Ciuta wakukhumba kuti muŵe bwezi lake. Kasi muli kughanaghanapo za kuŵa bwezi la Muntu wakuzirwa comene mu cilengiwa cose? Abrahamu, mweneuyo wakaŵako mu virimika vinandi ivyo vyajumpa, wakacemeka bwezi la Ciuta. (Yakobe 2:23) Ŵantu ŵanji awo ŵakuyowoyeka mu Baibolo nawo ŵakasangwa na ubwezi na Ciuta ndipo ŵakatumbikika comene. Mazuŵa ghano, ŵantu ŵakufuma ku vigaŵa vyose vya caru capasi ŵaŵa mabwezi gha Ciuta. Imwe namwe mungaŵa bwezi la Ciuta.

Kuŵa bwezi la Ciuta nkwakuzirwa comene kuruska kuŵa bwezi la muntu waliyose. Ciuta wandakhuŵazgepo mabwezi ghake ghakugomezgeka. (Salmo 18:25) Kuŵa bwezi la Ciuta nkwakuzirwa comene kuruska kuŵa na vyuma. Para muntu wa vyuma wapotera, ŵanji ŵakutora vyuma vyake. Ndipouli, awo ŵakusangwa cifukwa cakuŵa pa ubwezi na Ciuta ŵali na usambazi weneuwo palije uyo wangamanya kuŵatolera.—Mateyu 6:19.

Ŵantu ŵanji ŵangayezgayezga kumulekeskani kusambira za Ciuta. Ici cingacitika na mabwezi ghinu ghanji ndiposo na mbumba yinu. (Mateyu 10:36, 37) Usange ŵanji ŵakumofyani, panji kumusekani, jifumbani mwekha kuti: ‘Ni njani uyo nkukhumba kumukondweska—Ciuta panji ŵantu?’ Aghanaghanira za ici: Usange muntu yunji wakumuphalirani kuti muleke kurya, kasi mungamupulikira iye? Cara! Cifukwa mukukhumbikwira cakurya kuti muŵe na umoyo. Kweni Ciuta wangamupangani kuti muŵe na umoyo kwamuyirayira! Mwanteura mungazomerezganga cara waliyose kumulekeskani kusambira umo mungaŵira bwezi la Ciuta.—Yohane 17:3.