Mungasambira za Yehova mwa kuŵazga Baibolo. Mu nyengo zakale Ciuta wakasora ŵantu ŵeneawo ŵakalembanga maghanoghano ghake. Vyakulembeka ivyo vikucemeka Baibolo. Mazuŵa ghano tikusambira za Ciuta mwa kuŵazga Baibolo. Cifukwa cakuti mu Baibolo muli mazgu gha Yehova, panji uthenga, ilo likucemekaso kuti Mazgu gha Ciuta. Tingagomezga ivyo Baibolo likuyowoya cifukwa Yehova wakuteta cara. “Nkwambura macitiko kuti Ciuta watete.” (Ŵahebere 6:18) Muli unenesko mu Mazgu gha Ciuta.—Yohane 17:17.

Baibolo ndimoza mwa vyawanangwa vyakuzirwa comene ivyo Ciuta wapereka kwa ise. Liri nga ndi kalata yakufuma kwa dada wakutemweka kuya ku ŵana ŵake. Likutiphalira za layizgano la Ciuta la kusinta caru capasi kuŵa malo ghaweme gha kukhalamo—paradiso. Likutiphalira ivyo Ciuta wakacita mu nyengo zakale, na ivyo wakucita sono, ndiposo na ivyo wazamucitira ŵana ŵake ŵakugomezgeka muntazi. Likutovwiraso kumazga masuzgo ghithu ndiposo na umo tingasangira cimwemwe.—2 Timote 3:16, 17.

 Ŵakaboni ŵa Yehova ni mabwezi gha Ciuta; iwo ŵamovwiraninge kupulikiska ivyo Baibolo likusambizga. Ŵaphalirani iwo kuti mukukhumba kulisambira Baibolo. Iwo ŵakulipiriska ndrama cara cifukwa ca sambiro la Baibolo. (Mateyu 10:8) Mwakusazgirapo, mungasangikapo pa maungano gha Cikristu. Maungano agha ghakucitikira mu malo ghakusoperamo ghakucemeka Nyumba za Ufumu. Usange mungasangikapo pa maungano gha Cikristu agha, cimanyisko cinu ca Ciuta cizamuluta pantazi comene.

Mungasambira za Ciuta kwizira mu vintu ivyo wali kulenga. Mwaciyerezgero, Baibolo likuyowoya kuti: “Ciuta wakata mtambo na caru.” (Genesis 1:1) Penepapo Yehova wakata “mtambo,” iye wakalengaso dazi. Sono kasi ici cikutiphaliraci za Ciuta? Cikutiphalira kuti Yehova wali na nkongono zakuruska. Iye wangapanga cintu cankongono ca nga ndi dazi. Cikutiphaliraso kuti Yehova ngwavinjeru, cifukwa kukakhumbikwira vinjeru kuti walenge dazi, leneilo likupereka ungweru na cithukivu peneapo ilo likupya cara.

Cilengiwa ca Yehova cikurongora kuti iye wakutitemwa. Aghanaghanirani za mitundu yakupampana-pambana ya vipasi ivyo vili pacaru capasi. Yehova nga wakapereka mtundu umoza pera wa vipasi kwa ise—panji kulekerathu kupereka na umoza wuwo. Mu malo mwake, Yehova walikutipa mitundu yinandi ya vipasi vyakupambana-pambana mukawonekero, ukuru, mtundu, na kanowero. Ici cikurongora kuti Yehova ni Ciuta mweneuyo ngwacitemwa pera cara, kweniso ngwakupereka mwawanangwa ndiposo ngwakughanaghanira na walusungu.—Salmo 104:24.