MUTU 17
“Wakadumbirana Nawo Kufuma mu Malemba”
Icho chingatovwira kuti tiŵafikenge pa mtima ŵanthu awo tikuŵasambizga, kweniso ivyo tingasambirako ku ŵanthu ŵa ku Bereya
Nkhani iyi yili pa Milimo 17:1-15
1, 2. Kasi mbanjani awo ŵakafuma ku Filipi kuya ku Tesalonika, ndipo ŵakwenera kuti ŵakaghanaghaniranga vichi?
MSEWU uwemi wakulimika na nkhwantha za mu Romu, ukajumphanga mu mapiri. Nyengo zinyake mu msewu uwu mukaŵanga vyongo vya mbunda, matayara gha magaleta, kweniso vyongo vya ŵanthu ŵanandi awo ŵakendangamo, nga ŵasilikari, ŵamalonda, na ŵa vyakuŵajaŵaja. Ŵanalume ŵatatu, Paulosi, Sila, na Timote, ŵakendanga mu msewu uwu kufuma ku Filipi kuya ku Tesalonika, mtunda wa makilomita ghakujumpha 130. Ulendo uwu ukaŵa upusu yayi, chomenechomene kwa Paulosi na Sila. Ŵakaŵa ŵachali na vilonda ivyo ŵakafuma navyo ku Filipi, uko ŵakaŵatimba na zindodo.—Mil. 16:22, 23.
2 Kasi ŵanthu aŵa ŵakazizipizga wuli ulendo utali chomene uwu? Kudumbiskana kukawovwira kuti ŵazizipizge. Ŵakaŵa kuti ŵachali kukumbuka nkhani yakukondweska yakukhwaskana na mulinda wa jele wa ku Filipi, uyo pamoza na mbumba yake wakapulikana. Chifukwa chakuti ŵanthu aŵa ŵakang’anamuka, vikawovwira chomene kuti ŵamishonale aŵa ŵaŵikepo mtima na kulutizga kupharazga mazgu gha Chiuta. Ndipouli, apo ŵakasendeleranga ku msumba wa Tesalonika, ŵakwenera kuti ŵakaghanaghaniranga umo Ŵayuda mu msumba uwu ŵachitirenge nawo. Kasi ŵaŵawukirenge, na kuŵatimba, nga umo vikaŵira mu Filipi?
3. Kasi chikanga icho Paulosi wakalongora pakupharazga chingatovwira wuli mazuŵa ghano?
3 Pamanyuma, Paulosi wakalongosora umo ŵakajipulikiranga pa nyengo iyi mu kalata iyo wakalembera Ŵakhristu ku Tesalonika. Iyo wakalemba kuti: “Tikasuzgika pakwamba, ndipo ŵakati ŵatichitira msinjiro ku Filipi, nga umo mukumanyira, tikachita chikanga mwa Chiuta withu kumuphalirani makani ghawemi gha Chiuta nangauli pakaŵa masuzgo ghanandi.” (1 Tes. 2:2) Ntheura Paulosi wakulongora kuti wakachitanga wofi pakunjira mu msumba wa Tesalonika, chomenechomene para waghanaghanira ivyo vikachitika mu Filipi. Kasi imwe mukuwona kuti vikaŵa vyakupulikikwa kuti Paulosi wachite nthena? Kasi nyengo zinyake namwe mukuchita kulimbalimba pakupharazga makani ghawemi? Paulosi wakagomezganga Yehova kuti wamukhozgenge na kumupa chikanga. Namwe mungakwaniska kuchita nthana para mungasambirako kwa Paulosi pa nkhani iyi.—1 Kor. 4:16.
“Wakadumbirana Nawo Kufuma mu Malemba” (Milimo 17:1-3)
4. Kasi ntchivichi chikulongora kuti Paulosi wakakhalamo masabata ghatatu pera yayi mu Tesalonika?
4 Nkhani iyi yikutiphalira kuti apo Paulosi wakaŵa mu Tesalonika, wakapharazga mu sunagoge kwa mazuŵa ghatatu ndipo wakapharazganga pa Sabata. Kasi ichi chikung’anamura kuti mu msumba uwu wakakhalamo masabata ghatatu pera? Yayi. Tikumanya yayi utali wa nyengo iyo Paulosi wakakhala pambere wandalute ku sunagoge. Kweniso makalata gha Paulosi ghakulongora kuti apo iyo na ŵanyake ŵakaŵa mu Tesalonika, ŵakagwiranga ntchito kuti ŵajiwovwire. (1 Tes. 2:9; 2 Tes. 3:7, 8) Nakuti apo Paulosi wakaŵa mu msumba uwu, ŵabali ŵa ku Filipi ŵakamutumira wovwiri kaŵiri kose. (Fil. 4:16) Ntheura mu Tesalonika wakwenera kuti wakakhalamo nyengo yitaliko, masabata ghatatu pera yayi.
5. Kasi Paulosi wakachita wuli kuti waŵafike pa mtima ŵanthu?
5 Wati waŵa na chikanga, Paulosi wakayowoya ku awo ŵakawungana mu sunagoge. Mwakuyana na kaluso kake, “wakadumbirana nawo kufuma mu Malemba. Wakalongosora na kukhozgera na malemba kuti chikaŵa chakwenelera kuti Khristu wasuzgike na kuwuka ku ŵakufwa. Wakayowoya kuti: ‘Yesu uyo nkhumupharazgirani ndiyo ni Khristu.’” (Mil. 17:2, 3) Wonani kuti Paulosi wakakhumbanga yayi kuŵakwiyiska awo wakayowoyanga nawo, kweni wakayowoya mwakudumbiskana nawo. Wakamanyanga kuti awo ŵakizanga ku sunagoge ŵakaghamanyanga Malemba ndipo ŵakaghachindikanga. Kweni kuti waka ŵakaghapulikiskanga yayi. Ntheura Paulosi wakadumbirana nawo, kulongosora, na kupeleka ukaboni wa mu Malemba wakuti Yesu wa ku Nazarete wakaŵa Mesiya wakulayizgika, panji kuti Khristu.
6. Kasi Yesu wakadumbirana nawo wuli ŵasambiri kufuma mu Malemba, ndipo ntchivichi icho chikachitika?
6 Paulosi wakayezganga Yesu pakusambizga, uyo visambizgo vyake vikafumanga mu Malemba. Mwachiyelezgero, apo wakachitanga uteŵeti wake, Yesu wakaphalira ŵalondezgi ŵake kuti Malemba ghakuti Mwana wa munthu wakwenera kusuzgika, kufwa, na kuwuka ku ŵakufwa. (Mat. 16:21) Wati wawuskika, Yesu wakawonekera ku ŵasambiri ŵake. Nadi, uwu ukaŵa ukaboni wakuti ivyo wakayowoya vikaŵa vyaunenesko. Ndipouli, Yesu wakaŵachitira vinandi. Pa ivyo wakayowoya ku ŵasambiri ŵanyake, tikuŵazga kuti: “Wakaŵalongosolera vinthu vyakukhwaskana na iyo ivyo vili mu Malemba, kwambira na ivyo wakalemba Mozesi kweniso Ntchimi zose.” Kasi chikachitika ntchivichi? Ŵasambiri aŵa ŵakati: “Asi mitima yithu yaphyanga apo wayowoyanga nase mu nthowa, apo watilongosoleranga makora Malemba?”—Luka 24:13, 27, 32.
7. Chifukwa wuli ntchakuzirwa kuti ivyo tikusambizga ŵanthu vifumenge mu Malemba?
7 Uthenga uwo uli mu Mazgu gha Chiuta uli na nkhongono chomene. (Heb. 4:12) Ntheura, ivyo Ŵakhristu ŵaunenesko ŵakusambizga vikufuma mu Mazgu gha Chiuta, nga umo wakachitira Yesu, Paulosi, na ŵapositole ŵanyake. Nase tikudumbirana na ŵanthu, kulongosora ng’anamuro la Malemba, kweniso kupeleka ukaboni wa ivyo tikusambizga ndipo tikujura Baibolo kuti tilongore awo tikuŵapharazgira ivyo likuyowoya. Nakuti uthenga uwo tikupharazga ngwithu yayi. Chifukwa chakuti kanandi tikujura Baibolo, tikovwira ŵanthu kumanya kuti ivyo tikupharazga ni maghanoghano ghithu yayi, kweni ni visambizgo vya Chiuta. Kweniso tikwenera kukumbuka kuti uthenga uwo tikupharazga ukujintha pa Mazgu gha Chiuta, agho ngakugomezgeka fikepo. Kasi fundo iyi yikumukwezgani nkhongono yayi kuti namwe mupharazgenge mwachikanga nga ni Paulosi?
“Ŵanyake . . . Ŵakagomezga” (Milimo 17:4-9)
8-10. (a) Kasi ŵanthu ŵa mu Tesalonika ŵakachita wuli na makani ghawemi? (b) Chifukwa wuli Ŵayuda ŵanyake ŵakachita sanji na Paulosi? (c) Kasi Ŵayuda ŵakususka ŵakachita vichi?
8 Paulosi wakawona kale kuti ivyo Yesu wakayowoya vikaŵa vyaunenesko. Yesu wakayowoya kuti: “Muzga ni mukuru chara kuluska fumu yake. Usange ŵakanitambuzga ine, ŵatambuzgenge na imwe wuwo. Usange ŵasungilira mazgu ghane, ŵasungilirengeso mazgu ghinu.” (Yoh. 15:20) Mu Tesalonika, Paulosi wakasangana nadi na ŵanthu ŵa mtundu uwu, ŵanyake ŵakategherezganga, apo ŵanyake ŵakakhumbanga yayi kutegherezga. Pakuyowoya za awo ŵakapulikira, Luka wakalemba kuti: “Ŵanyake ŵa iwo [Ŵayuda] ŵakagomezga [ŵakazgoka Ŵakhristu] ndipo ŵakendezgananga na Paulosi na Sila. Wumba ukuru wa Ŵagiriki awo ŵakasopanga Chiuta na ŵanakazi ŵanandi ŵakuzirwa, nawo ŵakagomezga.” (Mil. 17:4) Nadi, ŵasambiri ŵaphya aŵa ŵakwenera kuti ŵakakondwa chifukwa chakuti ŵakawovwirika kupulikiska Malemba.
9 Nangauli ŵanthu ŵanyake ŵakakondwa na mazgu gha Paulosi, kweni ŵanyake ŵakamumemenera mino. Ŵayuda ŵanyake mu Tesalonika ŵakachita sanji na Paulosi chifukwa chakuti wakaguza “wumba ukuru wa Ŵagiriki.” Pakukhumba kuguzira ŵanyake ku Chiyuda, Ŵayuda aŵa ŵakasambizga Ŵagiriki Malemba Ghachihebere ndipo ŵakawonanga kuti Ŵagiriki aŵa mbawo. Kweni mwamabuchi vikawoneka nga kuti Paulosi wakwiba Ŵagiriki aŵa, nakuti wakuchitira ivi pa sunagoge. Ŵayuda ŵakakwiya chomene.
“Ŵakakhumbanga kukora Paulosi na Sila na kwiza nawo ku wumba.”—Milimo 17:5
10 Luka wakutiphalira ivyo vikachitika paumaliro, wakuti: “Ŵayuda ŵakachita sanji. Ŵakatora ŵanthu ŵanyake ŵaheni ŵakuyingayinga waka mu msika na kupanga kagulu ndipo ŵakawuska chivulupi mu msumba. Ŵakaswa nyumba ya Yasoni ndipo ŵakakhumbanga kukora Paulosi na Sila na kwiza nawo ku wumba. Ŵakati ŵatondeka kuŵasanga, ŵakaguguzira Yasoni na ŵabali ŵanyake ku ŵeruzgi ŵa msumba, ŵakachemerezga kuti: ‘Ŵanthu awo ŵakutimbanizga charu ŵaliso kuno. Ndipo Yasoni waŵapokelera nga mbalendo ŵake. Ŵanthu wose aŵa ŵakususkana na malango gha Kesare, ŵakuti kuli themba linyake, Yesu.’” (Mil. 17:5-7) Kasi ivyo kagulu aka kakachita vikakhwaska wuli Paulosi na ŵanyake awo wakendanga nawo?
11. Kasi ni milandu wuli iyo Ŵayuda ŵakapusikira Paulosi na ŵapharazgi ŵanyake, ndipo ni dango wuli ilo ŵakususka aŵa ŵakwenera kuti ŵakaghanaghaniranga? (Wonani mazgu ghamusi.)
11 Ŵanthu ŵakuchita vinthu viheni chomene para ŵapanga kagulu ka ŵanthu ŵakusuzga. Ŵakuchita vinthu nga ni mlonga uwo wafuluka, ŵakukoleka yayi. Ŵayuda aŵa ŵakatuma kagulu aka kuti kamalane na Paulosi na Sila. Kufuma apo, Ŵayuda ŵati ŵawuska “chivulupi” mu msumba, ŵakayezga kukhorweska ŵeruzgi kuti milandu ya Paulosi na Sila yikaŵa yikuru chomene. Mulandu wakwamba ukaŵa wakuti Paulosi na ŵapharazgi ŵanyake ŵa Ufumu ‘ŵakatimbanizga charu,’ nangauli Paulosi na ŵanyake ndiwo yayi ŵakawuska chivulupi mu Tesalonika. Mulandu wachiŵiri ndiwo ukaŵa wakofya chomene. Ŵayuda ŵakatenge ŵamishonale aŵa ŵakupharazga Themba linyake, Yesu, ntheura ŵakususkana na malango gha themba la Romu. a
12. Kasi ntchivichi chikulongora kuti milandu iyo ŵakaŵapusikira Ŵakhristu mu Tesalonika mphanyi yikaŵakomeska?
12 Kumbukani kuti mulandu wanthena uwu ndiwo ŵalongozgi ŵa chisopa ŵakapusikira Yesu. Ŵakaphalira Pilato kuti: “Munthu uyu tamusanga kuti wakupatuska mtundu withu . . . ndipo wakuti iyo ni Khristu themba.” (Luka 23:2) Pilato wakagamura kuti Yesu wakomeke, panji chifukwa cha kopa kuti themba la Romu lingaghanaghana kuti iyo wakulekelera ŵanthu ŵakuwukira boma. Mwakuyana waka, milandu iyo ŵakapusikira Ŵakhristu mu Tesalonika, mphanyi yikaŵakomeska. Buku linyake likuti: “Ntchakusuzga kukana kuti ŵanthu aŵa ŵakaŵa pangozi, chifukwa ‘kanandi para munthu watundulika kuti wawukira Mathemba wakakomekanga.’” Kasi ivyo ŵakuwukira aŵa ŵakakhumbanga vikachitika?
13, 14. (a) Chifukwa wuli kagulu kakususka kakatondeka kuchita ivyo kakakhumbanga? (b) Kasi Paulosi wakalongora wuli kuti wakaŵa wakuchenjera nga ni Khristu, ndipo ise tingamuyezga wuli?
13 Kagulu aka kakatondeka kulekeska mulimo wa kupharazga mu Tesalonika. Chifukwa wuli? Chifukwa chimoza ntchakuti ŵakaŵakora yayi Paulosi na Sila. Kweniso, vikuwoneka kuti ŵawusi ŵa msumba ŵakakhorwa yayi na milandu iyo yikayowoyeka. Ŵati “ŵaŵalipiliska,” panji kupoka ndalama za belo, ŵakafwatura Yasoni na ŵabali ŵanyake awo ŵakatolekera panthazi pawo. (Mil. 17:8, 9) Paulosi wakalondezga ulongozgi wa Yesu wakuti “muŵe ŵakuchenjera nga ni njoka, kweni ŵakuzika nga ni nkhunda,” ndipo wakafumapo na kuluta kukapharazga kunyake. (Mat. 10:16) Ichi chikulongora kuti chikanga icho Paulosi wakaŵa nacho, chikaŵa chakuŵika umoyo pangozi yayi. Kasi Ŵakhristu mazuŵa ghano ŵangamuyezga wuli Paulosi pa nkhani iyi?
14 Mazuŵa ghano, kanandi ŵalongozgi ŵa matchalitchi ŵakuŵapangira tumagulu twakususka Ŵakaboni ŵa Yehova. Ŵakuteta mautesi ghakuti Ŵakaboni ŵa Yehova ŵakuwukira boma, kuti ŵamazaza ŵaŵawukire. Nga ni awo ŵakatambuzganga Ŵakhristu ŵakwambilira, awo ŵakutisuska mazuŵa ghano ŵakuchita nthena chifukwa cha sanji. Kweni Ŵakhristu ŵaunenesko ŵakujipelekera dala ku suzgo yayi. Usange ntchamachitiko, tikugega kulimbana na ŵanthu ŵakali kweniso ŵambura mahara aŵa, kweni tikukhumba kulutilira na mulimo withu mwamtende, panji tikuwelerakoso para ŵatuna.
“Ŵakaŵa na Maghanoghano Ghawemi” (Milimo 17:10-15)
15. Kasi ŵanthu ŵa ku Bereya ŵakachita wuli ŵati ŵapulika Makani Ghawemi?
15 Paulosi na Sila ŵakatumizgika ku Bereya, mtunda wa makilomita pafupifupi 65, kuti ŵaleke kupwetekeka. Ŵati ŵafika ku malo agha, Paulosi wakanjira mu sunagoge na kuyowoya ku awo ŵakawungana. Chikaŵa chakukondweska chomene kuti wakasanga ŵanthu ŵakutegherezga. Luka wakalemba kuti Ŵayuda ŵa ku “Bereya aŵa ŵakaŵa na maghanoghano ghawemi kuluska ŵa mu Tesalonika, pakuti ŵakapokera mazgu na kunweka kukuru, ŵakasandanga Malemba mwakupwelelera zuŵa lililose kuwona usange vinthu ivi ndimo vikaŵira.” (Mil. 17:10, 11) Kasi mazgu agha ghakulongora kuti ŵanthu ŵa mu Tesalonika awo ŵakazomera unenesko nawo ŵakaŵa ŵaheni? Yayi. Pamanyuma, Paulosi wakaŵalembera kuti: “Nase tikuwonga Chiuta kwambura kuleka, chifukwa apo mukapulika mazgu gha Chiuta kwa ise, mukaghazomera nga ni mazgu gha ŵanthu yayi, kweni nga umo ghaliri nadi mazgu gha Chiuta, agho ghakugwira ntchito mwa imwe ŵakugomezga.” (1 Tes. 2:13) Kweni ntchivichi chikawovwira Ŵayuda ŵa mu Bereya kuti ŵaŵe na maghanoghano ghawemi?
16. Chifukwa wuli ntchakwenelera kuyowoya kuti Ŵabereya ŵakaŵa na “maghanoghano ghawemi”?
16 Nangauli ivyo Ŵabereya ŵakapulikanga vikaŵa vyachilendo, iwo ŵakavikayikira yayi panji kuvisuska bweka kuko, kweniso ŵakagomezgeramo bweka yayi. Chakwamba, ŵakategherezga mwakupwelelera ivyo Paulosi wakayowoyanga. Kufuma apo, ŵakajura Malemba agho Paulosi wakaŵalongosolera, kuti ŵasimikizgire ivyo ŵakasambira. Kweniso ŵakasambiranga Mazgu gha Chiuta mwamwamphu, pa Sabata pera yayi, kweni zuŵa na zuŵa. Nakuti ŵakachitanga nthena na “kunweka kukuru,” kuyezgayezga kuwona ivyo Malemba ghakulongosora pa chisambizgo chiphya icho ŵakapulika. Kufuma apo, ŵakajiyuyura na kusintha, chifukwa “ŵanandi ŵa iwo ŵakagomezga.” (Mil. 17:12) Lekani ntchakuzizika yayi kuti Luka wakaŵalongosora kuti ŵakaŵa na “maghanoghano ghawemi.”
17. Chifukwa wuli ivyo Ŵabereya ŵakachita ni viwemi, ndipo tingachita wuli kuti tilutilire kuŵayezga nangauli tingaŵa kuti tikabatizika ni kale?
17 Ŵabereya aŵa ŵakamanya yayi kuti ivyo ŵakachita pakuzomera makani ghawemi visungikenge mu Mazgu gha Chiuta, ndipo ŵaŵenge chiyelezgero chiwemi chomene ku ŵanthu mazuŵa ghano. Ivyo ŵakachita ndivyo Paulosi wakagomezganga kuti ŵachitenge, kweniso ndivyo Yehova Chiuta wakakhumbanga kuti ŵachite. Ivi ndivyo nase tikuchiska ŵanthu kuti ŵachitenge, kuti ŵasandenge Baibolo mwakupwelelera mwakuti chipulikano chawo chijinthenge pa Mazgu gha Chiuta. Kweni kasi para tazgoka Ŵakhristu, mbwenu ntchakukhumbikwaso yayi kuŵa na maghanoghano ghawemi? Yayi, kweni pa nyengo iyi ndipo tikwenera kuŵa muchanya kusambira na kulondezga luŵiro ivyo Yehova wakutisambizga. Para tachita nthena, Yehova wakutiwumba na kutisambizga mwakuyana na khumbo lake. (Yes. 64:8) Ntheura tikuchita vyose ivyo tingafiska kuti tikondweskenge Adada ŵithu ŵakuchanya.
18, 19. (a) Chifukwa wuli Paulosi wakafumako ku Bereya, kweni kasi wakalongora wuli chitatata icho tikwenera kuyezga? (b) Kasi Paulosi wakalutaso kukapharazga kwa anjani, ndipo nkhu?
18 Paulosi wakakhalamo nyengo yitali yayi mu Bereya. Tikuŵazga kuti: “Ŵayuda ŵakufuma ku Tesalonika ŵakati ŵamanya kuti Paulosi wakupharazgaso mazgu gha Chiuta mu Bereya, ŵakiza kwenekura kuti ŵakhuŵilizge mizinda kuti yichite chivulupi. Mwaluŵiro ŵabali ŵakamutuma Paulosi ku nyanja. Kweni Sila na Timote ŵakakhalira kwenekura. Kweni awo ŵakamupelekezganga Paulosi ŵakafika nayo ku Ateni, ndipo ŵakawelera ŵakati ŵaphalirika kuti Sila na Timote ŵize kwa Paulosi mwaluŵiro.” (Mil. 17:13-15) Ŵalwani ŵa makani ghawemi aŵa ŵakaŵa na chikosa chiheni chomene. Ŵati ŵachimbizga Paulosi mu Tesalonika ŵakakhumba yayi kulekera papo, ŵakaluta ku Bereya kuti ŵakambiskeso vivulupi, kweni vikaŵatonda. Paulosi wakamanya kuti wakaŵa na chigaŵa chikuru chomene chakupharazgako, ntheura wakaluta kunyake. Mphanyi nase mazuŵa ghano taŵikapo mtima kuti vyakuchita vya awo ŵakukhumba kulekeska mulimo wa kupharazga vitondeke.
19 Wati wachitira ukaboni mwakukwana ku Ŵayuda mu Tesalonika na Bereya, Paulosi wakwenera kuti wakasambira kuti ntchakuzirwa kupharazga mwachikanga kweniso kudumbirana na ŵanthu kufuma mu Malemba. Nase tasambirapo. Kweni sono Paulosi wakalazga ku ŵanthu ŵanyake, Ŵamitundu ŵa ku Ateni. Kasi vinthu vikamwendera wuli mu msumba uwu? Tiwonenge ivi mu mutu wakulondezgapo.
a Munthu munyake wakusambira wakalongosora kuti nyengo yira kukaŵa dango la Kesare ilo likakanizganga ŵanthu kuchima “vya kwiza kwa themba linyake panji uthemba unyake, chomenechomene ilo lizamupoka malo panji kweruzga themba ilo lilipo.” Ntheura ŵalwani ŵa Paulosi ŵakwenera kuti ŵakasazgirako vinyake ku uthenga wa mpositole uyu kuti uwoneke nga ukasuskananga na dango ili. Wonani bokosi lakuti “ Ŵina Kesare na Ivyo Vili Kulembeka mu Buku la Milimo.”
