VYAKUSAZGIRAPO
Mazgani Chizgoŵi cha Kunyenyenkha Nkhule
Chizgoŵi chambura kukondweska Yehova cha kunyenyenkha nkhule, chikupangiska munthu kuti wajighanaghanirenge yekha ndiposo kunanga maghanoghano. * Munthu uyo wali na chizgoŵi cha kunyenyenkha nkhule wakuwona ŵanji nga ŵali kulengekera waka kugonana. Wakuŵawona nga ŵaliriko waka kuti ŵakhorweskenge khumbo lake la kugonana. Wakuwona kugonana kuti ntchilongolero cha chitemwa yayi, kweni ntchinthu chakuti chikhorweskenge waka makhumbiro ghake gha kugonana. Kweni wakukhorwa nyengo yichoko waka. Unenesko ngwakuti, m’malo mwa kuzgora viŵaro vya thupi lake kuŵa vyakufwa, “ku uzaghali, ukazuzi, makhumbiro ghakugonana kwambura kujikora,” munthu uyo wakunyenyenkha nkhule wakuviwuska.
Mpositole Paulosi wakalemba kuti: “Ŵakutemweka, . . . tiyeni tijitozge ku ukazuzi wose wa thupi na wauzimu, mwakuti tilutilire kuŵa ŵatuŵa apo tikopa Chiuta.” (2 Ŵakorinte 7:1) Para vikumusuzgani kulondezga mazgu agha, lekani kugongowa. Yehova ‘ngwakunozgeka kugowokera’ ndiposo kovwira. (Masalimo 86:5; Luka 11:9-13) Enya, pakuti kanandi mukujisuska para mwachita chizgoŵi ichi ndipo mukuyezgayezga kuti muleke nangauli nyengo zinyake mukutondeka, chikulongora kuti muli na mtima uwemi. Kumbukirani kuti “Chiuta ni mukuru kuluska mitima yithu ndipo wakumanya vinthu vyose.” (1 Yohane 3:20) Chiuta wakuwona vinandi kuluska waka zakwananga zithu, wakuwona wunthu withu wose. Ichi chikumupangiska kuti waŵenge nase na chitima para tikulomba kuti watichitire lusungu. Ntheura tingavukanga yayi kulomba Chiuta mwakufumira pasi pa mtima ndiposo mwakujiyuyura, nga ni mwana uyo wakuluta kwa awiske para wali na suzgo. Yehova wamupaninge njuŵi yakutowa. (Masalimo 51:1-12, 17; Yesaya 1:18) Ndipouli, mukwenera kuchitapo kanthu mwakukolerana na malurombo ghinu. Mwachiyelezgero mukwenera kufwilirapo kugega vithuzithuzi panji chinthu chilichose icho chingawuska khumbo la kugonana ndiposo ŵabwezi ŵaheni. *
Para suzgo linu la kunyenyenkha nkhule likulutilira, phalirani ŵapapi ŵinu awo Mbakhristu panji mubwezi winu wakukhwima mwauzimu. *
^ ndime 1 Kunyenyenkha nkhule nkhukorakora panji kuseŵereska viŵaro vyakubisika, ndipo paumaliro wanalume panji wanakazi ukufuma.
^ ndime 2 Kuti waliyose mu mbumba wagwiliskirenge ntchito kompyuta mwakwenelera, mbumba zinandi zikuyiŵika pa balaza, apo mphakuwonekera. Mwakusazgirapo, mbumba zinyake zikugura pulogiramu iyo yikuwuskamo vinthu vyambura kukhumbikwa mu kompyuta. Ndipouli, palije pulogiramu iyo njakugomezgeka fikepo.
^ ndime 1 Kuti mumanye masachizgo ghakovwira gha umo mungamazgira suzgo la kunyenyenkha nkhule, wonani nkhani yakuti: “Zimene Achinyamata Amadzifunsa . . . Kodi Ndingathetse Bwanji Chizolowezi Chimenechi?” mu Galamukani! ya Novembala 2006, ndiposo mu buku la Mayankho a Zimene Achinyamata Amafunsa, Buku Loyamba peji 178 m’paka 182.
