MUTU 16
“Mwambukire mu Makedoniya”
Munthu wakusanga vitumbiko para wazomera mulimo kweniso para wakuzizipizga nthambuzgo mwachimwemwe
Nkhani iyi yili pa Milimo 16:6-40
1-3. (a) Kasi Paulosi na gulu lake ŵakalongozgeka wuli na mzimu utuŵa? (b) Kasi tiwonenge vichi mu nkhani iyi?
GULU linyake la ŵanakazi likafuma mu msumba wa Filipi ku Makedoniya. Nyengo yichoko waka, gulu ili likafika pa mlonga uchoko wa Gangites. Nga nkhaluso kawo, ŵakakhala pasi mumphepete mwa mlonga uwu kuti ŵalombe kwa Chiuta wa Israyeli. Yehova wakaŵawonanga.—2 Mid. 16:9; Sal. 65:2.
2 Pa nyengo yeneyiyi, ŵanalume ŵanyake ŵakafumanga mu msumba wa Lisitira kumwera kwa Galatiya, mtunda wakujumpha makilomita 800 kumafumiro gha dazi kwa Filipi. Mazuŵa ghati ghajumphapo, ŵanalume aŵa ŵakafika pa msewu ukuru wa Ŵaroma wakulongozgera kumanjiliro gha dazi ku chigaŵa icho chikaŵa na ŵanthu ŵanandi chomene cha Asiya. Ŵanalume aŵa, Paulosi, Sila, na Timote, ŵakaŵa ŵakunweka kukhira na nthowa iyi kuti ŵakafike ku Efeso na misumba yinyake, uko ŵanthu ŵanandi chomene ŵakakhumbanga kupulika vya Khristu. Kweni pambere ŵandalutilire, mzimu utuŵa ukaŵakanizga nangauli Baibolo likuzunurapo yayi umo ukaŵakanizgira. Ŵakakanizgika kupharazga mu Asiya. Chifukwa wuli? Kwizira mu mzimu wa Chiuta, Yesu wakakhumbanga kulongozga Paulosi na gulu lake kuti ŵajumphe Asia Minor, ŵambuke Nyanja ya Aegean, m’paka ŵakafike mumphepete mwa mlonga uchoko wura wa Gangites.
3 Pali vinthu vinandi ivyo tikusambirako umo Yesu wakalongozgera Paulosi na ŵanyake pa ulendo uwu wa ku Makedoniya. Tiyeni tiwone ivyo vikachitikira Paulosi pa ulendo wake wachiŵiri wa umishonale uwu, uwo ukamba cha mu 49 C.E.
“Chiuta Watichema” (Milimo 16:6-15)
4, 5. (a) Kasi ntchivichi chikachitika apo Paulosi na gulu lake ŵakaŵa pafupi kufika ku Bitiniya? (b) Kasi ŵasambiri ŵakachita vichi, ndipo chikachitika ntchivichi?
4 Paulosi na ŵanyake ŵakati ŵakanizgika kupharazga mu Asiya, ŵakaluta kumpoto, kuti ŵakapharazge mu misumba ya Bitiniya. Kuti ŵakafike ku malo agha, ŵakwenera kuti ŵakenda mazuŵa ghanandi mu tunthowa twamuswaswayira kujumpha mu vigaŵa vya Firigiya na Galatiya umo ŵanthu ŵakaŵa patalipatali. Ndipouli, apo ŵakaŵa pafupi kufika ku Bitiniya, Yesu wakaŵajandizgaso na mzimu utuŵa. (Mil. 16:6, 7) Apa mahara ghakwenera kuti ghakaŵamalira ŵanalume aŵa. Ŵakavimanyanga ivyo ŵangapharazga na umo ŵangapharazgira, kweni ŵakamanyanga yayi uko ŵangakapharazga. Panji tiyowoye kuti, ŵakakhung’uska pa mulyango wakulongozgera ku Asiya, kweni palije icho chikachitika. Ŵakakhung’uskaso pa mulyango wakulongozgera ku Bitiniya, palijeso icho chikachita. Paulosi wakaŵikapo mtima kulutilira kukhung’uska kuti m’paka wasange mulyango uwo ungajulika. Kufuma apo, ŵanalume aŵa ŵakachita chinthu icho chingawoneka nga ntchambura mahara. Ŵanthu aŵa ŵakalazga kumanjiliro gha dazi na kwenda makilomita 550; ŵakajumpha misumba yinandi m’paka ŵakafika ku Trowa, iyo yikaŵa nthowa yiwemi yakunjilira mu Makedoniya. (Mil. 16:8) Kura, Paulosi wakakhung’uska pa mulyango kachitatu, ndipo ukaŵajulikira.
5 Luka uyo wakalemba buku la Makani Ghawemi, wakamba kulongozgana na ŵina Paulosi pa Trowa. Ndipo wakutiphalira ivyo vikachitika, wakuti: “Nausiku Paulosi wakawona mboniwoni. Munthu munyake wa ku Makedoniya wakimilira ndipo wakamuŵeyeleranga, kuti: ‘Mwambukire mu Makedoniya ndipo mutovwire.’ Paulosi wakati wawona mboniwoni iyi, tikanozgeka kuluta mu Makedoniya, tikamanya kuti Chiuta watichema kuti tikaŵapharazgire makani ghawemi.” a (Mil. 16:9, 10) Sono Paulosi wakamanya uko ŵangakapharazga. Paulosi wakwenera kuti wakakondwa chomene chifukwa chakuti wakawelera pa nthowa yayi. Nyengo yeneyiyo, ŵanalume ŵanayi aŵa ŵakakwera ngalaŵa kwambukira ku Makedoniya.
“Ntheura tikakwera ngalaŵa kufuma ku Trowa.”—Milimo 16:11
6, 7. (a) Kasi tikusambirapo vichi pa ivyo vikachitika pa ulendo wa Paulosi? (b) Kasi tingaŵa na chigomezgo wuli para tikuwona ivyo vikachitikira Paulosi?
6 Kasi tikusambirachi pa nkhani iyi? Wonani kuti mzimu wa Chiuta ukanjilirapo Paulosi wati wanyamuka kuya ku Asiya. Kweniso Yesu wakanjilirapo Paulosi wati wafika pafupi na Bitiniya. Ndipo paumaliro, Paulosi wati wafika ku Trowa, Yesu wakamulongozgera ku Makedoniya. Pakuti Yesu ni Mutu wa mpingo, ndimo wangachitiraso na ise mazuŵa ghano. (Kol. 1:18) Mwachiyelezgero, panyake tikamba nikale kughanaghana vya kuchita upayiniya panji kukateŵetera uko ŵapharazgi ŵa Ufumu mbachoko. Kweni Yesu wangatilongozga na mzimu wa Chiuta para tamba kuchitapo kanthu. Chifukwa wuli? Wonani chiyelezgero ichi: Uyo wakwendeska galimoto wangakoneska kuti yilute kumazere panji kumalyero pekha usange yikwenda. Mwakuyana waka, Yesu nayo wangatilongozga kuti tisazgireko uteŵeti withu pekha usange tikwenda, panji kuchitapo kanthu kuti tifiske chilato chithu.
7 Kweni wuli usange tayezgayezga, ndipo chilato chithu chindafiskike pa nyengo iyo takhumbanga? Kasi tilekenge, na kughanaghana kuti mzimu wa Chiuta ukutilongozga yayi? Yayi. Kumbukani kuti ndivyo vikachitikira Paulosi. Kweni wakalutilira kupenja m’paka wakasanga mulyango uwo ukajulika. Ntheura usange tikulimbikira kuti tisange “mulyango ukuru wakulongozgera ku mulimo,” nase titumbikikenge.—1 Kor. 16:9.
8. (a) Longosorani umo msumba wa Filipi ukaŵira. (b) Ntchinthu wuli chakukondweska icho chikachitika Paulosi wati wapharazga ku “malo ghakusoperako”?
8 Ŵati ŵafika mu chigaŵa cha Makedoniya, Paulosi na ŵanyake ŵakaluta ku Filipi, msumba uwo ŵanthu ŵake ŵakanothanga pakuŵa Ŵaroma. Ŵasilikari ŵakupumura pa ntchito ŵa Ŵaroma awo ŵakakhalanga ku malo agha, ŵakawonanga chigaŵa cha Filipi nga ni Italiya muchoko, panji Romu muchoko wakuzengeka mu Makedoniya. Ŵamishonale aŵa ŵakasanga malo kuwaro kwa chipata cha msumba, mumphepete mwa mlonga uchoko, uko ŵakaghanaghananga kuti kukaŵa “malo ghakusoperako.” b Pa zuŵa la Sabata, ŵakakhilira ku malo agha ndipo ŵakasanga ŵanakazi ŵanandi ŵawungana kwenekura kuti ŵasope Chiuta. Ŵasambiri aŵa ŵakakhala pasi na kuyowoya nawo ŵanakazi aŵa. Mwanakazi munyake zina lake Lidiya “wakapulikizganga, ndipo Yehova wakajura mtima wake.” Ivyo Lidiya wakasambira ku ŵamishonale, vikamufika chomene pa mtima ndipo iyo pamoza na ŵamunyumba yake ŵakabatizika. Kufuma apo, wakapempha Paulosi na ŵanyake kuti ŵalute na kukhala mu nyumba yake. c—Mil. 16:13-15.
9. Kasi ŵanthu ŵanandi mazuŵa ghano ŵakuyezga wuli Paulosi, ndipo ni vitumbiko wuli ivyo ŵasanga?
9 Ghanaghanirani chimwemwe icho chikaŵapo Lidiya wati wabatizika. Paulosi wakwenera kuti wakakondwa chomene chifukwa chakuti wakazomera ntchemo yakuti “mwambukire mu Makedoniya” ndiposo kuti Yehova wakawona kuti ntchakwenelera kuzgora malurombo gha ŵanakazi ŵakopa Chiuta aŵa kwizira mwa iyo na ŵanyake awo wakaŵa nawo. Mazuŵa ghano, ŵabali na ŵadumbu ŵanandi chomene, ŵawukirano na ŵachekuru, ŵakutora na ŵambura kutora, nawo ŵakusamira ku malo uko ŵapharazgi ŵa Ufumu mbachoko. Mbunenesko kuti ŵakukumana na masuzgo, kweni ivi nkhanthu yayi para tingayaniska na chimwemwe icho ŵakuŵa nacho para ŵasanga ŵanthu ŵa nga ni Lidiya awo ŵakuzomera unenesko wa mu Baibolo. Kasi mungasintha vinthu vinyake kuti “mwambukire” ku chigaŵa icho ŵapharazgi mbachoko? Vitumbiko vikumulindilirani. Mwachiyelezgero, pulikani ivyo wakayowoya Aaron, mubali wa vyaka vya m’ma 20, uyo wakasamira ku charu cha ku Central America. Ivyo wakayowoya vikukolerana na ivyo ŵanandi ŵakuyowoya, wakati: “Kuteŵetera ku charu chinyake, kwanovwira chomene kuti nikure mwauzimu kweniso kuti niŵe paubwezi wakukhora na Yehova. Nakuti upharazgi ukwenda makora chomene. Nkhuchitiska masambiro gha Baibolo ghakukwana 8.”
Kasi ‘tingambukira wuli mu Makedoniya’ mazuŵa ghano?
“Mzinda Ukaŵawukira” (Milimo 16:16-24)
10. Kasi chiŵanda chikanjilirapo wuli kuti chitimbanizge mulimo wa Paulosi na ŵanyake?
10 Satana wakwenera kuti wakakwiya chomene kuwona kuti makani ghawemi ghakajintha misisi mu chigaŵa icho iyo na viŵanda vyake ŵakathaza. Lekani ntchakuzizika yayi kuti chiŵanda chikanjilirapo kuti chitimbanizge mulimo wa Paulosi na ŵanyake. Nyengo zose apo ŵakalutanga ku malo ghakulomberako, muteŵeti msungwana uyo wakaŵa na chiŵanda, ndiposo uyo wakasangiranga ndalama mabwana ghake chifukwa cha kuloska, wakalondezganga Paulosi na ŵanyake, na kuchemerezga kuti: “Ŵanthu aŵa mbazga ŵa Chiuta Wapachanya Nkhanira, ndipo ŵakumupharazgirani nthowa ya chiponosko.” Chiŵanda chikwenera kuti chikapangiska msungwana yura kuchemerezga mazgu agha mwakuti viŵe nga ni para ivyo iyo wakachimanga na ivyo Paulosi wakasambizganga vikafumanga ku malo ghamoza. Ichi mphanyi chikaŵa chakusuzga kuti ŵanthu ŵaŵamanye makora awo mbalondezgi ŵanadi ŵa Khristu. Kweni Paulosi wakachifumiska chiŵanda chira, ndipo msungwana wakalekera papo ivyo wakachitanga.—Mil. 16:16-18.
11. Kasi ntchivichi chikachitikira Paulosi na Sila chiŵanda chati chafumamo mwa msungwana?
11 Ŵenecho ŵa msungwana yura ŵati ŵawona kuti nthowa yakusangira ndalama yamara, ŵakakwiya chomene. Ŵakaguguzira Paulosi na Sila ku msika, uko ŵalara ŵa boma, awo ŵakimiranga Romu ŵakeluzgiranga milandu. Ŵenecho ŵa msungwana uyu ŵakakhumbanga kuti ŵeruzgi ŵatemwere iwo, pakuyowoya kuti: ‘Ŵayuda aŵa ŵakutimbanizga ŵanthu mwa kusambizga maluso agho ise Ŵaroma tingaghapokelera yayi.’ Mazgu ghawo ghakasokora tunthu. “Mzinda [mu msika] ukaŵawukira [Paulosi na Sila],” ndipo ŵalara ŵa boma ŵakadumura “kuti ŵaŵatimbe na zindodo.” Kufuma apo, Paulosi na Sila ŵakaluta nawo ku jele. Mulinda wa jele wakaponya ŵanalume ŵakupwetekeka aŵa mu gadi lamukati ndipo wakaŵika malundi ghawo mu magwedi. (Mil. 16:19-24) Mulinda wa jele wati wajarako ku mulyango, mukaŵa chisi chikuru mu chipinda chira mwakuti Paulosi na Sila ŵakwenera kuti ŵakawonananga yayi. Ndipouli, Yehova wakawonanga.—Sal. 139:12.
12. (a) Kasi ŵasambiri ŵa Khristu ŵakayiwonanga wuli nthambuzgo, ndipo chifukwa wuli? (b) Kasi ni nthambuzgo wuli izo Satana na ŵanthu ŵake ŵachali kugwiliskira ntchito?
12 Vyaka vyakumasinda, Yesu wakaphalira ŵalondezgi ŵake kuti: “Ŵatambuzgenge na imwe wuwo.” (Yoh. 15:20) Ntheura apo Paulosi na ŵanyake ŵakambukiranga mu Makedoniya, ŵakaŵa ŵakunozgeka kususkika. Nthambuzgo yikati yawuka, ŵakamanya kuti Yehova wandaŵataye, kweni chikaŵa chilongolero chakuti Satana ni mukali chomene. Mazuŵa ghano, ŵanthu ŵa Satana ŵachali kulondezga nthowa izo zikagwira ntchito mu Filipi. Ŵakususka ŵakutiyowoyera mautesi ku sukulu na ku ntchito, ntheura ŵanthu ŵakutiwukira. Mu vyaru vinyake, ŵavisopa ŵakutitolera ku khoti, na kuyowoya kuti: ‘Ŵakaboni aŵa ŵakutimbanizga ŵanthu mwa kusambizga maluso agho ise “taŵamatchalitchi” tingaghapokelera chara.’ Mu vyaru vinyake, Ŵakhristu ŵanyithu ŵakutimbika na kujalirika mu jele. Ndipouli, Yehova wakuwona.—1 Pet. 3:12.
“Ŵakabatizika Mwaluŵiro” (Milimo 16:25-34)
13. Chifukwa wuli mulinda wa jele wakafumba kuti: “Kasi nichitechi kuti niponoskeke?”
13 Paulosi na Sila ŵakwenera kuti ŵakakhumbikwiranga nyengo kuti ŵapumulepo. Ndipouli, usiku pakati vyakuŵinya vikwenera kuti vikazikako ndipo “ŵakalombanga na kwimba sumu kulumba Chiuta.” Mwamabuchi, chindindindi chikasunkhunya jele. Mulinda wa jele wakawuka na kuwona kuti vijaro vikaŵa vyakujulika, ndipo wakaghanaghananga kuti ŵakayidi ŵachimbira. Wakamanya kuti walangikenge chifukwa chakuti ŵakayidi ŵachimbira, ntheura “wakasolora lupanga lwake ndipo wakaŵa pafupi kujikoma.” Kweni Paulosi wakachemerezga kuti: “Kujipweteka yayi, chifukwa tose tili mwenemuno!” Mulinda wa jele wakafumba kuti: “Ŵadada, kasi nichitechi kuti niponoskeke?” Paulosi na Sila ŵakaŵa ŵakuti ŵangamuponoska yayi, kweni Yesu pera. Ntheura ŵakazgora kuti: “Gomezga Fumu Yesu ndipo uponoskekenge.”—Mil. 16:25-31.
14. (a) Kasi Paulosi na Sila ŵakamovwira wuli mulinda wa jele? (b) Kasi Paulosi na Sila ŵakatumbikika wuli chifukwa cha kuzizipizga nthambuzgo mwachimwemwe?
14 Kasi fumbo la mulinda wa jele likaŵa lakufumira pasi pa mtima? Paulosi wakakayika yayi kuti munthu uyu wakakhumbanga nadi wovwiri. Mulinda wa jele wakaŵa Wamitundu, ndipo wakaghamanyanga yayi Malemba. Pambere wandazgoke Mkhristu wakeneranga kusambira na kuzomera unenesko wa mu Malemba. Ntheura Paulosi na Sila ŵakayowoya “mazgu gha Yehova kwa iyo.” Apo ŵanalume aŵa ŵakatangwanika na kulongosora Malemba, panyake ŵakaluwako vyakuŵinya ivyo ŵakaŵa navyo. Kweni mulinda wa jele wakawona vikomokomo pa misana yawo, ndipo wakasuka vilonda vyawo. Kufuma apo, iyo na ŵamunyumba yake “ŵakabatizika mwaluŵiro.” Paulosi na Sila ŵakatumbikika chomene chifukwa cha kuzizipizga nthambuzgo mwachimwemwe.—Mil. 16:32-34.
15. (a) Kasi Ŵakaboni ŵanandi mazuŵa ghano ŵalondezga wuli ivyo Paulosi na Sila ŵakachita? (b) Chifukwa wuli tikwenera kulutilira kuwelerako ku wose mu chigaŵa chithu?
15 Nga ni Paulosi na Sila, Ŵakaboni ŵanandi mazuŵa ghano ŵapharazga makani ghawemi uku ŵali mu jele chifukwa cha chipulikano chawo, ndipo ŵawovwira ŵanthu ŵanandi. Mwachiyelezgero, mu charu chinyake icho mulimo withu ukakanizgika, pa Ŵakaboni 100 ŵaliwose, 40 ŵakasambilira mu jele unenesko wakukhwaskana na Yehova. (Yes. 54:17) Kweniso wonani kuti mulinda wa jele wakapempha wovwiri chindindindi chikati chachitika. Mwakuyana waka, mazuŵa ghano ŵanthu ŵanyake awo ŵakakananga kupulikira uthenga wa Ufumu ŵangamba kupulikira para chinthu chinyake chamabuchi chaŵachitikira. Para tikuluta na kuwelerako ku awo ŵakukhala mu chigaŵa chithu, tikulongora kuti tili ŵakunozgeka kuŵawovwira apo ŵakhumbirenge wovwiri withu.
“Kasi Sono Ŵakutifumiska Mwachisisi?” (Milimo 16:35-40)
16. Kasi vinthu vikasintha wuli mulenji wakulondezgapo Paulosi na Sila ŵati ŵathyapulika?
16 Mulenji wakulondezgapo kufuma apo ŵakathyapulikira, ŵalara ŵa boma ŵakadumura kuti Paulosi na Sila ŵafwatulike. Kweni Paulosi wakati: “Ŵakatithyapura pamaso pa ŵanthu kwambura mulandu, ise tili Ŵaroma, ndipo ŵakatiponya mu jele. Kasi sono ŵakutifumiska mwachisisi? Tifumenge yayi. Ŵize ŵekha, ŵazakatifumiske.” Ŵati ŵamanya kuti ŵanalume ŵaŵiri aŵa ŵakaŵa Ŵaroma, ŵalara ŵa boma “ŵakawopa chomene,” pakuti ŵakaŵaswera wanangwa wawo. d Vinthu vikasintha. Ŵasambiri ŵakathyapulikira pakweru; sono ŵalara ŵa boma nawo ŵakenera kuphepiska pakweru. Ŵakaŵeyelera Paulosi na Sila kuti ŵafumemo mu Filipi. Ŵasambiri ŵaŵiri aŵa ŵakapulikira, kweni ŵakakhala dankha na kukhwimiska ŵasambiri ŵaphya awo ŵakaŵa ku malo agha. Paumaliro ŵakafumapo.
17. Kasi ŵasambiri ŵaphya ŵakasambira vichi ŵati ŵawona umo Paulosi na Sila ŵakazizipizgira?
17 Paulosi na Sila mphanyi ŵakathyapulika yayi viŵenge kuti pakwamba wanangwa wawo pakuŵa Ŵaroma ukachindikika. (Mil. 22:25, 26) Ndipouli, viŵenge nthena mphanyi ŵasambiri mu Filipi ŵakawona kuti ŵanalume aŵa ŵakabisamira ku wanangwa wawo wa Uroma kuti ŵagege kusuzgika chifukwa cha Khristu. Kasi ichi mphanyi chikaŵakhwaska wuli ŵasambiri awo ŵakaŵa Ŵaroma yayi? Dango likaŵa lakuti lingaŵavikilira yayi kuti ŵaleke kuthyapulika. Ntheura pakuzomerezga kulangika, Paulosi na Sila ŵakalongora ŵasambiri ŵaphya ŵara kuti ŵalondezgi ŵa Khristu ŵangazizipizga nthambuzgo. Kweniso pakupempha kuti wanangwa wawo uchindikike, Paulosi na Sila ŵakachichizga ŵalara ŵa boma ŵara kuti ŵazomere pa wumba kuti ŵachita vinthu kwambura kulondezga dango. Ichi chikwenera kuti chikawovwira kuti ŵaleke kusuzga Ŵakhristu ŵanyake ndiposo kuti Ŵakhristu ŵaŵe ŵakuvikilirika na dango usange vinthu vyanthena vyazakachitikaso munthazi.
18. (a) Kasi awo ŵakulongozga mu mpingo mazuŵa ghano ŵakumuyezga wuli Paulosi? (b) Kasi ‘tikuvikilira na kukhozgera wuli makani ghawemi mwakuyana na dango’ mazuŵa ghano?
18 Mazuŵa ghano napo, ŵalaŵiliri mu mpingo ŵakulongozga kwizira mu vyakuchita vyawo. Ŵaliska Ŵachikhristu ŵakuchita ivyo ŵakukhumba kuti Ŵakhristu ŵanyawo ŵachitenge. Ntheura, nga ni Paulosi, tikusanda mwakupwelelera nyengo iyo tingagwiliskira ntchito wanangwa withu kuti tivikilirike ndiposo nthowa iyo tingachitira nthena. Usange mphakukhumbikwa, tikutolera nkhani ku khoti la mu chigaŵa chithu, charu, nanga nkhu makhoti gha pa charu chose kuti tisange chivikiliro kuti tilutilire kusopa. Chilato chithu nkhusintha vinthu yayi, kweni kuvikilira “na kukhozgera makani ghawemi mwakuyana na dango,” nga umo Paulosi wakalembera ku mpingo wa ku Filipi pati pajumpha vyaka 10 kufuma apo wakajalilikira mu jele ku malo agha. (Fil. 1:7) Ndipouli, mulimose umo makhoti ghangadumulira milandu iyi, nga ni Paulosi na ŵanyake, taŵikapo mtima kulutilira ‘kupharazga makani ghawemi’ kulikose uko mzimu wa Chiuta ungatilongozgera.—Mil. 16:10.
a Wonani bokosi lakuti “ Luka, Uyo Wakalemba Buku la Milimo.”
b Panyake Ŵayuda ŵakakanizgika kuzenga sunagoge mu msumba wa Filipi chifukwa chakuti ndimo ŵasilikari ŵakupumura pa ntchito ŵa Ŵaroma ŵakakhazikika. Kweniso panji mu msumba uwu Ŵayuda ŵanalume ŵakafikanga yayi pa 10, icho chikaŵa chiŵelengero chakukhumbikwa kuti sunagoge lizengeke.
c Wonani bokosi lakuti “ Lidiya, Uyo Wakaguliskanga Salu Zichesamu.”
d Dango la Ŵaroma likatenge munthu uyo ni Muroma wakwenera kweruzgika mwakwenelera nyengo zose, ndipo wakeneranga chara kulangikira pa wumba pambere wandasangike na mulandu.
