VYAKUSAZGIRAPO
Kumazga Mphindano pa Nkhani za Bizinesi
Nga umo vyalembekera pa 1 Ŵakorinte 6:1-8, mpositole Paulosi wakalongosora za milandu pakati pa Ŵakhristu ŵanyake. Wakakhuŵara pakuwona kuti Ŵakhristu ŵanji mu Korinte ŵakachitanga chikanga kutolerana “ku khoti la ŵanthu ŵambura urunji.” (Vesi 1) Paulosi wakapeleka vifukwa vyakupulikikwa ivyo Ŵakhristu ŵakwenera chara kukakirana ku mphara za charu kweni kuti ŵakwenera kumazga mphindano izi mu mpingo. Tiyeni tiwone vifukwa vinyake ivyo ulongozgi uwu ukapelekekera ndiposo vinthu vinyake ivyo vindazunulike mu ulongozgi uwu.
Usange tapambana maghanoghano na Mkhristu munyithu pa nkhani za bizinesi, chakwamba tikwenera kuwona umo tingamazgira nkhani iyi mu nthowa ya Yehova, mu nthowa yithu yayi. (Zintharika 14:12) Nga umo Yesu wakalongolera, ntchiwemi kumazga mphindano mwaluŵiro pambere yindafike pakusuzga. (Mateyu 5:23-26) Kweni chachitima ntchakuti Ŵakhristu ŵanji ŵakuŵa ŵankhwesa chomene, ndipo ŵakutolera nkhani zanthena ku makhoti gha charu. Paulosi wakati: “Para mukutolerana ku khoti chikulongora kuti mwatondeka.” Chifukwa wuli? Chifukwa chikuru chomene ntchakuti milandu yanthena yinganangiska zina liwemi la mpingo ndiposo Chiuta uyo tikumusopa. Ntheura tikukumbuka fumbo ilo Paulosi wakafumba, lakuti: “Mwalekerachi kuzomera waka kuti ŵamubudirani?”
Paulosi wakayowoyaso kuti Chiuta wali kupeleka ndondomeko yiwemi chomene ku mpingo yakumazgira mphindano zinandi. Ŵalara mbanalume Ŵachikhristu awo mbavinjeru chifukwa cha kumanya unenesko wa mu Malemba, ndipo Paulosi wakuti ‘ŵangeruzga ŵabali’ pa “nkhani za umoyo uno.” (Vesi 3-5) Yesu wakalongora kuti mphindano zakukhwaskana na maubudi ghakuru, nga nkhusesa na kwibirana, zikwenera kumazgika mwakulondezga nthowa zitatu. Yakwamba, awo ŵabudirana ŵakwenera kuyezga kumazga nkhani iyo paŵekha. Yachiŵiri, usange nthowa yakwamba iyi yatondeka, ŵachemerepo kaboni yumoza panji ŵaŵiri. Yachitatu, usange yachiŵiri nayo yatondeka, nkhani iyo ŵakayipeleke ku mpingo, kung’anamura ku ŵalara.
Ndipouli, ŵalara kuti ni maloya panji ŵabizinesi yayi, ndipo ŵakukhumbikwira kuchita nthena chara. Kuti ŵakuŵika fundo zakumazgira mphindano za bizinesi pakati pa ŵabali yayi. Kweni ŵakukhumba kovwira wose awo ŵakukhwaskika kuti ŵalondezge ulongozgi wa mu Malemba na kukolerana chinthu chimoza. Para vingasuzga chomene, ŵangadumbirana na mulaŵiliri wa dera panji ofesi ya munthavi ya Ŵakaboni ŵa Yehova. Ndipouli, pali vinthu vinyake ivyo vindazunulike mu ulongozgi wa Paulosi. Kasi ni vichi?
Nyengo zinyake, munthu wangatolera dala munyake ku khoti pakukhumba kufiska ivyo iyo wakughanaghana ndiposo kuti nkhani yimare mwamtende. Mwachiyelezgero, kumutolera ku khoti ndiyo yingaŵa nthowa yekha iyo wangazomerezgekera kutora chipati, kuti ndiyo wakhale na ŵana, kumanya ndalama izo wakwenera kupokera pamanyuma pa kupatana, kusanga ndalama za Insuransi, kuzomerezgeka kutora ngongoli para ndalama zamara, ndiposo kuzomerezgeka wilu (panji chikalata icho munthu wakulemba chakugaŵira katundu wake para wafwa.) Paliso vyakuchitika vinyake apo mubali wangachichizgika kuti nayo wakatore chisamoni mwakuti wajivikilire ku mulandu. *
Usange milandu yanthena yikuchitika kwambura mzimu wa mphindano, yingasuskana yayi na ulongozgi uwo Paulosi wakapeleka. * Ndipouli, chinthu chakwamba kwa Mkhristu nkhutuŵiskika kwa zina la Yehova ndiposo mtende na umoza mu mpingo. Pa vyose, ŵalondezgi ŵa Khristu ŵakumanyikwa na chitemwa chawo, ndipo “chitemwa . . . chikupenja vyake pera yayi.”—1 Ŵakorinte 13:4, 5; Yohane 13:34, 35.
^ ndime 2 Mu vyakuchitika vichoko waka, Mkhristu wangachitira munyake vinthu viheni chomene, nga nkhukolelera mwanakazi, kupweteka munthu, kukoma, panji kwiba vikuru. Para vyaŵa nthena, kungaŵa kwananga yayi kuphara nkhani iyi ku polisi, nangauli kuchita ntheura kungapangiska kuti watolekere ku khoti panji kujalirika mu jele.
^ ndime 3 Kuti mumanye vinandi, wonani Gongwe la Mulinda la Chicheŵa, la Malichi 15, 1997, peji 17 m’paka 22 ndiposo la Okutobala 15, 1991, peji 25 m’paka 28.
