MUTU 9
“Chiuta Wakutemwera Yayi”
Mulimo wa kupharazga ukafika ku Ŵamitundu ŵambura kukotoleka
Nkhani iyi yili pa Milimo 10:1–11:30
1-3. Kasi Petrosi wakawona mboniwoni wuli, ndipo chifukwa wuli tikwenera kumanya ng’anamuro lake?
MUKAŴA mu chaka cha 36 C.E. Petrosi wakalombanga pachanya pa nyumba iyo yikaŵa pafupi na nyanja mu msumba wa Yopa. Wakaŵa mulendo mu nyumba iyi ndipo wakhalako tumazuŵa tunandiko. Pakuti wakaŵa wakukhumbisiska kukhala ku malo agha, wakalongora kuti wakaŵavya mtima wa sankho. Mweneko wa nyumba iyi wakaŵa Simoni, uyo wakanyukanga vikumba, ndipo ni Muyuda waliyose yayi uyo wakazomeranga kukhala na munthu wanthena. a Ndipouli, Petrosi wakaŵa pafupi kusambira fundo yakuti Yehova wakutemwera yayi.
2 Apo Petrosi wakalombanga, wakaŵa mu kazimuzimu. Ivyo wakawona mu mboniwoni vikaŵa vyakuti vingahangayiska Muyuda waliyose. Kuchanya kukakhiranga chisalu icho mukaŵa vinyama ivyo Dango likatenge ni vyakufipirwa. Wati waphalirika kuti wakome na kurya, Petrosi wakazgora kuti: “Nindaryepo chinthu chilichose chakufipirwa na chaukazuzi.” Katatu kose wakaphalirika kuti: “Leka kuchema vinthu ivyo Chiuta watozga kuti ni vyakufipirwa.” (Mil. 10:14-16) Petrosi wakahangayika na mboniwoni iyi, kweni kwa nyengo yitali yayi.
3 Kasi mboniwoni iyo Petrosi wakawona yikang’anamurangachi? Ntchakuzirwa kuti timanye ng’anamuro la mboniwoni iyi, chifukwa yikulongora umo Yehova wakuwonera ŵanthu. Pakuŵa Ŵakhristu ŵaunenesko, tingachitira ukaboni mwakukwana vya Ufumu wa Chiuta pekha para tasambira umo Chiuta wakuwonera ŵanthu. Kuti timanye ng’anamuro la mboniwoni iyo Petrosi wakawona, tiyeni tisande ivyo vikachitika pa nyengo iyi.
‘Nyengo Zose Wakaŵeyeleranga kwa Chiuta’ (Milimo 10:1-8)
4, 5. Kasi Koroneliyo wakaŵa njani, ndipo ntchivichi chikachitika apo wakalombanga?
4 Petrosi wakamanyanga yayi kuti mayiro ghake mu Kesareya, msumba uwo ukaŵa kumpoto makilomita pafupifupi 50, Chiuta wakalongoraso mboniwoni kwa munthu munyake zina lake Koroneliyo. Koroneliyo, mulara wa gulu linyake la ŵasilikari ŵa Romu, wakaŵa ‘munthu wakusopa.’ b Kweniso wakaŵa munthu uyo wakapweleleranga makora mbumba yake, chifukwa wakaŵa wakopa “Chiuta pamoza na ŵamunyumba yake wose.” Koroneliyo wakaŵa munthu wakung’anamukira ku Chiyuda yayi; kweni wakaŵa Wamitundu wambura kukotoleka. Ndipouli, wakachitiranga lusungu Ŵayuda ŵakusoŵerwa, wakaŵapanga wovwiri. Munthu wa mtima uwemi uyu ‘wakaŵeyeleranga Chiuta nyengo zose.’—Mil. 10:2.
5 Cha m’ma 3 koloko muhanya, apo Koroneliyo wakalombanga, wakawona mungelo mu mboniwoni uyo wakamuphalira kuti: “Malurombo ghako na vyawanangwa vyakwera kwa Chiuta ndipo vili nga ntchikumbusko.” (Mil. 10:4) Nga umo mungelo wakamuphalilira, Koroneliyo wakatuma ŵanthu kukachema mpositole Petrosi. Pakuŵa Wamitundu wambura kukotoleka, Koroneliyo wakaŵa pafupi kupika mwaŵi uwo kumasinda kose wakaŵavya. Wakaŵa pafupi kupulika uthenga wa chiponosko.
6, 7. (a) Yowoyani chakuchitika icho chikulongora kuti Chiuta wakuzgora malurombo gha awo ŵakukhumba kumanya unenesko wakukhwaskana na iyo. (b) Kasi pa vyakuchitika vyanthena ivi tikutorapo fundo wuli?
6 Kasi mazuŵa ghano Chiuta wakuzgora malurombo gha ŵanthu ŵa mitima yiwemi awo ŵakukhumba kumanya unenesko wakukhwaskana na iyo? Wonani chakuchitika ichi. Mwanakazi munyake ku Albania wakapokera Gongwe la Mulinda ilo likaŵa na nkhani yakukhwaskana na kulera ŵana. c Wakaphalira Kaboni uyo wakiza pa nyumba yake kuti: “Kasi mungagomezga para ningamuphalirani kuti nalombanga kwa Chiuta kuti wanipe wovwiri wakulelera ŵana ŵane ŵasungwana? Ndiyo wamutumani. Mwanipa wovwiri uwo nakhumbanga nadi.” Mama uyu na ŵana ŵake ŵakamba kusambira Baibolo, ndipo pamanyuma mfumu wake nayo wakamba kusambira.
7 Kasi ivi vikachitika penepapa pera mbwenu? Yayi. Vyanthena ivi vikuchitika kanandi waka pa charu chose, ndipo tingati vikuchitika mwamwaŵi waka yayi. Ipo kasi apa tikutorapo fundo wuli? Yakwamba njakuti Yehova wakuzgora malurombo gha ŵanthu awo ŵakumupenja nadi. (1 Mathe. 8:41-43; Sal. 65:2) Yachiŵiri njakuti ŵangelo ŵakutovwira pa mulimo withu wa kupharazga.—Chivu. 14:6, 7.
‘Petrosi Wakaghanaghanirapo Chomene’ (Milimo 10:9-23a)
8, 9. Kasi mzimu ukamuphalira vichi Petrosi, ndipo iyo wakachita wuli?
8 “Uku Petrosi wachali kughanaghanira” icho mboniwoni iyo wakawona pachanya pa nyumba yikang’anamuranga, mathenga ghakufuma kwa Koroneliyo ghakafika. (Mil. 10:17) Kasi Petrosi, uyo wakakana katatu kuti wangarya yayi vyakurya vyaukazuzi kuyana na Dango, wakaŵa wakukhumbisiska kuluta na ŵanthu aŵa na kukanjira mu nyumba ya munthu Wamitundu? Mzimu utuŵa ukamovwira kumanya khumbo la Chiuta pa nkhani iyi. Petrosi wakaphalirika kuti: “Wona, ŵanalume ŵatatu ŵakukupenja. Sono wuka, khira ndipo ulute nawo. Kukayika chara nanga mphachoko chifukwa ndine naŵatuma.” (Mil. 10:19, 20) Tikukayika yayi kuti mboniwoni ya chisalu iyo Petrosi wakawona, yikamovwira kupulikira ivyo mzimu utuŵa ukamuphalira.
9 Wati wamanya kuti Chiuta wakaphalira Koroneliyo kutuma ŵanthu kuti ŵacheme iyo, Petrosi wakaŵanjizga mu nyumba ŵalendo Ŵamitundu aŵa ndipo ‘wakakhala nawo.’ (Mil. 10:23) Pa nyengo iyi, mpositole wakupulikira uyu, wakaŵa kuti wamba kale kusintha maghanoghano ghake kuti ghakolerane na khumbo la Chiuta.
10. Kasi Yehova wakulongozga wuli ŵanthu ŵake, ndipo tikwenera kujifumba mafumbo wuli?
10 Mazuŵa ghano napo, Yehova wakulutilira kulongozga ŵanthu ŵake. (Zinth. 4:18) Kwizira mwa mzimu wake utuŵa, wakulongozga “muzga wakugomezgeka na wavinjeru” uyo ni Wupu Wakulongozga. (Mat. 24:45) Nyengo zinyake pakuŵa kapulikiskiro kaphya ka Mazgu gha Chiuta, ndipo nyengo zinyake gulu likusintha umo likwendeskera vinthu. Tingachita makora kujifumba kuti: ‘Kasi nkhuchita wuli para vinthu vyasintha? Kasi nkhupulikira ulongozgi wa mzimu wa Chiuta pa nkhani izi?’
Petrosi “Wakaŵaphalira Kuti Ŵabatizike” (Milimo 10:23-48)
11, 12. Kasi Petrosi wakachita vichi wati wafika ku Kesareya, ndipo wakasambira vichi?
11 Zuŵa lakulondezgapo wati wawona mboniwoni, Petrosi na ŵanthu ŵanyake 9, kung’anamura mathenga ghatatu agho ghakatumika na Koroneliyo kweniso ‘ŵabali Ŵachiyuda 6,’ ŵakanyamuka kufuma ku Yopa kuya ku Kesareya. (Mil. 11:12) Apo wakalindizganga Petrosi, Koroneliyo wakachemera pamoza “ŵabali ŵake na ŵabwezi ŵake ŵa pa mtima,” awo vikuwoneka kuti ŵakaŵa Ŵamitundu. (Mil. 10:24) Wati wafika, Petrosi wakachita chinthu icho wakaghanaghanapo yayi kuti wangachita: Wakanjira mu nyumba ya munthu Wamitundu wambura kukotoleka. Petrosi wakalongosora kuti: “Mukumanya makora kuti Muyuda wakuzomerezgeka yayi kuchezga panji kuŵa pafupi na munthu wa mtundu unyake. Kweni Chiuta wanilongora kuti nileke kuchema munthu kuti ngwakufipirwa panji mukazuzi.” (Mil. 10:28) Pa nyengo iyi Petrosi wakamanya kuti mboniwoni iyo wakawona yikamusambizganga sambiro lakuzirwa, kuti likaŵa la vyakurya pera yayi. Wakeneranga chara ‘kuchema munthu nanga wangaŵa Wamitundu kuti ngwakufipirwa.’
“Koroneliyo wakaŵalindizganga ndipo wakachemera pamoza ŵabali ŵake na ŵabwezi ŵake ŵapamtima.”—Milimo 10:24
12 Ŵanthu awo ŵakawungana ŵakaŵa ŵakunweka kupulikizga kwa Petrosi. Koroneliyo wakalongosora kuti: “Tose tili panthazi pa Chiuta kuti tipulike vinthu vyose ivyo Yehova wakutuma kuti utiphalire.” (Mil. 10:33) Kasi imwe mungajipulika wuli usange mungapulika mazgu agha kufuma kwa munthu wakunweka? Petrosi wakamba na kuyowoya mazgu ghankhongono wakati: “Nadi, sono namanya kuti Chiuta wakutemwera yayi. Kweni wakupokelera munthu wa mtundu uliwose uyo wakumopa na kuchita urunji.” (Mil. 10:34, 35) Petrosi wakamanya kuti Chiuta wakutemwa munthu chifukwa cha fuko, mtundu, nesi vinthu ivyo wali navyo yayi. Petrosi wakalutilira kuchitira ukaboni vya uteŵeti, nyifwa, na chiwuka cha Yesu.
13, 14. (a) Kasi ntchinthu wuli chapadera icho chikachitika Koroneliyo na Ŵamitundu ŵanyake ŵati ŵazgoka Ŵakhristu mu 36 C.E.? (b) Chifukwa wuli tikwenera yayi kulaŵiska chisko cha munthu pakupharazga?
13 Pa nyengo iyi chinthu chinyake icho chikaŵa chindachitikepo chikachitika. “Uku Petrosi wachali kuyowoya,. . . mzimu utuŵa ukiza” pa ŵanthu Ŵamitundu. (Mil. 10:44, 45) Mu Malemba, ni apa pera apo pakuti ŵanthu ŵakapokera mzimu utuŵa pambere ŵandabatizike. Wati wawona kuti Chiuta wazomerezga, Petrosi “wakaŵaphalira [ŵanthu Ŵamitundu aŵa] kuti ŵabatizike.” (Mil. 10:48) Ŵamitundu aŵa ŵati ŵazgoka Ŵakhristu mu 36 C.E., ukaŵa ukaboni wakuti Ŵayuda ŵaleka kutemweka mwapadera. (Dan. 9:24-27) Pakuti Petrosi ndiyo wakachitira ukaboni, wakagwiliskira ntchito ‘kiyi wa ufumu’ wachitatu kweniso waumaliro. (Mat. 16:19) Kiyi uyu wakapeleka mwaŵi ku Ŵamitundu ŵambura kukotoleka kuti ŵaŵe Ŵakhristu ŵakuphakazgika na mzimu.
14 Pakuŵa ŵapharazgi ŵa Ufumu mazuŵa ghano, tikumanya kuti “Chiuta wakutemwera yayi.” (Rom. 2:11) Khumbo lake ndakuti ‘ŵanthu ŵa mitundu yose ŵaponoskeke.’ (1 Tim. 2:4) Ntheura tikwenera yayi kulaŵiska chisko cha munthu pakupharazga. Mulimo withu ngwa kuchitira ukaboni mwakukwana vya Ufumu wa Chiuta, ntheura tikwenera kupharazgira ŵanthu wose, kwambura kulaŵiska fuko, mtundu, mawonekero, panji chisopa chawo.
“Ŵakaleka Kumususka, Ndipo Ŵakachindika Chiuta” (Milimo 11:1-18)
15, 16. Chifukwa wuli Ŵakhristu ŵanyake Ŵachiyuda ŵakasuskananga na Petrosi, kweni Petrosi wakalongosora wuli ivyo wakachita?
15 Tikukayika yayi kuti Petrosi wakaŵa wakunweka kuluta ku Yerusalemu kuti wakayowoye ivyo vikachitika. Vikuwoneka kuti nkhani yakuti Ŵamitundu ŵambura kukotoleka “ŵapokera mazgu gha Chiuta” ndiyo yikadankha kufika pambere iyo wandafike. Petrosi wati wafika, “awo ŵakakoseranga ukotoli ŵakamba kumususka.” Ŵakazizwa chifukwa chakuti iyo wakanjira “mu nyumba ya ŵanthu ŵambura kukotoleka na kurya nawo.” (Mil. 11:1-3) Nkhani yake yikaŵa ya kususka Ŵamitundu kuti ŵazgoka wuli ŵalondezgi ŵa Khristu yayi. Kweni ŵasambiri Ŵachiyuda aŵa ŵakakoseranga kuti Ŵamitundu nawo ŵakwenera kukotoleka, kuti ŵasope Yehova mwakuzomerezgeka. Ichi chikulongora kuti ŵasambiri ŵanji Ŵachiyuda vikaŵasuzganga kulekerathu kulondezga Dango la Mozesi.
16 Kasi Petrosi wakalongosora wuli ivyo wakachita? Kuyana na Milimo 11:4-16, Petrosi wakaŵalongosolera maukaboni ghanayi ghakufuma kuchanya: (1) mboniwoni iyo Chiuta wakamulongora (Mavesi 4-10); (2) dango la mzimu (Mavesi 11, 12); (3) mungelo wakiza kwa Koroneliyo (Mavesi 13, 14); ndiposo (4) mzimu utuŵa ukapungulika pa Ŵamitundu. (Mavesi 15, 16) Petrosi wakamalizga na fumbo lakuzirwa chomene lakuti: “Ntheura, usange Chiuta wakapeleka chawanangwa chakuyana waka [cha mzimu utuŵa] kwa iwo [Ŵamitundu ŵakupulikana] nga ni umo wakachitiraso kwa ise [Ŵayuda], taŵeneise tikagomezga Fumu Yesu Khristu, nkhaŵa njani ine kuti nijandizge Chiuta?”—Mil. 11:17.
17, 18. (a) Kasi mazgu gha Petrosi ghakachiska Ŵakhristu Ŵachiyuda kuti ŵachite vichi? (b) Chifukwa wuli nyengo zinyake chingaŵa chakusuzga kulutilira kuŵa ŵakukolerana mu mpingo, ndipo tikwenera kujifumba mafumbo wuli?
17 Mazgu gha Petrosi ghakachiska Ŵakhristu Ŵachiyuda kuti ŵasankhe icho ŵachitenge. Kasi ŵalekenge sankho na kupokelera Ŵamitundu awo ŵakaŵa kuti ŵabatizika waka kuŵa Ŵakhristu ŵanyawo? Nkhani iyi yikutiphalira kuti: “Sono [ŵapositole na Ŵakhristu ŵanyake Ŵachiyuda] ŵakati ŵapulika vinthu ivi, ŵakaleka kumususka, ndipo ŵakachindika Chiuta, ŵakati: ‘Chiuta wapelekaso mwaŵi ku ŵanthu ŵamitundu kuti ŵang’anamuke mtima kuti ŵazakasange umoyo.’” (Mil. 11:18) Chifukwa chakuti ŵakawona vinthu mwakwenelera, mpingo ukalutilira kuŵa wakukolerana.
18 Mazuŵa ghano, nyengo zinyake chingaŵa chakusuzga kusungilira umoza chifukwa chakuti Ŵakhristu ŵaunenesko ŵakufuma mu “mitundu yose na mafuko na ŵanthu na malulimi.” (Chivu. 7:9) Ntheura mu mipingo yinandi tikusanga ŵanthu awo wakupambana mitundu, kakhaliro, kweniso uko ŵakufuma. Tikwenera kujifumba kuti: ‘Kasi nawuskamo sankho mu mtima wane? Kasi naŵikapo mtima kuti nileke kutolera nkharo ya charu iyo yikugaŵaniska ŵanthu, nga nkhutemwera mtundu, fuko, kujikuzga chifukwa cha kakhaliro, kuti niwonenge Ŵakhristu ŵanyane mwakwenelera?’ Kumbukani ivyo vikachitikira Petrosi (Kefase) vyaka vyati vyajumphapo kufuma apo Ŵamitundu ŵakazgokera Ŵakhristu. Chifukwa cha sankho, “wakamba kukhwecha na kujipatura” ku Ŵakhristu Ŵamitundu, ndipo Paulosi wakamususka. (Gal. 2:11-14) Tiyeni nyengo zose tiŵe maso na chipingo cha sankho.
“Ŵanandi Chomene Ŵakagomezga” (Milimo 11:19-26a)
19. Kasi Ŵakhristu Ŵachiyuda ku Antiyoke ŵakamba kupharazgira anjani, ndipo ntchivichi chikachitika?
19 Kasi ŵalondezgi ŵa Yesu ŵakamba kupharazga ku Ŵamitundu ŵambura kukotoleka? Wonani ivyo vikachitika mu Antiyoke wa ku Siriya. d Mu msumba uwu mukaŵa Ŵayuda ŵanandi, kweni Ŵayuda aŵa na Ŵamitundu ŵakatinkhananga chomene yayi. Ntheura msumba wa Antiyoke ghakaŵa malo ghawemi kupharazgira Ŵamitundu. Mu msumba uwu ndimo ŵasambiri ŵanyake Ŵachiyuda ŵakamba kupharazga makani ghawemi ku “ŵanthu ŵakuyowoya Chigiriki.” (Mil. 11:20) Ŵakapharazgiranga Ŵayuda awo ŵakayowoyanga Chigiriki kweniso Ŵamitundu ŵambura kukotoleka. Yehova wakatumbika mulimo wawo, ndipo “ŵanandi chomene ŵakagomezga.”—Mil. 11:21.
20, 21. Kasi Baranaba wakalongora wuli kuti wakaŵa wakujiyuyura, ndipo ise tingamuyezga wuli kuti tifiske uteŵeti withu?
20 Mpingo wa mu Yerusalemu ukatuma Baranaba ku Antiyoke kuti wakawovwire ŵanthu ŵakunweka aŵa. Ŵanthu ŵakunweka ŵakwenera kuti ŵakaŵa ŵanandi chomene mwakuti Baranaba yekha wakaŵa kuti wangakwaniska yayi kuŵawovwira. Kasi wakawona kuti ni njani wangamovwira pa mulimo uwu? Iyo wakawona kuti munthu wakwenelera ni Saulosi, uyo wakaŵa mpositole ku mitundu. (Mil. 9:15; Rom. 1:5) Kasi Baranaba wakawona Saulosi kuti wangaŵa mulwani wake? Yayi, Baranaba wakajiyuyura chomene. Ndiyo wakawuka ulendo kuluta ku Taraso, kukatora Saulosi, na kwiza nayo ku Antiyoke kuti ŵazakawovwirane. Wose ŵaŵiri ŵakakhalako chaka chimoza kwenekura kukhozga ŵasambiri mu mpingo.—Mil. 11:22-26a.
21 Kasi tingalongora wuli kujiyuyura apo tikufiska uteŵeti withu? Tikulongora kuti ndise ŵakujiyuyura para tikuzomera kuti pali vinyake ivyo tekha tingavifiska yayi. Tose tili na nkhongono kweniso maluso ghakupambana. Mwachiyelezgero, ŵanyake ŵangaŵa kuti ŵakuchita makora chomene pakupharazga mwamwaŵi panji kunyumba na nyumba kweni vikuŵasuzga kuwelerako ku ŵakunweka panji kwambiska masambiro gha Baibolo. Usange mukukhumba kuti muchitenge makora chigaŵa chinyake cha uteŵeti, mwalekerachi kupempha wovwiri ku ŵanyinu? Para mungachita nthena mungachita vinandi mu uteŵeti ndipo mungaŵa na chimwemwe chikuru.—1 Kor. 9:26.
“Ŵakadumura Kuti Ŵatumizgenge Wovwiri” (Milimo 11:26-30)
22, 23. Kasi ŵabali ŵa mu Antiyoke ŵakalongora wuli kuti ŵakatemwanga ŵabali ŵawo, ndipo ŵanthu ŵa Chiuta mazuŵa ghano ŵakuŵayezga wuli?
22 Mu Antiyoke ndimo “ŵasambiri mwakulongozgeka na Chiuta ŵakamba kuchemeka Ŵakhristu.” (Mil. 11:26b) Zina lakupelekeka na Chiuta ili, likulongosora ŵanthu awo ŵakuchita vinthu nga umo wakachitiranga Khristu. Apo ŵanthu ŵa mitundu ŵakazgokanga Ŵakhristu, kasi pakaŵa ubali pakati pa Ŵakhristu Ŵachiyuda na Ŵamitundu? Wonani ivyo vikachitika njara yikuru yati yawa cha mu 46 C.E. e Mu nyengo yakale, ŵanthu ŵakavu ndiwo ŵakasuzgikanga chomene na njara, chifukwa ŵakasungangako yayi ndalama zinyake nesi kuŵa na chakurya chakusazgikira. Pa nyengo ya njara iyi, Ŵakhristu Ŵachiyuda ŵanandi awo ŵakakhalanga mu Yudeya, ŵakaŵa ŵakavu, ndipo ŵakakhumbikwiranga vyakurya. Ŵakhristu ŵa ku Antiyoke, Ŵayuda na Ŵamitundu wuwo, ŵati ŵamanya za suzgo ili, “wakadumura kuti watumizge wovwiri” ku ŵabali awo ŵakakhalanga mu Yudeya. (Mil. 11:29) Apa ŵakalongora nadi kuti ŵakatemwanga ŵabali ŵawo.
23 Ndimo viliri pakati pa ŵanthu ŵa Chiuta mazuŵa ghano. Para tamanya kuti ŵabali ŵithu, mu charu chinyake panji mu chigaŵa chithu, ŵakusuzgika, tikusanga nthowa zakuŵawovwilira. Mwaluŵiro Makomiti gha Munthavi ghakunozga vyakuti paŵe Makomiti Ghakovwira Para Kwachitika Soka la chilengiwa kuti ghawovwire ŵabali ŵithu awo ŵakhwaskika na masoka ghachilengiwa, nga mphepo, vindindindi, na kututuka kwa maji. Vyose ivi vikulongora kuti tikutemwa nadi ŵabali ŵithu.—Yoh. 13:34, 35; 1 Yoh. 3:17.
24. Kasi tingalongora wuli kuti tikumanya ng’anamuro la mboniwoni iyo Petrosi wakawona?
24 Pakuŵa Ŵakhristu ŵaunenesko, tikumanya ng’anamuro la mboniwoni iyo Petrosi wakawona apo wakaŵa pachanya pa nyumba mu Yopa. Tikusopa Chiuta uyo wakutemwera yayi. Khumbo lake ndakuti tichitire ukaboni mwakukwana vya Ufumu wake, ipo tikwenera kupharazgira ŵanthu kwambura kulaŵiska fuko, mtundu, panji mawonekero ghawo. Ntheura tiyeni tiŵikepo mtima kupeleka mwaŵi ku wose awo ŵangapulika, kuti ŵachitepo kanthu pa makani ghawemi.—Rom. 10:11-13.
Para ŵabali ŵithu ŵakumana na suzgo, tikusanga nthowa zakuti tiŵawovwilire
a Ŵayuda ŵanyake ŵakatinkhanga ŵanthu awo ŵakanyukanga vikumba chifukwa chakuti ŵakakoranga vikumba ndiposo nyama zakufwa na vinthu vinyake vyaunyankhasi ivyo ŵakachitiranga ntchito iyi. Ŵayuda ŵakawonanga ŵanthu ŵakunyuka vikumba aŵa kuti mbambura kwenelera kunjira mu tempile, ndipo malo ghawo gha bizinesi ghakeneranga kuŵa pa mtunda wa mamita 22, kufuma mu tawuni. Ichi chingaŵa kuti ntchimoza mwa vifukwa ivyo nyumba ya Simoni yikaŵira “mumphepete mwa nyanja.”—Mil. 10:6.
b Wonani bokosi lakuti “ Koroneliyo na Ŵasilikari ŵa Ŵaroma.”
c Nkhani ya mutu wakuti “Ulongozgi Wakugomezgeka Pakulera Ŵana,” yikaŵa mu Gongwe la Mulinda la Novembala 1, 2006, peji 4 m’paka 7.
d Wonani bokosi lakuti “ Antiyoke wa ku Siriya.”
e Muyuda wakulemba mdauko zina lake Josephus wakayowoya kuti “njara yikuru” iyi yikachitika mu nyengo ya Themba Kilaudiyo (41-54 C.E.).
