Wakutemweka Mupharazgi wa Ufumu:

Jitorani kuti ndimwe yumoza wa ŵapositole awo ŵakaŵa pa Phiri la Maolive. Yesu wakuwonekera kwa imwe. Ndipo pambere wandakwere kuchanya, wakumuphalirani kuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:8) Kasi mungachita wuli?

Panyake mungachita wofi pakuwona ukuru wa mulimo. Mungajifumba kuti, ‘Vingachitika wuli kuti taŵasambiri ŵachoko waka, tichitire ukaboni “ku vigaŵa vyakutali chomene vya charu chapasi”?’ Mungakumbuka chenjezgo ilo Yesu wakapeleka pa usiku wakuti machero ghake wafwenge, lakuti: “Muzga ni mukuru chara kuluska fumu yake. Usange ŵakanitambuzga ine, ŵatambuzgenge na imwe wuwo. Usange ŵasungilira mazgu ghane, ŵasungilirengeso mazgu ghinu. Kweni ŵachitenge vinthu vyose ivi chifukwa cha zina lane, chifukwa ŵakumumanya yayi Uyo wakanituma.” (Yoh. 15:20, 21) Pakughanaghanira mazgu agha, mungajifumba kuti, ‘Kasi ningachitira wuli ukaboni mwakukwana uku pali ŵanthu ŵakususka ndiposo nthambuzgo?’

Mafumbo ghanthena agha ndigho tikujifumba mazuŵa ghano. Pakuŵa Ŵakaboni ŵa Yehova, mulimo withu ngwakuti tichitire ukaboni mwakukwana ku “vigaŵa vyakutali chomene vya charu chapasi,” ku “ŵanthu ŵa mitundu yose.” (Mat. 28:19, 20) Kasi tingafiska wuli mulimo uwu, chomenechomene apo tikususka nga umo vili kuyowoyekera kale?

Buku la Milimo ya Ŵapositole likutiphalira nkhani yakukondweska ya umo Yehova wakawovwilira ŵapositole na Ŵakhristu ŵanyake ŵakwambilira kuti ŵafiske mulimo wawo. Buku ilo mukuŵazga sono ili, lanozgeka kuti limovwirani kusanda nkhani iyi na kuti mumanye makora vinthu ivyo vili kulembeka mu buku la Milimo. Muzizwenge kuwona kuti pali vinthu vinandi ivyo vikuyana pakati pa ŵateŵeti ŵa Chiuta ŵakale na ŵa mazuŵa ghano. Muwonenge kuti mulimo uwo tikuchita kweniso kendeskero ka mulimo uwu vikuyana na umo vikachitikiranga mu nyengo ya ŵapositole. Para mungaghanaghanirapo chomene vinthu ivi, mulutilirenge kugomezga kuti Yehova wachali kulongozga gulu lake la pa charu cha pasi mazuŵa ghano.

Tikugomezga kuti apo mukusanda buku la Milimo, mukhozgenge chigomezgo chinu chakuti Yehova wamovwiraninge ndiposo chakuti mzimu utuŵa umufighiliraninge, nakuti ivi ndivyo tikulomba. Ntheura mphanyi mwaŵikapo mtima kuti mulutilire “kuchitira ukaboni mwakukwana vya Ufumu wa Chiuta” na kovwira ŵanji kusanga nthowa yakuya ku chiponosko.—Mil. 28:23; 1 Tim. 4:16.