusuka ndalama izi, kusankha, na kuzipenda.

Nangauli ndalama izi zinandi ni zambura nkhongono, kweni chaka chilichose ŵabali aŵa ŵakusanga ndalama pafupifupi madola 225 gha ku United States. Ŵabali ŵakugwiliskira ntchito hafu ya ndalama izi pa vyakukhumbikwa vya pa Nyumba yawo ya Ufumu, ndipo hafu yinyake ŵakutumizga ku mulimo wa pa charu chose.

Pa Malichi 5, 2016, ku Burundi kukachitika chinthu chambura kuluwika mu mdauko wa ŵanthu ŵa Yehova. Pa nyengo iyi, Mubali Anthony Griffin, mwimiliri wa ofesi yikuru ya Ŵakaboni wakiza mu charu ichi. Mipingo yikapulikizga pulogiramu yose ya ungano wapadera uwu pa wayilesi yinyake yakumanyikwa chomene mu charu ichi. Ŵanthu awo ŵakategherezgako pulogiramu iyi ŵakaŵa pafupifupi 4 miliyoni!

Pulogiramu ya pa wayilesi iyi yikaŵapa mwaŵi ukuru ŵanthu kupulika chisambizgo cha mu Baibolo ndipo ŵanandi  ŵakayilumba chomene. Yumoza wa ŵantchito ku wayilesi iyi uyo wakawovwirapo pakunozga pulogiramu iyi pa wayilesi, wakati, “Muchitenge kanandi waka pulogiramu iyi!” Ndipo mulara wa siteshoni iyi wakalemba kuti: “Nkhumupemphani kuti mulutilire [kupanga mapulogiramu ghanthena agha], chifukwa mungaponoska nagho ŵanthu ŵanandi.” Ŵanthu ŵanandi ŵakapulikizganga pulogiramu iyi mu mawayilesi ghawo.

Kukati kwakhala zuŵa limoza kuti Chikumbusko cha mu 2016 chichitike, ŵabali mu kagulu kakutali ka ku Nepal ŵakafipa mtima chomene ŵakati ŵapulika kuti pa sukulu yapafupi na holo iyo ŵakachita renti paŵenge dansi.

Pa madansi agha kanandi pakuŵa vyongo vyamaseŵera cha. Apo ŵabali ŵakanozganga holo mulenji wa zuŵa la Chikumbusko, uyo wakanozga dansi iyi wakaŵaphalira kuti, “Muzamupulika chilichose yayi padera pa sumu zithu.”

Chidansi chikamba nadi nyengo ya muhanya ndipo pakaŵa chongo chamaseŵera cha. Nangauli ŵabali nawo ŵakabwereka vimasipika vikuruvikuru kuluska ivyo ŵakakhumbanga pakwamba, kweni apo ŵakayezganga mayikirofoni ŵakapulikanga chilichose yayi chifukwa cha chongo cha ku dansi. Ŵabali ŵakakwenyelera chomene, ndipo ŵakalomba kufumira pasi pa mtima kuti Chiuta waŵawovwire. Kukati kwakhala maminiti 30 kuti Chikumbusko chiyambe, apo ŵabali ŵanandi ŵakafikanga, sumu za ku dansi kura zikaleka mwamabuchi. Icho chikachitika ntchakuti ŵanthu ŵanyake awo ŵakaloŵera ŵakamba kutimbana pa dansi iyi, ndipo ŵapolisi ŵakiza na kulekeska dansi. Ntheura ŵabali ŵakachita Chikumbusko kwambura vyongo, mwamtende, kweniso mwantchindi.

Giuseppe ni mupayiniya wanyengozose ku Italy. Wakugwira ntchito ku kampani ya vya Intaneti ndipo wakugwilira ku  nyumba yake. Mu mwezi wa Meyi 2016, wakaŵa pa ungano pamoza na ŵantchito ŵanyake pafupifupi 70 ndipo ŵakadumbiskananga fundo ziphya izo kampani yingalondezga pakuchita ntchito zake. Bwana wa kampani iyi wakamba kulongosora kuti pali mawebusayiti ghanyake agho kampani yawo yingatolerako. Kufuma apo, wakaŵalongora chiyelezgero cha mawebusayiti agha pa sikirini. Giuseppe wakazizwa chomene kuwona kuti webusayiti iyo bwana uyo wakalongora yikaŵa jw.org. Bwana uyu wakati: “Iyi ni webusayiti yiwemi chomene pa charu chose!” Kufuma apo, wakamba kulongosora vinthu vinyake vya umo webusayiti ya jw.org yili kupangikira. Wakayilumba chomene chifukwa chakuti malinki ghake ghakusuzga yayi kughasanga kweniso chifukwa cha mawonekero ghake ghakutowa chomene.

 Giuseppe wakati: “Ŵanyane ŵakazizwa chomene kuwona kuti webusayiti iyi yili mu viyowoyero vinandi chomene. Ungano ukati wamara, bwana wane muchoko wakaphalira ŵanyane na bwana mulara kuti: ‘Giuseppe nayo ni Kaboni wa Yehova.’ Ntheura bwana mulara wakati: ‘Gulu linu likwenera kulumbika chomene. Muli kupanga webusayiti yiwemi chomene iyo kampani yiliyose panji gulu lingaleka yayi kuyidokera. Nkhuwona kuti ŵakuŵikapo mtima chomene kuti nyengo zose yigwirenge makora ntchito kweniso ŵakwenera kuti ŵakupwelelera chomene pakulongosora tunthu.’ Soni zikanikora kuti nkhalumbika pa chinthu icho ine nindachiteko. Kweni nkhakondwa chomene kuti ŵanthu ŵanandi awo ŵakamanyanga chilichose yayi chakukhwaskana na Ŵakaboni ŵa Yehova, ŵakamanyira penepara. Pasono nkhuchezga na ŵanyane vya Baibolo ndipo ŵanyake ŵatatu nkhusambira nawo Baibolo.” Kampani iyo Giuseppe wakugwirako ntchito yikulutilira kusanda umo webusayiti ya jw.org yili kupangikira, Giuseppe nayo wakulutilira kudumbiskana Baibolo na ŵanyake.

Jorge ni munyamata uyo wakukhala ku Argentina. Kukwambilira kwa chaka cha 2010, Jorge wakapulika vya makani ghawemi kufuma kwa munyake wa mu kilasi. Kufuma apo, wakamba kusambira Baibolo na buku la Kasi Baibolo Likusambizgachi Chomenechomene? Pa nyengo iyi, Jorge wakaseŵeranga bola. Wakatimbanga makora chomene bola ndipo kilabu yinyake yikamutora. Mu Epulero 2014, timu yinyake ya ku Germany yikakhumbanga kumugura. Jorge wakakondwa chomene kuti wamuseŵera mu timu ya ku charu chinyake, ndipo wakazomera. Pakati pakhala mazuŵa ghachoko waka kuti Jorge walute ku Europe, kochi wake wakamufumba kuti: “Asi ndiwe yumoza wa Ŵakaboni ŵa Yehova? Unangenge waka umoyo wako pakuluta ku charu chinyake. Ine nane nkhaŵa Kaboni apo nkhaŵa munyamata. Timu yinyake ya ku Asia yikanitora.  Ŵakanilayizga vinthu vinandi chomene, ndipo nkhatoreka navyo mtima. Ntheura ine na mbumba yane tikaluta, kweni tikawerako na chitima.” Jorge wakuti: “Ivyo kochi uyu wakayowoya vikanikhwaska chomene, ntheura nkhasankha kuleka kuluta ku Europe. Mu 2015, nkhazgoka mupharazgi wambura kubatizika, kufuma apo nkhabatizika.”

Mu Seputembala 2015, ungano unyake wa chigaŵa wakuti “Yezgani Yesu!” ukachitikira ku Kampala, Uganda. Ŵanthu wose awo ŵakiza pa ungano uwu ŵakakondwa chomene apo mubali Mark Sanderson wa mu Wupu Wakulongozga wakafumiska Baibolo la Malemba Ghakupatulika mu Mang’anamuliro gha Charu Chiphya mu Chiluganda.

Mwanakazi munyake, uyo wakasambiranga Baibolo na Kaboni, wakati: “Nkhakondwa chomene apo nkhapokeranga Baibolo ili! Pa nyengo iyi, ŵanthu ŵakanozgekeranga kwiza kwa papa. Kuti ŵasange ndalama zakupokelera mulendo uyu, tchalitchi likamba kuguliska makolona agho papa ‘waghatumbika’ pa mtengo wa madola 30 gha ku United States. Ŵanthu ŵakakhumbanga vitumbiko kweni ŵanandi ŵakaŵavya ndalama. Kweni ine nkhapokera vitumbiko vyanadi kwaulere pa ungano wa chigaŵa. Yehova wakapeleka vitumbiko ivi ku wose awo ŵakiza pa ungano uwu, ndipo waliyose uyo wakhumba kupelekapo ndalama wakapelekanga kufumira pasi pa mtima. Zuŵa lililose para nkhuŵerenga Mazgu gha Yehova mu chiyowoyero chane chakonkhera na kumumanya makora Chiuta, nkhuwona kuti natumbikika nadi. Nkhuwonga chomene Yehova chifukwa cha kunipa Baibolo lane na lane.”

Pakukhumba kugongoweska ŵanthu kuti ŵaleke kugwiliskira ntchito webusayiti ya www.pr418.com, ŵalongozgi ŵa matchalitchi ghanyake ku Congo (Kinshasa) ŵakaphaliranga ŵanthu ŵawo kuti mabuku gha Ŵakaboni ŵa Yehova  ghakusindikizgika mu charu cha mizimu. Kuti ŵakhozgere fundo yawo iyi, ŵakalongoranga ŵanthu vilembo vya “www,” na kuyowoya kuti vikuyana waka na nambara ya 666 iyo yikuzunulika mu buku la Chuvumbuzi. (Chivu. 13:18) Chifukwa cha nkhani iyi, ŵanthu ŵanyake awo ŵakasambiranga Baibolo na Ŵakaboni ŵakaleka kusambira.

Mbumba yinyake iyo yikachitanga upayiniya yikati yalomba pa nkhani iyi, yikachema ŵanthu awo yikasambiranga nawo Baibolo pamoza na ŵabwezi ŵawo. Mbumba zitatu izo ŵakasambiranga nazo zikiza, ndipo ŵakati ŵamara kurya, mubali na mudumbu ŵakaŵawoneska vidiyo yakuti Ŵakaboni ŵa Yehova Ŵakupharazga mu Caru Cose. Ivyo ŵanthu aŵa ŵakasambira apa, vikapambana chomene na fundo zautesi izo ŵakapulika zakukhwaskana na uko mabuku ghithu ghakufuma. Sabata yakulondezgapo, mfumu wa mwanakazi munyake uyo ŵakasambiranga nayo wakapeleka ndalama zakukwana madola 100 gha ku United States ku Ŵakaboni aŵa kuti zikawovwire pa ntchito ya pa charu chose, nangauli iyo wakasambirangako yayi.

Nangauli ku chigaŵa cha ku mizi uko ŵabali ŵanyake ŵakukhala ku Papua New Guinea kulije Intaneti, kweni ŵabali ŵakuŵikapo mtima kuti ŵasambire sumu ziphya za Ufumu. Ntheura mpingo wa Mundip ukutuma mubali ku tawuni yakufupiko. Kuti mubali wakafike ku tawuni iyi wakwenda maora ghaŵiri pasi ndipo ghanyakeso ghaŵiri pa galimoto. Para wafika pa Intaneti, mubali uyu wakukopera sumu ziphya izi mu notibuku lake. Para wafika ku Nyumba ya Ufumu wakulemba sumu izi pa bolodi, ndipo waliyose mu mpingo wakukopera. Ŵabali na ŵadumbu aŵa ŵakukondwa chomene kwimbira lumoza na mipingo ya pa charu chose sumu ziphya izi pakusopa Yehova.