MUTU 6
Stefano, Munthu wa “Mtima Walusungu na Nkhongono”
Ivyo tikusambirapo pa umo Stefano wakapharazgira mwachikanga panthazi pa Sanihedirini
Nkhani iyi yili pa Milimo 6:8–8:3
1-3. (a) Kasi ni vinthu wuli vyakofya ivyo vikawira Stefano, kweni iyo wakachita wuli? (b) Kasi tidumbiskanenge mafumbo wuli?
STEFANO wakimilira panthazi pa khoti. Ŵanalume 71 ŵakakhala mwakuzingilizga Stefano mu holo yikuru yakuchitiska wofi, iyo yikwenera kuti yikaŵa pafupi na tempile mu Yerusalemu. Pa zuŵa ili, khoti la Sanihedirini likakumana kuti limweruzge Stefano. Ŵeruzgi aŵa ŵakaŵa ŵanthu ŵankhongono na ŵakumanyikwa, ndipo ŵanandi ŵa iwo ŵakamutinkhanga chomene msambiri wa Yesu uyu. Nakuti munthu uyo wakachemeska ungano uwu wakaŵa Wasembe Mukuru Kayafa, uyo myezi yichoko waka kumasinda wakadangilira apo Sanihedirini likadumura kuti Yesu Khristu wakomeke. Kasi Stefano wakachita wofi?
2 Pa nyengo iyi, pakachitika chinthu chinyake chapadera chakukhwaskana na chisko cha Stefano. Ŵeruzgi ŵakamulaŵiska ndipo ŵakawona kuti chisko chake chikaŵa “nga ntchisko cha mungelo.” (Mil. 6:15) Ŵangelo ŵakuyegha uthenga kufuma kwa Yehova Chiuta, ntheura ŵakuŵa ŵambura wofi, ŵakufwasa, ndiposo ŵamtende. Ndimo wakaŵira Stefano, nanga mberuzgi ŵakuzura na thinkho aŵa ŵakamanya kuti Stefano walije wofi. Chifukwa wuli Stefano wakaŵavya wofi?
3 Ŵakhristu mazuŵa ghano ŵangasambira vinandi ku zgoro la fumbo ili. Kweniso tikwenera kumanya chifukwa icho vinthu vikafikira paheni nthena kwa Stefano. Kasi iyo wakavikilira wuli chipulikano chake pambere wandakakike? Ndipo kasi tingamuyezga wuli?
“Ŵakavundura Ŵanthu” (Milimo 6:8-15)
4, 5. (a) Chifukwa wuli Stefano wakaŵa munthu wakukhumbikwa mu mpingo? (b) Kasi Stefano wakaŵa wa “mtima walusungu na nkhongono” mu nthowa uli?
4 Tikasambira kale kuti Stefano wakaŵa munthu wakukhumbikwa mu mpingo Wachikhristu uwo ukaŵa kuti wamba waka. Mu mutu uwo wajumpha, tikawona kuti iyo wakaŵa yumoza wa ŵanalume 7 ŵakujiyuyura, awo ŵakajipeleka kovwira ŵapositole, ŵati ŵapempheka kuti ŵawovwirepo. Pakuwona unandi wa vyawanangwa ivyo Chiuta wakamupa tikumanya kuti munthu uyu wakaŵa wakujiyuyura nadi. Pa Milimo 6:8 tikuŵazga kuti “wakachitanga minthondwe yikuru na vimanyikwiro,” nga umo ŵakachitiranga ŵapositole ŵanji. Kweniso tikuphalirika kuti wakaŵa wa “mtima walusungu na nkhongono.” Kasi ichi chikung’anamurachi?
5 Mazgu agho mu Chigiriki ghali kung’anamurika “mtima walusungu” ghangang’anamulikaso kuti “mtima uwemi.” Vikuwoneka kuti Stefano wakaŵa walusungu na wakuzika, lekani ŵanthu ŵakamutemwanga. Wakayowoyanga mu nthowa ya kukopa ŵategherezgi ŵake, ŵakakhorwanga kuti wakaŵa na mtima uwemi, ndiposo kuti ivyo wakayowoyanga vikaŵa vyaunenesko. Wakawa na nkhongono chifukwa mzimu wa Yehova ukagwiranga ntchito pa iyo, ndipo mwakujiyuyura wakazomera kulongozgeka nawo. M’malo mwa kujitukumura chifukwa cha vyawanangwa na maluso agho wakaŵa nagho, wakapelekanga malumbo ghose kwa Yehova ndipo wakaghanaghaniranga ŵanthu awo wakayowoyanga nawo. Lekani ntchakuzizika yayi kuti ŵalwani ŵake ŵakamuwonanga kuti ni munthu wakofya.
6-8. (a)Kasi ni vinthu wuli viŵiri ivyo awo ŵakasuskanga Stefano ŵakatenge wakabuda, ndipo chifukwa wuli? (b) Chifukwa wuli ivyo Stefano wakachita ni vyakuzirwa ku Ŵakhristu mazuŵa ghano?
6 Ŵanthu ŵanandi ŵakawuka kuti ŵasuskane na Stefano, kweni “ŵakatondeka kumususka chifukwa mzimu ukamovwira kuyowoya mwavinjeru.” a Ŵati ŵasoŵa chakuchita, “ŵakanyengelera ŵanthu kumphepete” kuti ŵamupusikizgire milandu mulondezgi wakugomezgeka wa Khristu uyu. Kweniso “ŵakavundura ŵanthu,” ŵanalume ŵalara, na ŵalembi, ntheura Stefano wakachichizgika kuti walute panthazi pa Sanihedirini. (Mil. 6:9-12) Ŵanthu ŵara ŵakati Stefano wakabuda vinthu viŵiri: Wakayuyuranga Chiuta ndiposo Mozesi. Mu nthowa wuli?
7 Ŵanthu ŵatesi aŵa ŵakati Stefano wakayuyura Chiuta chifukwa cha kuyowoya vinthu vyakususkana na “malo ghatuŵa agha,” kung’anamura tempile mu Yerusalemu. (Mil. 6:13) Ŵakatenge wakayuyura Mozesi, chifukwa cha kuyowoya vinthu vyakususkana na Dango la Mozesi, uko nkhusintha maluso agho Mozesi wakayowoya. Uwu ukaŵa mulandu wakofya chomene, chifukwa pa nyengo yira Ŵayuda ŵakachindikanga chomene tempile, Dango la Mozesi, ndiposo maluso ghanandi agho ŵakasazgako ku Dango. Ntheura, mulandu uwu ukalongora kuti Stefano wakaŵa munthu muheni chomene, wakwenelera nyifwa.
8 Chachitima ntchakuti ŵanthu ŵa visopa vyautesi nawo ŵakuteta mautesi ghanthena agha kuti ŵanjizge ŵateŵeti ŵa Chiuta mu suzgo. Mazuŵa ghano napo, ŵavisopa ŵakuvundura ŵalara ŵa boma kuti ŵatambuzge Ŵakaboni ŵa Yehova. Kasi tikwenera kuchita wuli para ŵanthu ŵatitetera mautesi? Tingasambira vinandi kwa Stefano.
Kuchitira Ukaboni Mwachikanga vya “Chiuta wa Uchindami” (Milimo 7:1-53)
9, 10. Kasi ŵanthu ŵakuyowoya vinthu wuli vyakukhwaskana na mazgu agho Stefano wakayowoya panthazi pa Sanihedirini, ndipo tikwenera kukumbuka vichi?
9 Nga umo tawonera kale, chisko cha Stefano chikaŵa nga ntcha mungelo, apo wakapulikizganga milandu iyo ŵakamupa. Sono Kayafa wakazgokera kwa iyo na kuyowoya kuti: “Kasi vinthu ivi ndimo viliri?” (Mil. 7:1) Apa nyengo yakuti Stefano wayowoyepo yikakwana. Ndipo wakayowoya nadi.
10 Ŵanthu ŵanyake ŵakususka ivyo Stefano wakayowoya pakujivikilira, ŵakuti nangauli wakayowoya nyengo yitali, kweni wakazgora yayi mulandu uwo ŵakamupa. Kweni unenesko ngwakuti ivyo Stefano wakachita ni vyakuzirwa chomene kwa ise ‘pakuvikilira’ makani ghawemi. (1 Pet. 3:15) Kumbukani kuti Stefano wakapika mulandu wa kuyuyura Chiuta chifukwa wakayowoya vinthu vyakususkana na tempile ndiposo kuyuyura Mozesi chifukwa wakayowoya vinthu vyakususkana na Dango. Pakuzgora, Stefano wakalongosora mwakudumura mdauko wa Israyeli mu vigaŵa vitatu, na kudidimizga mwakupwelelera fundo zinyake. Tiyeni tiwone vigaŵa vitatu ivi, chilichose pachekha.
11, 12. (a) Kasi Stefano wakayowoya wuli mwaluso vya Abrahamu? (b) Chifukwa wuli chikaŵa chakwenelera kuti Stefano wazunure Yosefe apo wakayowoyanga?
11 Nyengo ya ŵasekuru. (Mil. 7:1-16) Stefano wakamba kuyowoya vya Abrahamu, munthu uyo Ŵayuda ŵakamuchindikanga chifukwa cha chipulikano chake. Pakuyowoya nkhani yakuzirwa iyo nawo ŵakakolerana nayo, Stefano wakadidimizga fundo yakuti Yehova, “Chiuta wauchindami,” wakadankha kujilongora kwa Abrahamu mu Mesopotamiya. (Mil. 7:2) Nakuti munthu uyu wakaŵa mulendo mu Charu cha Layizgano. Abrahamu wakaŵavya tempile ndiposo Dango la Mozesi. Chifukwa wuli ŵanthu ŵara ŵakakoseranga kuti munthu wakwenera kugomezga tempile na Dango la Mozesi kuti waŵe wakugomezgeka kwa Chiuta?
12 Stefano wakazunuraso za Yosefe, uyo wakafuma mwa Abrahamu, ndipo ŵanthu awo ŵakamutegherezganga ŵakamuchindikanga chomene Yosefe. Kweni Stefano wakaŵakumbuska kuti ŵakuru ŵa Yosefe, awo ŵakaŵa ŵawiskewo ŵa mafuko gha Israyeli, ŵakamutambuzga munthu murunji uyu na kumuguliska ku wuzga. Ndipouli, ndiyo wakazgoka nthowa iyo Chiuta wakaponoskera Israyeli ku njara. Tikukayika yayi kuti Stefano wakawona kuti pakaŵa kuyana pakati pa Yosefe na Yesu Khristu, kweni wakakhumba chara kuyowoya kuti ŵategherezgi ŵake ŵalutilire kupulikizga.
13. Kasi nkhani ya Mozesi iyo Stefano wakayowoya yikazgora wuli milandu iyo ŵalwani ŵake ŵakamupa, ndipo ni fundo wuli iyo wakayowoyanga pa nkhani iyi?
13 Nyengo ya Mozesi. (Mil. 7:17-43) Stefano wakayowoya vinandi vya Mozesi, ndipo wakachita makora, chifukwa ŵanandi mu Sanihedirini ŵakaŵa Ŵasaduki, awo ŵakagomezganga yayi mabuku ghose gha mu Baibolo, kweni ŵakagomezganga agho ghakalembeka na Mozesi pera. Kweniso kumbukani mulandu wakuti Stefano wakayuyuranga Mozesi. Ivyo Stefano wakayowoya vikazgora mulandu uwu, chifukwa wakalongora kuti wakachindikanga chomene Mozesi ndiposo Dango. (Mil. 7:38) Wakayowoyapo kuti ŵanthu awo Mozesi wakakhumbanga kuŵawovwira ŵakamukana apo wakaŵa na vyaka 40. Ndipo pati pajumpha vyaka 40, ŵakasuska Mozesi kanandi waka. b Ntheura Stefano wakayowoyanga fundo yikuru yakuti: Ŵanthu ŵa Chiuta ŵakakana mwakuwerezgawerezga ŵanthu awo Yehova wakimika kuti ŵalongozgenge.
14. Kasi Stefano wakakhozgeranga fundo wuli pakuyowoya vya Mozesi?
14 Stefano wakakumbuska awo ŵakamutegherezganga kuti Mozesi wakayowoyerathu kuti mu Israyeli muzamuwuka ntchimi nga ni Mozesi. Kasi ntchimi iyi ni njani, ndipo ŵanthu ŵakenera kuyipokelera wuli? Stefano wakazgora yayi mafumbo agha m’paka apo wakamalizgiranga kuyowoya. Wakayowoya fundo yinyake yakuzirwa yakuti: Mozesi wakamanya kuti malo ghalighose ghangaŵa ghatuŵa, nga umo vikaŵira na malo gha pa chivwati chakugolera, apo Yehova wakayowoya nayo. Ntheura kasi munthu wangasopa Yehova mwakuzomerezgeka pa malo ghamoza pera, nga ni mu tempile la mu Yerusalemu? Tiyeni tiwone.
15, 16. (a) Kuyana na ivyo Stefano wakayowoya, chifukwa wuli chihema chikaŵa chakuzirwa? (b) Kasi Stefano wakayowoya wuli vya tempile la Solomoni mu nkhani yake?
15 Chihema na tempile. (Mil. 7:44-50) Stefano wakakumbuska khoti ili kuti pambere tempile lindazengeke mu Yerusalemu, Chiuta wakaphalira Mozesi kuti wazenge chihema. Ichi chikaŵa chinthu chakusoperamo icho ŵakendanga nacho. Ni njani uyo mphanyi wakaŵa na chikanga kuyowoya kuti tempile likaŵa lakuzirwa kuluska chihema, pakuti mu chihema ndimo Mozesi wakasoperanga?
16 Pamanyuma, Solomoni wati wazenga tempile mu Yerusalemu, wakayowoya fundo yakuzirwa mu lurombo lwake. Nga umo Stefano wakayowoyera, “Wapachanya nkhanira wakukhala mu nyumba zakuzengeka na mawoko chara.” (Mil. 7:48; 2 Mid. 6:18) Yehova wangagwiliskira ntchito tempile kuti wafiske vilato vyake, kweni ndimo wakukhala yayi. Ipo chifukwa wuli ŵanthu ŵara ŵakakoseranga kuti ŵanthu ŵangasopa yayi mwaunenesko kwambura nyumba yakuzengeka na mawoko gha ŵanthu? Stefano wakamalizga fundo iyi na mazgu ghankhongono ghakufuma mu buku la Yesaya ghakuti: “Machanya ntchitengo chane, charu chapasi ntchakukandapo malundi ghane. Ipo nyumba iyo mwanizengera yili nkhu, ndipo malo ghane ghakupumulirapo ghali nkhu? Woko lane ndilo lili kupanga vinthu vyose ivi.”—Mil. 7:49, 50; Yes. 66:1, 2.
17. Kasi ivyo Stefano wakayowoya (a) vikavumbura wuli maghanoghano ghaheni gha awo ŵakamutegherezganga ndiposo (b) vikazgora wuli milandu iyo ŵakamupa?
17 Apo mukuwona ivyo Stefano wakayowoya ku Sanihedirini, kasi mukuzomerezga yayi kuti wakavumbura mwaluso maghanoghano ghaheni gha awo ŵakamususkanga? Wakalongora kuti khumbo la Yehova ndakulutilira ndiposo lankhongono, kuti likukhala pa malo ghamoza yayi nesi kujintha waka pa maluso. Awo ŵakawonanga tempile lakutowa la mu Yerusalemu lira ndiposo mitheto na maluso agho ghakasazgikako ku Dango la Mozesi kuti ndivyo vikaŵa vyakuzirwa, ŵakatondeka kumanya chilato chikuru cha Dango na tempile. Mu nthowa yinyake, ivyo Stefano wakayowoya vikambiska fumbo lakuzirwa lakuti: Asi kupulikira Yehova ndiyo ni nthowa yiwemi ya kuchindikira Dango na tempile? Enya, mazgu gha Stefano ghakamuvikilira nadi pa ivyo wakachitanga, chifukwa wakapulikira Yehova na mtima wake wose.
18. Kasi tikwenera kuyezga Stefano mu nthowa wuli?
18 Kasi tikusambirako vichi ku ivyo Stefano wakayowoya? Wakaghamanyanga makora Malemba. Nase tikwenera kusambira Mazgu gha Chiuta usange tikukhumba kuchita “mwakwenelera na mazgu gha unenesko.” (2 Tim. 2:15) Kwa Stefano tikusambirakoso kuti tiŵenge na mtima uwemi kweniso ŵaluso pakuyowoya. Awo wakayowoyanga nawo ŵakaŵa ŵakali chomene. Kweni wakayowoya nawo nyengo yitali chifukwa chakuti wakayowoyanga vinthu ivyo ŵanthu ŵara nawo ŵakavichindikanga chomene. Kweniso wakayowoya nawo mwantchindi, wakazunura ŵanalume ŵalara kuti “ŵadada.” (Mil. 7:2) Nase tikwenera kuyowoya unenesko wa Mazgu gha Chiuta “mwakuzika ndiposo na ntchindi zikuru.”—1 Pet. 3:15.
19. Kasi Stefano wakayowoya wuli mwachikanga uthenga wa cheruzgo cha Yehova ku Sanihedirini?
19 Tikuleka yayi kuyowoya unenesko wa Mazgu gha Chiuta chifukwa cha kopa kukwiyiska ŵanthu; nesi kuchepeskako nkhongono ya mauthenga gha cheruzgo cha Yehova. Stefano wakachita makora chomene pa nkhani iyi. Wakwenera kuti wakawona kuti maukaboni ghose agho wakayowoya panthazi pa Sanihedirini ghakaŵavya ntchito ku ŵeruzgi ŵanonono mtima aŵa. Ntheura, mwakukhuŵilizgika na mzimu utuŵa, wakamalizga mazgu ghake mwa kuŵaphalira kwambura kopa kuti ŵakuyana waka na ŵasekuru ŵawo awo ŵakakana Yosefe, Mozesi, ndiposo ntchimi zose. (Mil. 7:51-53) Nakuti ŵeruzgi ŵa mu Sanihedirini aŵa ŵakakoma Mesiya, uyo Mozesi na ntchimi zose ŵakayowoyerathu kuti wakwiza. Nadi, ŵakaswa Dango la Mozesi uheni chomene.
“Fumu Yesu, Pokelerani Mzimu Wane” (Milimo 7:54–8:3)
“Ŵakati ŵapulika vinthu ivi, ŵakakwiya chomene mu mitima yawo ndipo ŵakamba kumumemenera mino.”—Milimo 7:54
20, 21. Kasi khoti la Sanihedirini likachita wuli na mazgu agho Stefano wakayowoya, ndipo Yehova wakamukhozga wuli?
20 Chifukwa cha unenesko wambura kususkika uwo Stefano wakayowoya, ŵeruzgi aŵa ŵakakwiya chomene. Pakuchita vinthu nga ŵanthu ŵambura mahara, ŵakamumemenera mino Stefano. Munthu wachipulikano uyu wakwenera kuti wakawona kuti nayo ŵamulengerenge lusungu yayi, ŵachitenge nayo nga ni Fumu yake, Yesu.
21 Stefano wakakhumbikwiranga chikanga chifukwa cha ivyo vikaŵa pafupi kumuwira, ndipo tikukayika yayi kuti wakakhozgeka chomene na mboniwoni iyo Yehova wakamulongora. Stefano wakawona uchindami wa Chiuta, ndiposo Yesu wimilira ku woko lamalyero la Yehova. Apo Stefano wakalongosoranga mboniwoni iyi, ŵeruzgi ŵara ŵakajara makutu ghawo na mawoko. Chifukwa wuli? Kukwambilira, Yesu wakaphalira khoti lenelili ili kuti iyo wakaŵa Mesiya ndiposo kuti wamukhala ku woko lamalyero la Awiske. (Mrk. 14:62) Mboniwoni iyo Stefano wakawona yikalongora kuti ivyo Yesu wakayowoya vikaŵa vyaunenesko. Nakuti khoti la Sanihedirini ili, ndilo likapeleka na kukoma Mesiya. Wose pamoza, ŵakawuka na kudinya Stefano na malibwe. c
22, 23. Kasi nyifwa ya Stefano yikayana na ya Fumu yake mu nthowa wuli, ndipo Ŵakhristu mazuŵa ghano ŵangaŵa wuli ŵakukhwima mtima nga Stefano?
22 Stefano wakafwa nga umo yikafwira Fumu yake, wakaŵa na mtende wa mu mtima, kugomezga Yehova ndiposo wakagowokera awo ŵakamukoma. Iyo wakati: “Fumu Yesu, pokelerani mzimu wane.” Panyake wakayowoya nthena chifukwa chakuti wakaŵa kuti wachali kuwona Mwana wa munthu pamoza na Yehova mu mboniwoni. Tikukayika yayi kuti Stefano wakamanyanga mazgu ghakukhozga gha Yesu ghakuti: “Ndine chiwuka na umoyo.” (Yoh. 11:25) Paumaliro, Stefano wakalomba kwa Chiuta na lizgu lankhongono, wakati: “Yehova, mungaŵapanga mulandu chara pa kwananga uku.” Wakati wayowoya mazgu agha, wakagona tulo mu nyifwa.—Mil. 7:59, 60.
23 Ntheura Stefano ndiyo wakaŵa wakwamba kufwa chifukwa cha chipulikano pa ŵalondezgi wose ŵa Khristu. (Wonani bokosi lakuti “ Kasi ‘Wakafwira Chipulikano’ mu Nthowa Wuli?” pa peji 48.) Kweni chachitima ntchakuti wakaŵa waumaliro yayi. Mazuŵa ghano napo, ŵateŵeti ŵanyake ŵa Yehova ŵakukomeka na ŵavisopa, ŵandyali, ndiposo ŵanthu ŵanyake ŵakususka. Kweni tili na chifukwa chakuŵira ŵakukhwima mtima nga Stefano. Sono Yesu wakuwusa, wali na nkhongono zapadera izo Awiske ŵali kumupa. Palije icho chizamumutondeska kuwuska ŵalondezgi ŵake ŵakugomezgeka.—Yoh. 5:28, 29.
24. Kasi Saulosi wakakhozgera wuli kukomeka kwa Stefano, ndipo ni vinthu wuli viwemi ivyo vikachitika chifukwa cha nyifwa ya munthu wakugomezgeka uyu?
24 Munyamata munyake zina lake Saulosi wakawonanga vyose ivi. Wakazomerezga kuti Stefano wakomeke ndipo ndiyo wakalindanga vyakuvwara vya awo ŵakamudinyanga na malibwe. Nyengo yichoko waka ivi vyati vyajumphapo, wakadangiliranga ŵanthu apo ŵakatambuzganga Ŵakhristu. Kweni nyifwa ya Stefano yikawovwira kuti pachitike vinthu vinyake viwemi. Ivyo Stefano wakachita vikakhozga Ŵakhristu ŵanyake kulutilira kugomezgeka na kutonda nga ndiyo. Kweniso, Saulosi uyo pati pajumpha nyengo wakamba kuchemeka Paulosi wakachita chitima chomene pakughanaghana ivyo iyo wakachita apo Stefano wakakomekanga. (Mil. 22:20) Nayo wakawovwirako kuti Stefano wakomeke, kweni pamanyuma wakazomera kuti: “Nkhaŵa wakuyuyura Chiuta na wakutambuzga kweniso munthu wamsinjiro.” (1 Tim. 1:13) Ivi vikulongora kuti Paulosi wakamuluwa yayi Stefano kweniso ivyo wakayowoya zuŵa lira. Nakuti vinyake ivyo Paulosi wakayowoya na kulemba muli fundo izo Stefano wakayowoya. (Mil. 7:48; 17:24; Heb. 9:24) Nyengo yikati yajumphapo, Paulosi wakasambira kulondezga chipulikano na chikanga ivyo Stefano, munthu wa “mtima walusungu na nkhongono” wakalongora. Fumbo ndakuti, Kasi ise tisambirengeko?
a Ŵanji mwa ŵakususka aŵa ŵakaŵa ŵa “Sunagoge la Ŵakuwombokwa.” Ŵakwenera kuti pakwamba ŵakakoleka na Ŵaroma ndipo ŵakafwatulika, panji ŵakaŵa ŵazga ŵakuwombokwa awo ŵakang’anamukira ku Chiyuda. Ŵanji ŵakafuma ku Kilikiya, nga umo wakaŵira Saulosi wa ku Taraso. Nkhani iyi yikuyowoyapo yayi usange Saulosi wakaŵa yumoza wa ŵa ku Kilikiya awo ŵakawukira Stefano.
b Fundo izo Stefano wakayowoya zikusangikaso mu lemba linyake yayi mu Baibolo. Zinyake mwa fundo izi ni umo Mozesi wakasambilira mu Eguputo, vyaka ivyo wakaŵa navyo apo wakachimbiranga mu Eguputo, na utali wa nyengo iyo wakakhalira mu charu cha Midiyani.
c Ntchakukayikiska kuti khoti la Sanihedirini likaŵa na mazaza pasi pa dango la Ŵaroma ghakudumulira kuti munthu wakomeke. (Yoh. 18:31) Kwali ndimo vikaŵira kwali yayi, vikuwoneka kuti Stefano wakakomeka chifukwa chakuti ŵanthu ŵakaŵa ŵakali chomene kweniso wakamutinkhanga waka, ntchifukwa chakuti wakasangika na mulandu yayi.
