Usange mukukhumba kuŵa bwezi la Ciuta, mukwenera kurondezga cisopo ico Ciuta wakuzomerezga. Yesu wakayowoya kuti “ŵasopi ŵeneco” ŵasopenge Ciuta mwakukolerana na “unenesko.” (Yohane 4:23, 24) Pali ntowa yimoza pera yiweme yakusopera Ciuta. (Ŵaefeso 4:4-6) Cisopo caunenesko cikurongozgera ku umoyo wamuyirayira, ndipo cisopo cautesi cikurongozgera ku paraniko.—Mateyu 7:13, 14.

Mungamanya cisopo caunenesko mwa kuwona ŵarondezgi ŵake. Cifukwa cakuti Yehova ni muweme, awo mbasopi ŵake ŵaunenesko ŵakwenera kuŵa ŵantu ŵaweme. Nga ndi umo khuni liweme la maorenji likupasira maorenji ghaweme, cisopo caunenesko cikupasa ŵantu ŵaweme.—Mateyu 7:15-20.

Mabwezi gha Yehova ghakucindika comene Baibolo. Igho ghakumanya kuti Baibolo ndakufuma kwa Yehova. Ghakuzomerezga ivyo likuyowoya kuti virongozge maumoyo ghawo, kumazga masuzgo ghawo, na kuŵavwira kusambira za Ciuta. (2 Timote 3:16) Igho ghakuyezgayezga kurondezga ivyo ŵakupharazga.

 Mabwezi gha Yehova ghakurongora citemwa kwa yumoza na munyake. Yesu wakarongora citemwa ku ŵantu mwa kuŵasambizga za Ciuta, mwa kucizga awo ŵakaŵa ŵarwari. Awo wakurondezga cisopo caunenesko ŵakurongoraso citemwa ku ŵanji. Nga ndi Yesu, iwo ŵakuyuyura cara ŵakavu panji ŵantu awo ŵakupambana nawo mtundu. Yesu wakayowoya kuti ŵantu ŵazamuŵamanya ŵasambiri ŵake kwizira mu citemwa ico ŵakurongora kwa yumoza na munyake.—Yohane 13:35.

Mabwezi gha Ciuta ghakutumbika zina la Ciuta, Yehova. Usange yunji wakukana kugwiriskira ncito zina linu, kasi muntu uyo wangaŵa bwezi linu leneco? Cara! Para tili na bwezi lithu, tikuzunura zina lake ndipo tikuyowoya vintu viweme vya bwezi lithu ilo ku ŵanji. Mwanteura, wose awo ŵakukhumba kuŵa mabwezi gha Ciuta ŵakwenera kugwiriskira ncito zina lake na kuyowoya za iye ku ŵanji. Yehova wakukhumba kuti ise ticite mwanteura.—Mateyu 6:9; Ŵaroma 10:13, 14.

Nga ndi Yesu, mabwezi gha Ciuta ghakusambizga ŵantu za Ufumu wa Ciuta. Ufumu wa Ciuta ni boma lakucanya leneilo lizamuzgora caru capasi kuŵa paradiso. Mabwezi gha Ciuta ghakugaŵana makani ghaweme agha gha Ufumu wa Ciuta na ŵanji.—Mateyu 24:14.

Ŵakaboni ŵa Yehova ŵakuyezgayezga kuti ŵaŵe mabwezi gha Ciuta. Iwo ŵakucindika Baibolo ndipo ŵali na citemwa pakati pawo. Iwo ŵakugwiriskira ncito na kutumbika zina la Ciuta ndiposo na kusambizga ŵanji za Ufumu wa Ciuta. Ŵakaboni ŵa Yehova ŵakurondezga cisopo caunenesko pacaru capasi mazuŵa ghano.