Kuŵa bwezi la Ciuta ncintu cakuzirwa comene ceneico cingacitika kwa imwe. Ciuta wazamumusambizgani umo mungaŵira ŵacimwemwe na ŵakuvikilirika; iye wazamumufwaturani ku vigomezgo vyautesi ndiposo ku maluso ghaheni ghakupweteka. Iye wazamutegherezga mapempero ghinu. Iye wazamovwirani kusangwa na mtende wa mu maghanoghano na cigomezgo. (Salmo 71:5; 73:28) Ciuta wazamumukhozgani mu nyengo za suzgo. (Salmo 18:18) Ndipo Ciuta wapereka kwa imwe cawanangwa cake ca umoyo wamuyirayira.—Ŵaroma 6:23.

Peneapo mukusendelera kwa Ciuta, muzamusendeleraso ku mabwezi gha Ciuta. Iwo nawo ŵazamuŵaso mabwezi ghinu. Mwaunenesko, iwo ŵazamuŵa nga ndi ŵabali na ŵadumbu kwa imwe. Iwo ŵazamuŵa ŵakukondwa kumusambizgani za Ciuta na kumovwirani ndiposo na kumukhuŵirizgani.

Tili ŵakuyana na Ciuta cara. Peneapo mukupenjerezga ubwezi na Ciuta, mukwenera kumanya fundo yakuzirwa iyi. Ubwezi na Ciuta kuti ndi ubwezi wa ŵantu ŵakuyana cara. Iye ndi murara comene ndiposo ngwavinjeru kweniso ngwankongono comene kuruska ise. Iye ndi Muwusi withu wakwenelera. Mwanteura usange tikukhumba kuti tiŵe bwezi lake, tikwenera kutegherezga kwa iye na kucita ivyo wakutiphalira kuti ticite. Ici nyengo zose cizamucitika kuti tisange candulo ca ise taŵene.—Yesaya 48:18.