SAMBIRO 9
Kugwiliskira Ntchito Mwaluso Mavidiyo na Vithuzi Pakusambizga
Genizesi 15:5
FUNDO YIKURU: Gwiliskirani ntchito vithuzi na mavidiyo kuti fundo zinu zikuru zipulikikwe makora.
UMO MUNGACHITIRA:
-
Sankhani vinthu vyakuwoneka ivyo vingamovwirani kuti musambizge mwaluso. Gwiliskirani ntchito vithuzi, mapu, mizere yakulongora utali wa nyengo, na vinthu vinyake kuti mudidimizge fundo zakuzirwa chomene. Wovwirani ŵategherezgi ŵinu kuti ŵakumbukenge fundo yikuru m’malo mwa kukumbuka waka vinthu vyakuwoneka ivyo mwangugwiliskira ntchito.
-
Woneseskani kuti ŵategherezgi ŵinu ŵakuwona makora vinthu vyakuwoneka ivyo mukugwiliskira ntchito. Mwachiyelezgero, para mukugwiliskira ntchito chithuzi pa pulatifomu, chikwenera kuŵa chikuru makora.
